We-la 13

1Dɛ Korowii keamere ne nɛra baa dɛ chagle nɛra Korowii waa ge lɔ Anteɔk asɔre tena la bini. Banee Banabas ne Seemɔn baa dɛ yerɔ Nɛmbiŋi la, ne Lusias waa le Sairini la, ne Maneeyan la baa dɛɛro Kooro Hɛrɔd mɛɛ dem la, ne Sɔɔl. 2Awola bɛl a gɛ nɛra nɔ aa vɔwɛ nyoa dɛɛ tomɛ Korowii la, Korowii Domadɛɛge baa ŋɔ ba be ŋɔ, "Hé le Banabas ne Sɔɔl tɛ mɛ ásɛ ba ɛ toma maa lee ba ŋɔ bá ba ɛ la." 3Anomanta ba vɔwɛ nyoa dɛ soŋe Korowii dɛ kpɔ nɔɔra darawe nɛra banɛ la nɛɛ dɛ kpɔ ba do Korowii nɔn ta, dɛ gel ba kaa. 4Korowii Domadɛɛge la aa tom ba la, ba la Sɛluusia, dɛ ka che bela kpɔ gbera kaa Saepros harɛ ta. Dɛ ekwii a gɛ harɛ nɔ. 5Baa tel Saepros bwɛɛ bɛl baa dɛ yerɔ Salamis ta la, ba bol Korowii Waa bagle nɛra bela Juda tena cheremi deene bini. Dɛ ba dɔ Jɔn Maak wɛɛ cha ba ba toma ta. 6Ba gaage Saepros harɛ la bwa ta dɛ bol Korowii Waa bagle nɛra dɛ ka le o nyoa bwɛɛ bɛl baa dɛ yerɔ Pafɔs la ta. Baa tel Pafɔs la, ba kaa na Juda te dobodobo te bɛl. Dɛ o sɔne Baajesɛs. Dɛ Grik tena ge dɛ yerɔ Ɛlemas. O koh o dobodobo la waa dɛɛ yerɛ o te Korowii keame. 7Dɛ ekwi la nomoa baa dɛ yerɔ Sɛɛjos Pɔɔlos la bee o do. A gɛ nomoa nɔ jemɛ waa taeh, dɛɛ nyin Korowii Waa dɛ no. Anomanta o yerɛ Banabas ne Sɔɔl ba o be. 8Dɛ dobodobo te la aa nyin kɛŋɔ nomoa la no Yeesu wa, dɛɛ tɔ Banabas ne Sɔɔl ŋwɛnɛ, dɛɛ tɔŋ ba. 9Asɛ Korowii Domadɛɛge ir Sɔɔl Grik tena aa dɛ yerɔ Pɔɔl la nɛ, asɛ o pa sie baa la nɛɛ dɛ nyiŋu dɛ ŋɔ, 10"Bɔnsam nɛn kohona, he hah wedɛɛga bwa kɛrɛdɛ! He lambaara kan ga. Bɛ he wechɔga la kpɔ tɔ Korowii ŋwɛnɛ. 11Dɛɛ no bonɔ. Korowii ɛɛ bagle o kpegri he nɛɛ asɛ he nyoŋe, asɛ a bigri tama mɔɔ he berɛ won dɛɛ na bɔr." Kerabeŋkpoŋ dɛ o sie ɛo jumaa kɛŋɔ kɔɔla ken, o den nyoŋe, dɛɛ lagre bɔr dɛɛ nyin nɛn ó lawɔ da. 12Nomoa la aa na a gɛ waa nɔ la, o yarada Yeesu waa dɛ kpɔ o te tɛo, dɛkalkɛŋɔ Yeesu waa la baa dɛ chagle la kpo o nyoa. 13Pɔɔl ne nɛra o ne baa dɛ valɛ la jo gbera ta le Pafɔs bela dɛ ba Pɛɛga waa lɔ Pamfiilia harɛ ta la. Jɔn Maak gel ba bela dɛ berɛ kaa Jerusalam. 14Pɔɔl ne o nɛra la le Pɛɛga dɛ la Anteɔk waa lɔ Pisidia harɛ ta la. Ona Tɔpere la aa baa tel la, ba kaa jo bela Juda tena cheremi dea bini dɛ so. 15Baa soge bela la, nɛra bane kure waane le Mosis Mmara Tɔn bini ne Korowii Keamere Tɔn bini, asɛ nomonome baa dɛ nyiŋi cheremi dea la bini waa ta la ŋɔ Pɔɔlwa be ŋɔ, "Yabala, dɛ he dɔ waane dɛ́ bol dɛ ja yaa aa, ŋwɛnɛ chɔ le." 16Belaa Pɔɔl ir che dɛ kpɔ nɔn ɛg ba ŋɔ bá tɔ nyoa, dɛ ŋɔ, "N bala Israel tena ne he nɛra haa baa ja ya nɛɛ dɛɛ tomɛ Korowii, hé no n be. 17Korowii la ya Israel tena nɔ aa dɛ tomɛ la fa le ya naanar ŋɔ ba ɛ o nɛra nɛwɛnyini bwa bini. A gɛ saŋ baa lɔ Ijipt harɛ la, o gelɔ ba warɛ, asɛ ba sɔn ge le kohona. Belaa o ba kpɔ ba le Ijipt harɛ o kpegri ne, 18dɛ nyiŋi ba nɛɛ ba bene fifraanaarɛ baa dia pua waa ɛ hɛŋle gbo harɛ la bwa ta. 19Wobol bele anuanɛ bwa nɛraa o doŋi ba harɛre ta Keenan harɛ ta, dɛ gel a gɛ harɛre la ɛ ba kwaa bene lafraanaarɛ fifraanue. 20"Anɔ bwa habɔɔ la Korowii tɛɛ ba nomonome baa nyiŋi ba nɛɛ dɛ ka tel Korowii keame Samoɛl bere saŋ. 21A gɛ saŋ la ba soŋe Korowii ŋɔ ó tɛɛ ba kooro, asɛ o tɛɛ ba Kes bie Sɔɔl ŋɔ ó ɛ ba kooro. Dɛ Benjamen dea biee on. Bene fifraanaarɛɛ Sɔɔl di kora la mɔɔ, 22Korowii leo kora la ta, dɛ kpɔ Devid so. Korowii bol Devid waa ŋɔ, 'Jese bie Devid waa too n tea, dɛkalkɛ onee n na kɛŋɔ wɛɛ ɛ n tetoowaa maa dɛ nyin kɛ o ɛ bwa.' 23Gɛ Devid nɔ dea taa Korowii le Yeesu waa bagɛ Israel tena nyoa ŋɔ wɛɛ geloo o ba lɛɛ ba la. 24Yeesu aa wola balɛ mɔɔ la, dɛ Jɔn dɛ bagle Israel tena bwa ŋɔ bá charɛ ba liire dɛ le ba wechɔga ta, ásɛ o sɔ ba Korowii ne. 25Jɔn toma aa dɛ tonɛ la, o bɔɔ nɛra bane ŋɔ, 'Nɛn besoo hɛɛ lii mɛ nɔ? Nɛn haa dɛ kpao la laa men. O ta lɔ habɔɔ. Maa o napaa tee kwaraa dɔ.' 26"Yabala, Abraham naanar ne he nɛra haa wola Juda tena ɛɛ dɛɛ tomɛ Korowii bwa, ya bee waa aa dɛ ba nɛwɛnyini lɛɛ nɔ ba. 27Jerusalam tena ne ba nomonome ta jemɛ kɛ Yeesuu nɛwɛnyini Lɛɛ la. Korowii waa o keamere aa chwera asɛ ba kure dɛɛ bag ba Ona Tɔpera bwa ta la, dɛ baa a mun no. A waa ba bol o waa dɛ pao bolchɔge dɛ kpoo gɛ Korowii keamere aa bagla ŋɔ baa ɛo la. 28Dɛ ba ta wobɛlbwaa dɔe dɛ kpɔ dawɔ kɛŋɔ o chɛ kpoe, kɛ dɛ ge soŋe ba harɛ nomoa Paelet ŋɔ ó pao bolchɔge dɛ kpoo. 29Baa ɛo gɛ Korowii Tɔn aa bagla ŋɔ baa ɛo bwa tonɛ la, ba kpɔɔ le dagagre la doa dɛ ka hugo. 30Asɛ Korowii berɛ iru seo ta. 31O kpɔ o te bagle nɛra o ne baa le Galilia harɛ kaa Jerusalam la kera aŋwɛnɛ bwa. A gɛ nɛra nɔɔ dɛɛ diu danseɛ Juda tena bwa be. 32"Amanesoma nee ya ba he be. Gɛ Korowii aa bagɛ ya naanar nyoa la, 33gɛɛ o ɛ tɛ ya nɛra yaa ɛ ba naanar la. Anee kɛ o ir Yeesu seo ta. Ba chwerɛ o waa Korowii Kpɛɛra Tɔn yel nɛɛte la bini ŋɔ, 'N biee hen. Finii n lolɛ.' 34Gɛ Korowii aa bagle o waa o Tɔn bini ŋɔ wɛɛ iru seo taa asɛ o bɛ bɔɔ bini chɔ pɔh laanee nɔ: 'Mɛɛ ɛɛ wedɛɛga maa bagɛ Devid nyoa kasinteŋ bwa ne laanee.' 35A waa ba berɛ chwerɛ a gɛ tɔn la bobɛl ŋɔ, 'Haa gel he bidɛɛge chɔ bɔɔ bini pɔh' la. 36"Gɛ saŋ Devid aa lole la, o ɛ Korowii tetoowaa kɛrɛdɛ mɔɔ dɛ sewɛ, asɛ ba hugo, o bwadabii pɔh. 37Kɛ nɛn la Korowii aa iru seo ta la te ta pɔeh. 38Yabala, ya dɛ nyin kɛ he jemɛ kɛŋɔ Yeesu waa waa ɛa la waa ya won dɛɛ bol he be ŋɔ Korowii ɛɛ kpɔ he wechɔgaa kɛ heyaa la. 39Wubwa la, haa dɛ nyin gɛ haa ɛ ásɛ Korowii kpɔ he wechɔga kɛ heyaa la, Mmara la Korowii aa kpɔa do Mosis nɔn ta la ta wone cha heya. Kɛ taraken te, nomɛlbwa waa yarada Yeesu la, Korowii dɛ lɛo kɛ nɛndɛɛge o waa su o siwi. 40Anomanta hɛ́ɛ do dɛɛgɔ asɛ waa Korowii keamere la aa bola la bɛ heyaa ɛ. Ba baglɔ ŋɔ, 41'He nɛra haa nyiŋi nɛra dɛɛ vah dɛɛ mamɛ nɛra la, hé nyiŋi waa maa dɛ ɛ nɔ kɛrɛdɛ. Aa ba kpo he nyoa he serewe. Waa maa dɛ ɛ fini nɔ ɛ waane, dɛ nɛn bagle a bini tɛ heyaa kwara naa, haa wola yarada!' " 42Pɔɔl aa bol waa tonɛ la, o ne Banabas iro dɛɛ le cheremi dea la bini. Belaa nɛra baa bol waa bag ba la ŋɔ Pɔ́ɔlwa berɛ ba Ona Tɔpere waa ba ja la ta dɛ́ ba bol waa la bag ba ja. 43Nɛra la aa le cheremi bɔr bela la, Juda tena ne nɛra baa wola Juda tena ɛɛ dɛ baa ja Juda tena nɛɛ dɛɛ tomɛ Korowii gɛ Juda tena aa dɛ tomɔ la teŋɛ Pɔɔl ne Banabas nɛɛ pirim. Pɔɔlwa bol waa bag ba, dɛ ja ba ŋɔ báa teŋɛ Korowii ŋwɛnɛ ta ásɛ wɛɛ cha ba. 44Ona Tɔpere la aa bala ja la, bwɛɛ la tena kɛrɛdɛ bwa la cheremi dea bela dɛ́ ka no Korowii Wa. 45Juda tena la aa na nɛra baa wola Juda tena ɛɛ la aa wara kohona la, a ɛɛ ba bɔweela taeh, asɛ baa tɔŋle Pɔɔl ne Banabas dɛɛ ɛɛ ba nɛnhɛla. 46Baa dɛ ɛ Pɔɔl ne Banabas nɛnhɛla la, ate ta kwaraa baa bol waa bansua ne dɛɛ ŋɔ, "A ŋwɛnɛ taa ya tɔ sie bol Korowii Amanesoma waa la he be la. Kɛ he gbagba aa vɛah dɛ bagle kɛŋɔ he te ta Korowii mkpa la chɛɛ nɔ te naa, yaa gel heyaa dɛ la nɛra baa wola Juda tena ɛɛ la be, 47dɛkalkɛŋɔ gɛɛ ya Dɔɔ ŋɔ ya be ŋɔ, 'N le heyaa ŋɔ hé ɛ nii dɛɛ chaah nɛra baa wola Juda tena ɛɛ la bwa, ásɛ nɛra baa lɔ harɛ jaga bwa la che he nɛɛ dɛ no Korowii Waa aa dɛ ba ba lɛɛ la he be.' " 48Nɛra baa wola Juda tena ɛɛ la aa no waa nɔ la, ba sie lɛo taeh. Anomanta ba jam Korowii kɛŋɔ waa gela ba no o waa la. Asɛ nɛra Korowii aa ŋɔa baa dɔ o mkpa laanee la yarada Yeesu waa la dɛ kpɔ ba te tɛo. 49O waa la perɛ bela bwɛɛre la bwa ta. 50Anɔ bwa aa dɛ ɛ la, dɛ bela Juda tena la ir bela nomonjena ne haahna bane baa ɛ nɛnjena dɛɛ tomɛ Korowii la bwaawee, asɛ ba baah di Pɔɔl ne Banabas nɛ, ba hah ba dɛ doŋ ba ba bela bwɛɛre la ta. 51Pɔɔl ne Banabas pee ba napaala teera ta bela dɛ bagle kɛŋɔ ba kpɔ Korowii Waa ba ba be asɛ ba vɛah, dɛ kaa Ikooniam. 52Anɔ bwa aa dɛ ɛ la, bɔhwaah ta asɔre tena baa lɔ bela la lawɛ. Dɛ ba sie lɛo kɛrɛdɛ, asɛ Korowii Domadɛɛge la ge so ba nɛɛ taeh.

will be added

X\