We-la 11

1Yeesu toroma la ne ba bala asɔre tena baa lɔ Judia harɛ ta la noɔ kɛŋɔ nɛra baa wola Juda tena ɛɛ la bwa no waa la dɛ yarada. 2Pita aa la Jerusalam la, ba bala Juda tena baa dɛ maŋkura penteŋ waa la pwaoh ŋɔ, 3"Ɛrɛ waa he ka chog nɛra baa wola Juda tena ɛɛ baa wola ba pena teŋe dem dɛ saah di kwaa bela nɔɔ?" 4Baa ŋɔ gɛ la, anee Pita le waa la mun ta dɛ bagle waa la bwa aa bala o di ba kondikwaa la. 5O ŋɔ ba be ŋɔ, "Jopaa n do dɛɛ soŋe Korowii, dɛ na waane a do kɛŋɔ deera ken. N nao kɛŋɔ baa lawɛ komɛl kɛŋɔ yajen nyoo bɔre anaarɛ la bwa, kwaane do o ta, a sagɛ jɛɛhjɛɛh dɛ le nyundua dɛɛ ba harɛ. 6Maa nyiŋi o ta la, n na ola, a bini anɔ la aa dɛ di ol ne anɔ la aa dɛ chwe kpɔga bwa, ne anɔ la aa dɛ tuugi harɛ ne anɔ la aa dɛ huuh bwa, ne jumbii bwa. 7Asɛ n no kɛŋɔ nomɛl aa ŋɔ n be ŋɔ, 'Pita, ir dɛ kpo, dɛ chwe.' 8Belaa n ŋɔ, 'Aa magre, n Dɔɔ! N ta koŋkiila dii bwa. A ɛ doŋa tɛ mɛ kɛrɛdɛ.' 9Asɛ naate berɛ kwaa ŋɔ n be nyundua bela ŋɔ, 'Kon Korowii aa laa o doŋa kpɔ o nɛɛ la, bɛ on kondoŋ lii kpa.' 10A gɛ waa nɔ ɛo kera atoro, asɛ kon la berɛ kaa nyundua kwaraa. 11"Bug la ta dɛ baala batoro bane baa le Sisaaria ba tom ba n be denɔ ba jo dem maa lɔ o ta la ta. 12Belaa Korowii Domadɛɛge la ŋɔ n be ŋɔ n bɛ ɔmɛ, kɛ ń teŋɛ ba nɛɛ kaa. Yabala banumɛl nɔ baa le Jopa nɔ ge teŋɛ n nɛɛ la Sisaaria, asɛ ya bwa ka jo Kɔnɛɛleɔs dem. 13Belaa o ge bagle gɛ o ge aa na nyundua torome o dem, asɛ o ŋɔ o be ŋɔ, 'Tomɛ nɛn Jopa, asɛ ó la baa bɛl baa dɛ yerɔ Seemɔn Pita la be. 14Wɛɛ bol waa he bee ásɛ he ne he dem tena bwa che a ta dɛ dɔ he nyu.' 15Maa la o be la, maa pa mun dɛɛ bol waa la, dɛ Korowii Domadɛɛge la baa so o ne o dem tena nɛɛ kɛŋɔ waa baa so ya nɛɛ logla la. 16Belaa n lii gɛ ya Dɔɔ faa ŋɔa ŋɔ, 'Nee nee Jɔn faa sɔ nɛra Korowii ne, kɛ he te, Korowii Domadɛɛge nee baa ba he sɔe la.' 17Yaa baa yarada Yeesu la, kon Korowii aa kpɔa tɛ yaa laanee o tɛ nɛra nɔ la. Aah dɛ n gee umeo dɛ́ tɔŋle Korowii ɔ?" 18Baa no gɛ la, ba nyoa sɔɔhnɔ, asɛ ba jam Korowii dɛ ŋɔ, "Amɔ te Korowiirii tɛ nɛra baa wola Juda tena ɛɛ la ge ŋwɛnɛ ásɛ ba charɛ ba liire dɛ le ba wechɔga ta dɛ dɔ ba nyu!" 19Steeven seo la habɔɔ fiiga baa fiigi asɔre tena asɛ ba pegre la gelɔ bane kaa bojaŋa tenten. Hale bane la Finiisia ne Saepros ne Anteɔkwa bwa. Baa dɛ valɛ a gɛ harɛre nɔ ta la, ba ta Yeesu waa la bolɛ nomɛlbwa be ka ja Juda tena nɛ. 20Kɛ Saepros ne Sairini baala bane ba ge aa ɛ asɔre tena la te iro dɛ la Anteɔk dɛ ka bol ya Dɔɔ Yeesu Amanesoma la waa nɛra baa wola Juda tena ɛɛ be. 21Dɛ Korowii dɛ cha ba o kpegri ne, asɛ nɛra no Yeesu waa la dɛ yaradaa dɛ charɛ ba liire dɛ kpɔ ba te tɛ Yeesu. Dɛ a gɛ nɛra nɔ warɔ kɛrɛdɛ. 22Asɔre tena baa lɔ Jerusalam la baa no a gɛ waa nɔ, dɛ tomɛ Banabas ŋɔ ó la Anteɔk asɔre tena la be dɛ́ ka na gɛ ba Korowii toma aa doa. 23Waa la bela dɛ ka na gɛ Korowii aa nyin ba dɛɛ cha ba la, o sie lɛo. Anomanta o ja ba dɛ do ba gbemba ŋɔ báa teŋɛ Yeesu ŋwɛnɛ ta ba bambile bwa ne. 24Dɛ Banabas ɛ nɛndɛɛge asɛ Korowii Domadɛɛge ge so o nɛɛ kpegri nɛ. Dɛ o dɛ yarada Yeesu taeh dɛ kpɔ o te tɛo. Anomanta nɛra charɛ ba liire pirim dɛ ba tomɛ Yeesu. 25Banabas la Taasos dɛ ka gaage Sɔɔl bɔr. 26Waa nao la, o kpɔɔ kaa Anteɔk. Baa lɔ bela la, ba benanyobir bwa dɛ ba ne bela asɔre tena dɛ cheme. Ba bagle nɛra pirim Yeesu waa bela. Anteɔk belaa ba tɔ sie yerɛ nɛra baa yarada Yeesu la Kristo tena. 27A gɛ saŋ la, Korowii keamere bane le Jerusalam la Anteɔk. 28Dɛ ba bini bɛl sɔne Agabus. Korowii Domadɛɛge la ir o nɛ, asɛ o ir che dɛ na chaahna dɛ ŋɔ lɔrchɔge bɛl dɛ ba ba harɛ la ta bala. (Kpela, a balɔ Klɔdeɔs kara dii saŋ). 29Belaa asɔre tena la ŋɔ baa pu siee ta suuga gɛ ba bɛlbwa aa wona laanee dɛ ka tɛ ba bala asɔre tena baa lɔ Judia harɛ la mɔɔ lɔr la ba. 30Ba ta a gɛ suuga la dɛ kpɔ tɛ Banabas ne Sɔɔl ba ka tɛ Judia harɛ asɔre tena la nomonome.

will be added

X\