3 Jn 1

1Men Nomoa Jɔnee chwerɛ tɔn nɔ dɛɛ tɛ n dandɛɛge Gayos maa koh beŋkpoŋ ya bwa aa ɛa Korowii kasinteŋ waa la ta la dɛɛ nyin he waa la. 2N dandɛɛge, n dɛ soŋe Korowii o chae he dɔ bokpega kɛrɛdɛ, he waa bwa do wer kɛŋɔ he ne Korowii baah naa do wer la. 3Yabala bane balɔ dɛ ba bol he waa n be ŋɔ he dɛ teŋɛ kasinteŋ waa la ta. Dɛ́ he we-ɛɛla bwa dɛ bagle gɛ. Anomanta n baah sɔɔh mɛ taeh. 4Saŋ bɛlbwa maa no n bii waa kɛŋɔ ba dɛ teŋɛ kasinteŋ la ta la, n baah dɛ sɔɔh mɛ gwaa komɛlbwa. 5N dandɛɛge, gɛ he yon lɛ asɔre tena haa wola ban jemɛ kwara, kɛ dɛ won kpɔ ba ka dawɛ he nɛɛ dɛɛ nyiŋ ba la, he dɛ teŋɛ ŋwɛnɛ la ta kɛrɛdɛ. 6Ba bol he waa bagle asɔre tena dɛ tɛɛ sɔn, dɛ bagle gɛ haa nyin ba. Anomanta dɛ ba dɛ ba kaala aa, cha ba ba ŋwɛnɛ la ta gɛ aa chɛ kɛ Korowii nɛn ɛ, 7dɛkalkɛŋɔ Yeesu toma waa ba koh dɛɛ valɛ. Baa suuga lɛɛ dɛɛ le nɛra baa wola Korowii waa yaradae la be. 8Anomanta a wer kɛŋɔ ya cha nɛra baa dɛ ɛ a gɛ toma nɔ. Dɛ ya wono dɛɛ cha dɔŋa gɛ naa, dɛ Korowii kasinteŋ waa la tomaa ya bwa ɛɛ ɛ la. 9N fa chwerɛ waane dɛ tɛ asɔre tena bela, kɛ Dayɔtrafes aa dɛ nyin nomonome nomanta, o vɛh ya waa la. 10Anomanta dɛ n balaa, mɛɛ bol o waa, dɛ bol gɛ waa dɛ chɔg yaa dɛ kpɔ waa dɛɛ dawɛ yaa la. A gbo laa wɛɛ ɛ. O ta sɛɛh dɛɛ nyiŋi yabala baa vala dɛɛ bol Yeesu Kristo waa la. Dɛ bane ge dɛ nyin ba lɛɛ ba dɛɛ nyiŋ ba aa, waa gelɛ baa lɛɛ ba, dɛ yon doŋi ba bwa le ba bini. 11N dandɛɛge, bɛ nɛra baa dɛ ɛ wechɔga la nɛɛ teŋɛ. Kɛ dɛɛ teŋɛ nɛra baa dɛ ɛ wedɛɛga la nɛ. Banɔ la baa dɛ ɛ wedɛɛga la ɛ Korowii bilola. Nomɛlbwa ge waa dɛ ɛ wechɔga la aa Korowii jemɛ. 12Gasi toole Demetros ge nɛ. Nomɛlbwa dɛ bol o waa ga. Kasinteŋ la waa dɛ teŋɛ o ta la ge dɛ diu danseɛ. Ya gba dɛ diu danseɛ gɛ. He jemɔ kɛŋɔ yaa nyosone teŋe. 13N dɔ waa taeh dɛɛ nyin n bol he be. Kɛ maa nyin kɛŋɔ n chwera do tɔn ta. 14N dɛ nyin kɛŋɔ n ba chɔɔre taraken bɔr ásɛ ya sie ɛ anɛ ya bol wa. Kórowii tɛɛ bosɔɔhna. He daamanar baa lɔ bonɔ la bwa dɛ nae. Ya dɛ na ya daamanar bwa.

will be added

X\