2 Timoti 3

1Jemɛ kɛŋɔ tɔpera aa ba ka mun ba la, aa do kpegrii tɛ nɛra, 2dɛkalkɛ nɛra ɛɛ dɛɛ nyin ba gbagbaa gwaa komɛlbwa, dɛɛ nyin suuga sibegra ne, dɛɛ ɛ mbarafo, dɛɛ ɛ jenu, dɛ bol waa dɛɛ yagɛ nɛra, dɛ ɛ deŋnekpeg tena baa wola ba eehnanar waa no, dɛ ɛ boniayɛ tena, dɛ ɛ ba te nɛndoŋa. 3Ba chal aa dɔŋa nɛɛ doe ba, baa wechɔgaa kpɔ dɛɛ kɛ dɔŋa. Baa dɛɛ haŋɛ dɔŋa nyooree, baa haŋraa dɔ ba pɛla kwaa ta, baa dɛɛ ɛ gaeeh, baa hah wedɛɛgaa. 4Baa ɛ bwɛpagre nɛraa, ba sie ɛɛ do wɔrɔbee, dɛɛ maŋkura ba te. Baa kpɔ silɛɛ kwaa gwaa Korowii. 5Baa dɛɛ ɛ ba we-ɛɛlaa kɛ nɛra baa dɛ tomɛ Korowii ken, kɛ dɛɛ vɛh kpegri waa lɔ Korowii toma ta la te. Laa he te kpɔ gɛ nɛra nɔ bini. 6Gɛ nɛra nɔ bini banee yon kpɔ ŋwɛnɛre ane ta dɛ sɔh jo deremi ta, asɛ dɛɛ dɔ haahna ba wechɔga aa gwaa ba nɛɛ ba sie ɛɛ yal ba ba pɛlchɔga ta la, ba yon dɛɛ teŋɛ ba nɛ. 7A gɛ haahna la dɛ hweli waa tɔperee te bɛlbwa, kɛ kasinteŋ waa aa lɔ waa la bini la te, baa won an jemɛ bwa. 8Gɛ Janes ne Jambɛs aa vuugi Mosis la, gɛɛ a gɛ nɛra nɔ gee vuugi kasinteŋ waa la. Ba liire aa were. Baa vɛh kasinteŋ waa la yaradae nomanta, Korowii vɛɛh ba. 9Ba we-ɛɛla aa won tel sie bobɛlbwa, dɛkalkɛŋɔ gɛ a saŋ la tena aa na Janes ne Jambɛs gɛna la, gɛɛ nɛra ɛɛ na ba ge gɛna gɛ. 10He Timoti te, he jemɛ waa maa dɛ bagle la bwa, dɛ jemɛ n da, ne kon la waa maa dɛ koh, ne gɛ maa dɛ yarada Yeesu Kristo, ne gɛ maa won bambile lawa, ne gɛ maa dɛ nyin nɛn, ne gbemba maa dɔa. 11Fiiga baa fig mɛ ne n wenaale maa naa Anteɔk, Ikooniam ne Lestra, n lawɛ bambile a bwa ta la, he jemɛ a bwa. Kɛ ya Dɔɔ la cha mɛ dɛ lɛɛ mɛ a gɛ waa la bwa ta. 12Kasinteŋ, nomɛlbwa waa dɛ nyin kɛ o ne Yeesu Kristo pɛ o soga bini o waa su Korowii siwi la, baa ɛo hɔhɔrɔwaa. 13Nɛnchɔga ne nɛra baa negre nɛra dɛɛ do wechɔga ta la gee kao sagɛ wechɔga ɛɛ ta dɛɛ la, dɛɛ negre nɛra, asɛ nɛra ɛɛ negre ba ge. 14Kɛ he te, dɛɛ teŋɛ kasinteŋ webagla haa hwela dɛ jemɛ kɛ a ɛ kasinteŋ la ta. Bɛ gel bwa. He jemɛ nɛra baa bagle gɛ waa la, dɛɛ yarada ba ge. 15He bechale saŋ bwaa he le jemɛ Korowii Tɔn bini waa aa dɛ ba wona gel he dɔ wejema, dɛ che yarada haa dɛ yarada Yeesu Kristo la ta Korowii lɛɛ. 16Korowii Tɔn bini waa bwa, Korowiirii kpɔa do nɛra liire ta ba chwera, asɛ a wer kɛ ba kpɔa dɛɛ bagle nɛra wa, dɛ kpɔa dɛɛ ja nɛra ba wechɔga ta, dɛ kpɔa dɛɛ togre nɛra, dɛ kpɔa dɛɛ chagle nɛra waa aa dɛ su Korowii siwi. 17Anee dɛ won cha Korowii nɛn o won ɛ wedɛɛga bwa ka tonɛ.

will be added

X\