2 Timoti 2

1N bie Timoti, che kiŋkiŋ kpegri ya Dɔɔ Yeesu Kristo aa chae he dɔ le pɛɛ he ne waa pɛa la ta. 2Waa la nɛra aa chema warɛ asɛ n bol he be la, bola bagle nɛra ba wa aa dɔ kasinteŋ dɛ jemɛ kɛ ba gee wonoo kpɔ bol bagle nɛra bane ge la. 3Dɛ wekpega pui toma nɔ ta naa, gel he bwara nyɛg kɛ Yeesu Kristo sooja gbagba. 4Sooja bɛlbwa dɛ nyin kɛ o toma su o nomoa siwi. Anomanta waa o te kpɔe dɛɛ koo nɛmpɛɛne waa ta. 5Chwachwaa waa dɛ chwa dɛ́ lɛ komɛl la ge, dɛ o ta chwae mmara la ta teŋaa, waa won chwa dɔ komɛlbwa. 6Paa waa dɛ swɛɛ siwi o koo toma ta laanee chɛ kɛ o di koo la kondikonlogla. 7Gel waa maa bola nɔ do he liire bini. Korowii ɛɛ geloo he jemɛ a bwa mun kɛrɛdɛ. 8Lii Yeesu Kristo waa kɛŋɔ o iro seo ta. Kooro Devid Naa on. Gɛ waa nɔɔ mɛɛ bol Amanesoma maa dɛ bagle nɛra la ta, 9dɛ koh a waa dɛɛ na wa, hale nɛra koh a waa dɛ do mɛ kwaa dɛ do mɛ dea kɛ wechɔg-ɛɛ. Kɛ Korowii waa te, nɛn aa won doa kwa. 10Anomanta n koh nɛra Korowii aa lee ba la waa dɛ lawɛ bambile wobɛlbwa ta, ásɛ Yeesu Kristo lɛ ba ge, dɛ berɛ tɛɛ ba jirima aa wola jaga dɔe bwa. 11Gɛ ba yon ŋɔ ɛ kasinteŋ. Ba ŋɔ, "Dɛ ya ne onee sewaa, ya ne wɛɛ berɔɔ ir dɛ dɔ mkpa. 12Dɛ ya lawɛ bambile wobɛlbwa ta naa, ya ne wɛɛ di koraa. Dɛ ya ŋɔ ya ne o laa aa, o gee ŋɔɔ o ne ya laa. 13Dɛ ya ta kasinteŋ tena ɛɛ yaa, o te ta ɛ kasinteŋ te, waa won begre o te." 14Dɛɛ lii nɛra gɛ waa nɔ, dɛ kah ba sibegra ne Korowii sie ŋɔ ba bɛ waa dɛɛ tɔŋle. Wetɔŋla ta tɔnɔ bɛlbwa dɔe. Nɛra liiree aa chɔg. 15Takapɔ kpɔ he te tɛ Korowii ásɛ he waa su o siwi kɛ nɛn waa dɛ ɛ o Korowii toma kɛrɛdɛ sihiih aa wola hen kpo, dɛ lawɛ kasinteŋ waa la bini kpoŋe kɛrɛdɛ. 16Laa he te kpɔ nɛra baa dɛ bol wobosale a ne Korowii waa aa wola kaa la nɛ, dɛkalkɛ gɛ waa nɔ gelɔ nɛra ɛɛ le Korowii habɔɔ dɛ kaa ɛ anɔ la aa wola chɛɛ. 17Ba webagla dɛ yɛɛ dɛɛ chɔg nɛra, gɛ ŋwɛrchɔge yon yɛ dɛ chɔg nɛn bwadabii la. Haemeneas ne Faeletɔs ja gɛ nɛra baa dɛ ɛ gɛ waa nɔ nɛ. 18Banee nyogre kasinteŋ waa la ŋwɛnɛ, dɛ kaa bagle nɛra ŋɔ seo ta ira tɔpere la garɔ, dɛɛ chɔg nɛra baa yarada Amanesoma la bane liire waa baa yaradaa la ta. 19Kɛ a ɛ wobɛlbwa Korowii Dea waa pa o mun la chegɔ kiŋkiŋ ken. Ba chwerɛ o ta ŋɔ, "Korowii jemɛ nɛra baa ɛ o kwa," dɛ berɛ chwerɛ ŋɔ, "Nomɛlbwa waa ŋɔa o ja Yeesu Kristo nɛra nɛɛ la chɛ kɛŋɔ o laa o te kpɔ wechɔga ta." 20Dem waa kana la, konsiwi beŋkpoŋ gbo laa lɔ o ta. Suugaswɛm ne suugapoŋ kwaa lɔ o ta. Ane lole, daa nee ba sɛah, dɛ kpɔ choh ma ane ge. Ane lole, wejena ta gboo baa le a ne, asɛ ane ge ba kpɔa dɛɛ ɛ wesale bɛlbwa. 21Anomanta dɛ nomɛlbwa laa o te kpɔ wedoŋa ne wechɔga bwa ta naa, naate la do kɛŋɔ kwaa baa dɛ le a ne wejena gbo ta la. O do kaih dɛ do le tɛ o Dɔɔ, dɛ dɔ tɔnɔ tɛo, dɛ che le kɛ ó kpɔɔ ɛ tondɛɛga te bwa. 22Laa he te kpɔ wedoŋa bonɔɔna aa dɛ pɛlɛ a ta la ta, ásɛ he ne nɛra baa dɛ soŋe Korowii tepoŋ ne la siwi swɛɛ wedɛɛga ɛɛ aa dɛ su Korowii siwi, Korowii yaradae, nɛnnyin, ne waa aa dɛ ba deŋnesɔɔhna ne la ta. 23Bɛ he te kpɔ dɛɛ jo gɛnewaa ne wesale tɔŋla ta. He gbabir jemɔ kɛ nagra nee aa ba. 24Nɛn waa ɛ ya Dɔɔ bonɔɔ ta chɛ kɛŋɔ o ne nɛn nagre. A chɛ kɛ o pwɛr o te tɛ nomɛlbwa, dɛ won nɛra kwaa bagla kɛrɛdɛ, dɛ nɛn jo o nɛ aa, o won lawɛ bambile, 25dɛɛ bagle nɛra o ne ba liire aa wola beŋkpoŋ ɛɛ la waa taa ne. Bɛl lole naa, Korowii ɛɛ na gɛ nɛra la sumii, dɛ gel ba charɛ ba liire, ásɛ ba won jemɛ kasinteŋ waa la, 26asɛ ba sie ba harɛ ba chwa le Bɔnsam bel waa lag ba dɛ gel baa ɛ o waa waa dɛ nyin la ta, asɛ dɛ dɔ ba te.

will be added

X\