2 Tsalonika 3

1Anɔ la aa kaa la, yabala, hé soŋe Korowii dɛɛ tɛ ya gba, ásɛ ya Dɔɔ waa la won perɛ kɛrɛdɛ dɛ won dɔ jirima, asɛ nɛra no kɛŋɔ gɛ he ge faa noa la. 2Hé soŋo o lɛ yaa dɛɛ le meesɔɔh tena ne nɛnchɔga be, dɛkalkɛŋɔ nomɛlbwa laa dɛ no waa yaa dɛ bol la dɛ yaradaa. 3Kɛ Korowii waa dɔ kasinteŋ la, wɛɛ geloo hɛɛ kpeg waa la ta teŋa ta dɛ lɛ heyaa le Bɔnsam nɔn ta o bɛ heyaa dɔ. 4Yaa dɛ yarada ya Dɔɔ la waa ya won dɛɛ yarada he ge kɛŋɔ he dɛ teŋɛ gɛ ya faa bagle heyaa la ta la, dɛ berɛ dɛɛ yarada heyaa kɛ hɛɛ kpoŋe gɛ ya faa bol he be laanee dɛɛ la. 5Yá Dɔɔ Yeesu Kristo cha heya ásɛ he won jemɛ nyina Korowii aa nyin heya, ne bambile Yeesu Kristo aa lawa o hɔhɔrɔwa la bini la. 6Yabala, ya chegɛ ya Dɔɔ Yeesu Kristo sɔn ta dɛɛ ŋɔ he be ŋɔ, he bini bɛlbwa dɛ ɛ bɔhwaah o ta sɛɛh dɛɛ ɛ toma gɛ yaa bagla la aa, hé gelo, he ne o bɛ pɛ. 7Ya faa lɔ he be la, dɛ ya ta bɔhwaahra ɛɛ. Anomanta hé jemɛ gɛ haa ɛ dɛ teŋɛ ya nɛ. 8Ya ta nomɛlbwa kondikwaa dii pɛɛpɛɛ. Ya ɛ toma chɔɔ ne jwaana, dɛɛ koh kɛrɛdɛ dɛ bɛ heyaa ha ya kondikwaa wa. 9Yaa ɛ gɛ nɔ, a ta ɛɛ kɛŋɔ ya ta ŋwɛnɛ dɔe kɛ ya lɛ gɛ kwaa nɔ le he be. Ya dɔ ŋwɛnɛ, kɛ ya ɛ gɛ dɛ́ kpɔ bagle heyaa ásɛ hɛɛ teŋɛ a ta. 10Waa yaa kpɔa tɛ heyaa gɛ saŋ ya faa lɔ he be bela laanee kɛŋɔ nomɛlbwa waa ŋɔa waa tomaa ɛ la ta chɛ kɛŋɔ o di kwa. 11Ya dɛ no he waa kɛŋɔ he bane ta sɛɛh dɛɛ ɛ toma, dɛ valɛ pɛɛpɛɛ dɛ kpɔ nyoa dɛɛ do nɛra waa ta. 12Ya chegɛ ya Dɔɔ Yeesu Kristo sɔn ta dɛɛ ŋɔ gɛ nɛra nɔ be ŋɔ bá do sie dɛɛ ɛ ba gbagba toma dɛɛ di ba koeh ta. 13Yabala, hé ɛ wedɛɛga dɛɛ la, dɛ bɛ ŋɔ he koɔh. 14Dɛ nomɛlbwa ta sɛɛh kɛ wɛɛ teŋɛ gɛ yaa ŋɔa tɔn nɔ bini nɔ taa yaa, hé nyiŋu kɛrɛdɛ. He ne o bɛ pɛ dɛɛ ɛ wobɛlbwa, ásɛ sihiih kpoo. 15N ta ŋɔe ŋɔ hé kpɔɔ berɛ he dɔm te, kɛ hé jao kɛrɛdɛ kɛŋɔ gɛ haa dɛ ja he nimanar. 16Ya Dɔɔ Yeesu Kristo la gbagba waa dɔ bambisɔn kɛrɛdɛ la, ó tɛ heyaa bambisɔn saŋ bɛlbwa, wobɛlbwa ta, dɛ ja he bwa nɛ. 17N Pɔɔl gbagbaa chwerɛ bonɔ nɔ. N dɛ na heya. Kenii n yon dɛɛ ɛ n tɔn bɛlbwa bini ásɛ he won jemɛ kɛŋɔ n tɔnee. 18Yá Dɔɔ Yeesu Kristo cha he bwa sekwaraa.

will be added

X\