2 Tsalonika 2

1Yabala, ya Dɔɔ Yeesu Kristo bala waa ne gɛ ya bwa aa dɛ ba o be chema la, n dɛ soŋe heya, 2hɛ́ɛ lii a waa kɛrɛdɛ. Maa nyin nomɛlbwa bol wetamaa ane asɛ he den ɔmɛ dɛɛ lii kɛŋɔ ya Dɔɔ balɔ kaa. Dɛ ba ŋɔ Korowii Domadɛɛge bag ba gɛ baa bol, kɛɛ dɛ he na tɔn bɛl o negre heyaa kɛŋɔ yanee chwerɔ waa, he bɛ no dɛ gel a ɛ heyaa waane. 3He bɛ gel nomɛlbwa negre heyaa ŋwɛnɛ bɛlbwa ta. Hé jemɛ kɛŋɔ waane ɛɛ ɛo mɔɔ asɛ tɔpere la ba. Gɛ saŋ nɛra aa ir dɛ warɛ pirim dɛ vɛh Korowii la ɛɛ bao, mɔɔ nɛn waa ɛ Kristo dɔm tenten Korowii bandia aa lɔ o nɛɛ kɛŋɔ ó chɔgo la le. 4Wɛɛ ɛ o tenee dɛ gwaa komɛlbwa nɛra aa dɛ toma dɛɛ yera ba dɔɔranar, hale wɛɛ kpɔ Korowii Dea berɛ sobɔr dɛ ŋɔ onee Korowii. 5Haa lii kɛŋɔ n faa lɔ he be la dɛ n dɛ bagle heyaa gɛ waa nɔ naa? 6Hé jemɛ kɛŋɔ komɛlee tɔɔ ŋwɛnɛ o le kahonɛ la, nemenɛ o saŋ tel. 7Wechɔga dɔɔ ba taraken, kɛ aa won dɔ bɔr kohona, nemenɛ kon la waa tɔa ŋwɛnɛ la le mɔɔ. 8Dɛ kon waa tɔa ŋwɛnɛ la baa le aa, belaa Wechɔga Te la ɛɛ ba bochaah lee nɛra jemɔ. Kɛ ya Dɔɔ Yeesu Kristo bala jirima ne o nyoa peu gbo kwara ɛɛ won kpoo bug ta. 9Gɛ saŋ waa ba mɔɔ Yeesu ba kpoo la, Bɔnsam ɛɛ do o nɛɛ dɛɛ chao kɛrɛdɛ o won dɔ kpegri kohona, dɛ won dɛɛ ɛ nyokpowaa ne wejena, dɛɛ negre nɛra kɛŋɔ Korowiirii tɛo kpegri ken, 10dɛɛ ɛ wechɔga bwa soosiwi aa lole, dɛ won dɛɛ negre nɛra baa nyogra dɛɛ ba chɔga la. Korowii ɛɛ chɔg baa, dɛkalkɛŋɔ ba vɛh kasinteŋ waa aa dɛ ba wona lɛɛ ba la, ba ta o waa nyine. 11Anomanta o gelɔ nyosone o nyoa aa kpega ɛɛ ba ba be dɛ ba tɔɔge ba sie, asɛ baa yarada waa aa ɛ nyosone, 12ásɛ o won pa nomɛlbwa waa wola sɛɛh dɛ teŋɛ o kasinteŋ waa la ta kɛ dɛɛ ɛ wechɔga o sie lɛ a ta la bolchɔge. 13Anomanta a chɛ kɛŋɔ ya jam Korowii saŋ bɛlbwa he wa, yabala. O dɛ nyin heyaa kɛrɛdɛ, dɛ le harɛ mumpar la bwa le heyaa kɛŋɔ wɛɛ lɛ heyaa. O Domadɛɛge aa gela he doŋa bwa le he nɛɛ la, ne gɛ haa no o kasinteŋ waa dɛ yaradaa la, a waa o lɛ heyaa la. 14Yanee fa bol Amanesoma la bagle heyaa he no la, asɛ Korowii che a ta le heyaa ásɛ he ne ya Dɔɔ Yeesu Kristo won pɛ dɔ jirima. 15Anomanta, yabala, hé lawɛ kiŋkiŋ dɛ teŋɛ waa la bwa yaa kpɔ nyoa dɛ bagle heya, ne anɔ la yaa chwera tɔn ta dɛ tɛ heyaa la ta. Hé gel a bwa do he nyu bini kɛrɛdɛ. 16Ya Dɔɔ Yeesu Kristo gbagba ne N Naa Korowii waa ɛ ya Mɛɛ dɛɛ nyin yaa kɛrɛdɛ dɛ sune ya nɛɛ dɛ cha yaa, dɛ tɛ yaa hwɛga aa wera ne gbemba aa wola tonɛ bwa la, 17bá tɛ heyaa gbemba dɛ gel he che kiŋkiŋ, asɛ dɛ won ɛ wedɛɛga te bɛlbwa, dɛ won dɛɛ bola ge.

will be added

X\