2 Tsalonika 1

1Men Pɔɔl ne Silvanos ne Timotii chwerɛ tɔn nɔ dɛɛ tɛ Yeesu asɔre tena baa lɔ Tɛsalonika dɛ ɛ N Naa Korowii waa bera ɛ ya Mɛɛ la ne ya Dɔɔ Yeesu Kristo nɛra la. 2Ń Naa Korowii ne ya Dɔɔ Yeesu Kristo cha heya, dɛ tɛ heyaa bosɔɔhna. 3Yabala, ya koh he waa dɛ yon dɛɛ jam Korowii. He chɛ gɛ, dɛkalkɛŋɔ he yarada haa dɛ yarada Korowii la dɛ kaa sie saŋ bɛlbwa. Nyina haa dɛ nyin dɔŋa la ge gba dɛ do kan ja. 4Ya gbagba dɛ bol he waa dɛɛ bagle asɔre tena baa cheme bobɛlbwa dɛɛ tomɛ Korowii la, dɛɛ kpɛɛ heya. Ya dɛ ŋɔ ba be gɛ nɛra aa dɛ ɛ heyaa hɔhɔrɔwa, aa no heyaa saŋ bɛlbwa, asɛ he dɔ bambile haa wola habɔɔ le dɛ ta teŋɛ dɛɛ yarada Yeesu la. 5He we-ɛɛla baglɔ kɛrɛdɛ kɛŋɔ Korowii bole waa pa heyaa la togrɔ. Haa koh o Kora waa dɛɛ na hɔhɔrɔwa nɔ, anee dɛ bagle kɛŋɔ he chɛ o Kora la ta jae. 6Kɛ nɛra baa dɛ ɛ heyaa hɔhɔrɔwa la te, Korowii ɛɛ bɔ ba a kemee. O we-ɛɛla togrɔ. Ó ɛɛ ba gɛ hɔhɔrɔwa la, 7dɛ gel he bwara sɔɔh heya. Ya ne he bwaa dɛɛ ba bosɔɔhna la dɔe gɛ saŋ ya Dɔɔ Yeesu Kristo aa forɛ le nyundua o ne o nyundua toroma baa dɛ di kpegri ne nii nɛɛ ba la. 8O balaa, wɛɛ bol nɛra baa wola Korowii jemɛ, baa wola Amanesoma aa dɛ bagle ya Dɔɔ Yeesu waa noɛ la waa, dɛ bɔ ba a kem, 9dɛ per ba le o be. Baa o kpegri aa gela o dɔ jirima laanee na kpa, asɛ o kpɔ hɔhɔrɔwa aa wola jaga dɔe bwa ta ba nɛ. 10Awola waa ba o tɔpejen la ta asɛ o nɛra tɛo duure la, nɛra baa yaradao la bwa ɛɛ nao dɛ kpɛɛro. He gba jao, dɛkalkɛŋɔ ya faa bagle heyaa o waa la, he noɔ dɛ teŋɛ a ta. 11Yeesu bala la waa ya yon dɛɛ soŋe Korowii dɛɛ tɛ heya, ásɛ o cha heyaa he soga bini won magre dɛ chɛ lee waa le heyaa dɛ tɛ o te la, dɛ tɛ heyaa kpegri he won ɛ wedɛɛga la bwa aa lɔ he bambile bini ne wobɛlbwa haa ŋɔ hé ɛ, yarada haa yaradao la nomanta. 12Ya dɛ soŋe Korowii gɛ ásɛ ya Dɔɔ Yeesu sɔn won dɔ jirima dɛ le he we-ɛɛla ta, asɛ he ge gba won dɔ jirima dɛ le o be. N Naa Korowii ne ya Dɔɔ Yeesu Kristo suna waa dɛ sune ya nɛɛ dɛɛ cha yaa la nomanta, a bwa won ɛ gɛ.

will be added

X\