2 Pita 3

1N dandɛɛga, tɔn nɔɔ n tɔn nɛɛte maa chwerɛ heya. N tɔne anɛ nɔ bwa bini la, n dɛ lii heyaa ásɛ he do wɔrɔbe waa nɔ ta, dɛ dɔ tepoŋ. 2N dɛ nyin kɛŋɔ he lii waa Korowii keamere la faa bola a saŋ la la, ne waa Yeesu toroma la faa ŋɔa ya Dɔɔ waa ɛ ya Lɛɛ la ŋɔ hé ɛ la. 3Anɔ la aa tɔ siee kɛŋɔ a chɛ kɛ he jemɛ kɛŋɔ tɔpera aa ka mun nɔ ta nɔ, nɛra ɛɛ dɛɛ mamɛ heyaa. Ba sie ɛɛ dɛɛ lɛ ba pɛlchɔga taa. 4Baa dɛɛ bɔɔ heyaa ŋɔ, "Korowii aa bagɛ nyoa ŋɔ Yeesu ɛɛ berɔɔ ba ja la, lee o dɔɔ?" Dɛ ŋɔ, "Ya mɛɛnanar bwa serewɔ, dɛ o ta balɛ mɔɔ. Gɛ harɛ nɔ aa doa o mumpar la, gɛɛ o ta do." 5Ba saahnɔ laa ba liire kpɔ gɛ Korowii faa kpɔ nyoa bol waa a saŋ la asɛ nyundua ne harɛ pa mun la ta. Nee nee Korowii ta harɛ, nee taa harɛ le. 6Nee Korowii gel o su bɔle harɛ bwa a saŋ la dɛ chɔgo. 7Gɛɛ Korowii ŋɔ nyundua kwaa bwa ne harɛ kwaa bwa aa lole taraken nɔ, á do le gɛ, ásɛ nii ɛrɛ ba fuah awola waa dɛ ba nɛra baa wola on tomɛ waa bola dɛ pa bole, dɛ chɔg ba la. 8N dandɛɛga, he jemɛ kɛŋɔ tɔpebeŋkpoŋ ne bene kagboŋ bwa beŋkpoŋ Korowii be. Beŋkpoŋii a bwa o te be. 9Bane dɛ lii kɛŋɔ Korowii bigri o nyobaga waa baga ŋɔ ya Dɔɔ Yeesu ɛɛ bao la chugra ta kohona to. Bambilee o dɔ tɛ heya, dɛkalkɛŋɔ waa nyin kɛ nomɛlbwa chɔg ta. O dɛ nyin kɛ nɛra bwa charɛ ba liire dɛ le ba wechɔga ta mɔɔ o ba. 10Ya Dɔɔ Yeesu bala tɔpere la, wɛɛ pigruu kɛŋɔ ŋwɛɛ bala a dɛ pigri la ken. Awola la, nyundua ɛɛ jigru kikikikikiki, dɛ nyogre nɛra siwi ta. Kwaa aa lɔ nyundua bwa ɛɛ fuuh dɛ mwɛɛ, asɛ harɛ ne kwaa aa lɔ o ta bwa fuh. 11Kwaa nɔ bwa aa dɛ ba fuih ken nɔ, dɛ ɛrɛɛ chɛ kɛ he doɔ? A chɛ kɛ he do goroŋ he soga bini, dɛ kpɔ he te tɛ Korowii, 12dɛɛ kpa Korowii tɔpere la nyundua aa fuh kwaraa asɛ harɛ ge komɛlbwa fuh dɛ mwɛɛ kwaraa la. Hé swɛɛ siwi ásɛ Korowii tɔpere la ba warane. 13Ya dɛ nyiŋi nyoa Korowii aa baga la ŋwɛnɛ. Anee kɛŋɔ wɛɛ ta nyundua onfale ne harɛfalee. Belaa wedɛɛga ɛɛ ba doe. 14Anomanta, n dandɛɛga, haa dɛ kpa awola tɔpere la la, hé swɛɛ siwi kɛŋɔ hɛɛ do goroŋee dɛ bɛ wechɔga bɛlbwa dɔ Korowii sie, asɛ he ne o baah do wer. 15Hé nyiŋi Korowii bambile waa lawa nɔ kɛŋɔ ŋwɛnɛɛ o tɛ heyaa kɛŋɔ he charɛ he liire ásɛ o lɛ heya. Anee ya dɔŋ Pɔɔl yaa dɛ nyin o waa la fa kpɔ o wejema Korowii aa tɛo la dɛ chwerɛ heyaa la. 16Pɔɔl dɛ bol a gɛ waa nɔ o tɔne bwa bini. Ane ta Pɔɔl tɔne waane mun noe kpegri taeh. Anomanta nɛra baa wola wobɛlbwa jemɛ baa wola chegɛ kiŋkiŋ la, ba dɛ berɛ waa la sie. Gɛɛ a gɛ nɛra nɔ ɛɛ bagle Korowii Tɔn bini waa la ane ge. Kɛ ba gbagba nyu taa ba ɛ dɛɛ dawɛ. 17Anomanta n dandɛɛga, haa dɔɔ na ken nɔ, hɛ́ɛ nyiŋi kɛrɛdɛ asɛ dɛ bɛ ba gel nɛra baa wola Korowii ɔmɛ ba negre heyaa he lɔ naa he yarada ta dɛ bɛ kiŋkiŋ ba che kpa. 18Hé swɛɛ siwi asɛ ya Dɔɔ waa ɛ ya Lɛɛ Yeesu Kristo suna waa sune he nɛɛ dɛɛ cha heyaa la ɛɛ ja kohona. Hé swɛɛ siwi dɛɛ dɔ wejema o waa ta kohona. Hé gel ya tɛo jirima taraken ne saŋ bɛlbwa. Aamen.

will be added

X\