2 Pita 2

1A saŋ la, nɛra bane teŋe nyosone ŋɔ Korowii keameree ban Israel tena bini. Gɛɛ nɛra ɛɛ ba bala dɛ ba teŋe nyosone ŋɔ ban dɛɛ chagle nɛra waa he bini. Baa dɛɛ chagle waa aa wola kasinteŋ ɛɛ, dɛ gel nɛra nyogre. Gɛ ba wechagle aa doa la, haa won jemɛ kɛŋɔ a ta kasinteŋ ɛɛ. Baa vɛh ba Dɔɔ waa bɔ ba wechɔga kem la waa, dɛ gel Korowii chɔg ba, ba sewɛ seopigri. 2Nɛndamanta ɛɛ teŋɛ ba wedoŋa baa dɛ ɛ la taa, asɛ a che a ta nɛra bol kasinteŋ ŋwɛnɛ wobochɔga kɛ waa were. 3Ba sibegra baa dɔa kohona nomanta, baa dɛɛ teŋe nyosonee ŋɔ waa baa chagle heya, dɛ negre heyaa dɛɛ di. Naate waa pa ba bolchɔge dɛɛ ba ba deŋne tɛra la kpɔ o te dɛɛ kpaa ba saŋ bɛlbwa. Waa dom chɔ. Wɛɛ ɛɛ ba posaposa kenii. 4Nyundua toroma ba faa ɛ wechɔga la, Korowii ta ban gelɛ. O kpɔ ba ta deŋne tɛra bɔr waa ɛ bɔluŋluŋ dɛ bir kpirikpiri la dɛ́ ka tel awola waa ba bol nɛra bwa waa dɛ pa bole la. 5O ta a saŋ la tena gelɛ. O gelɔ nee su tɔ nɛra baa wola on ɔmɛ la nɛ. Nɛra waa gel ba bwaa Nowa o faa dɛ chagle nɛra ŋɔ bá gel ba waa togre Korowii be la, ne nɛra banuanɛ. 6Sodom ne Gomoora tena faa dɛ ɛ wechɔga la, Korowii ŋɔ waa gel ba dwee ka, dɛ fuh ba ne ba bwɛɛre bwa dɛɛboo. Ba fuih chɔ le dɛɛ chagle waa aa ba chig nɛra baa wola Korowii ɔmɛ nɛ. 7Dɛ Lɔt te ɛ nɛn waa dɛ ɔmɛ Korowii bela, asɛ wedoŋa bwɛɛre la tena aa wola Korowii ɔmɛ dɛɛ ɛ la ɛɛ hao. O te, Korowii lɛo. 8Lɔt aa ɛ nɛndɛɛge o waa su Korowii siwi dɛ do ba baah la, dɛ ba wedoŋa waa dɛ na ne anɔ la waa dɛ no tɔpebii bwa la gelɔ o bambile ɛɛ weo. 9He nyiŋo na naa, dɛ Korowii te jemɛ gɛ waa dɛ lɛ nɛra baa dɛ ɔmɔ dɛɛ le Bɔnsam daahna ta, dɛ jemɛ gɛ waa dɛ tɛr wechɔg-ɛɛra deŋne dɛ ka tel awola waa ba bol nɛra bwa waa dɛ pa bole la. 10Nɛra ba sie aa begre ba bwadabii nɔ wechɔga aa suu nɔ pɛlchɔga ta, baa wola waa bu la, ba deŋnee Korowii ɛɛ ba tɛra kohona. A gɛ nɛra baa teŋe nyosone ŋɔ ba dɛ chagle waa nɔ, waa ba bambile aa lawaa baa ɛ. Ba bambile kpegri! Baa nyundua toroma bu. Wobochɔga kwaraa ba bol dɛɛ yag ba! 11Nyundua toroma kpegri dɛ dɔ jirima gwaa a gɛ nyosonteŋna nɔ, kɛ baa ban chɔgɛ dɛɛ tɛ Korowii sisa wobol ne. 12Nɛra nɔ te do kɛ kpɔg bini ola Korowii aa taa ŋɔ báa kpoa la ken. Baa liire kpɔe dɛɛ ɛ wa. Waa mun noe kpegri ba be naa, sisa wobolee ba bol dɛɛ yaga. Baa serewoo kɛŋɔ ola ken. 13Wahala baa gela nɛra ɛɛ na la, ba gee na a dɔŋaa. Waa ba sie aa dɛ lɛ a taa kɛŋɔ ba bodia waa baa dɛ ɛa bochaah la. He ne baa pɛa dɛɛ di kwaa nɔ, ba do kɛ doŋa dɛɛ chɔg he wer. Ba sɔɔh dɛɛ ɛ bodia waa he habɔɔ taeh. 14Ba na haah bɛlbwa naa, ba dɛ nyinu. Ba nyina baa dɛ nyin wechɔga ɛɛ ta dɔŋ dɔe. Ba negre nɛra baa wola chegɛ kiŋkiŋ Korowii waa ta dɛɛ kaa wechɔga ta. Ba sie dɛ begre kwaa taeh. Korowii taah ba! 15Ba gel ŋwɛnɛtogre la, dɛ nyogre. Ba kpɔ Beɔ bie Balam o faa ɛ Korowii keame la ŋwɛnɛ la. O sie aa begre suuga kohona nomanta, o kpɔ ŋwɛnɛchɔge ta dɛ nyin suuga. 16Korowii fa gelɔ keego bol waa o be dɛ kaoh o wechɔga la ta. Keego ge fe aa waa bol. Anomanta Korowii keame nɔ gel o chogla waa la. 17He dɛ hwɛgɛ ba nɛ aa, he hwɛga ta pɛɛ. Ba do kɛ nenabɔɔ nee aa wola toole o ta, dɛ do kɛ baama peu aa ir a ne aa kaa ken. Biro kpirikpirii Korowii kwaa cheg ba. 18Ba nyoa wobol kan taeh, kɛ nyosonee a bwa. Ba kpɔ bwadabii pɛlchɔga waa ne wedoŋa nɛra sie aa dɛ lɛ a ta dɛ negre nɛra dɛɛ kaa wechɔga ta. Nɛra baa pa mun dɛɛ le wechɔg-ɛɛra bini baa wola chegɛ kiŋkiŋ mɔɔ laanee ba negre dɛɛ kaa wechɔga ta. 19Ba yon ŋɔ baa geloo nɛra dɔ ba te, dɛ ba gbabir ɛ yoma. Ba wechɔga ɛɛ ba yoma, dɛkalkɛŋɔ wobɛlbwa aa wona lɛ nɛn liire la, a kpɔɔ berɛ yom. 20Nɛra jemɛ ya Dɔɔ waa ɛ ya Lɛɛ Yeesu Kristo waa la, dɛ won che a ta le waa aa dɛ la nɛn ne wechɔga ta harɛ bonɔ naa, a wer. Kɛ dɛ ba berɔ ba gel a gɛ wechɔga la dɔ bɔr vɔg ba ja aa, a te dɛ ba waa berɔ gbɔr dɛ gwaa mumpar la. 21Dɛ ba fe ta Korowii ŋwɛnɛtogre la waa noɛ ka aa, a fe bɔ ba nɛɛ dɛ gwaa kɛŋɔ baa jemɛ Korowii ŋwɛnɛ la dɛ vɛh waa o gbagba aa ŋɔa báa ɛ la ɛɛ. 22Ba waa nɔ gelɔ sɛgla baa sɛgla Korowii Tɔn bini la ɛ kasinteŋ. Ba sɛglɔ ŋɔ: "Nyoate ugaa, gɛɛ o berɛ dia," dɛ sɛgle ŋɔ, "He sɔ prakoo ne aa, wɛɛ berɔɔ ka gbili o kpechɛgre ta."

will be added

X\