2 Pita 1

1Men Seemɔn Pita maa ɛ Yeesu Kristo bonɔɔ dɛ ɛ o torome la, men chwerɛ tɔn nɔ dɛɛ tɛ he nɛra haa dɛ yarada Yeesu Kristo waa ɛ ya Korowii ne ya Lɛɛ la. O waa aa togra nomanta, o tɛ heyaa ya yarada waa wera nɔ dɔŋ. 2Kórowii che he jema haa jemɔ dɛ jemɛ ya Dɔɔ Yeesu la ta dɛ cha heyaa kohona dɛ tɛ heyaa bosɔɔhna. 3Yeesu dɔ Korowii kpegri la dɔŋ. Anee o kpɔ cha yaa, asɛ ya dɔ komɛlbwa yaa hiah dɛ won do le dɛɛ ɛ wedɛɛga. Yaa jemɛ Korowii waa le yaa ásɛ ya won dɔ o jirima ne o dadɛɛge la waa o ɛ gɛ. 4Waa ɛ gɛ nɔ, o cha yaa ŋwɛnɛdɛɛga kohona ta, aa wola dɔŋ dɔe. O bagɛ yaa nyoa a wa. Hɛ́ɛ che a taa dɛ le pɛlchɔga aa lɔ harɛ nɔ ta dɛɛ chɔg nɛra la nyoa, asɛ dɛ do gɛ Korowii aa doa la. 5A gɛ waa nɔ wesoo nomanta la, hé takapɔ dɛɛ ɛ wedɛɛga dɛɛ ja he Yeesu waa yaradae ta, dɛ kpɔ wejema dɛ ja he wedɛɛga ɛɛ ta, 6dɛ won dɛɛ lawɛ he te dɛɛ ja he wejema ta. Hɛ́ɛ lawɛ bambile dɛɛ ja he te lawa ta, dɛ kpɔ Korowii ɔma dɛɛ ja he bambile lawa ta. 7Hɛ́ɛ nyin dɔŋa dɛɛ ja he Korowii ɔma ta, dɛɛ nyin nɛn dɛɛ ja he dɔŋa nyina ta. 8Da waa wera tɛ heyaa la. He wono dɔ a gɛ da nɔ kɛrɛdɛ naa, aa geloo jema haa jemɛ ya Dɔɔ Yeesu Kristo la dɔ tɔnɔ dɛ su siwi. 9Kɛ nomɛlbwa waa wola a gɛ da nɔ dɔe la, o liire do toŋgboŋ ken. Waa waa nyiŋe dɛɛ la sie. A gɛ te la soɔh kɛŋɔ Korowii laa o wechɔga o fa dɛ ɛ la fee o nɛ. 10Anomanta yabalawa, Korowii aa le heyaa tɛ o te nɔ, hé takapɔ kɛŋɔ hɛɛ geloo he we-ɛɛla bagle kɛŋɔ Korowii nɛra waa lee ba la banee heya. He dɛ ɛ gɛ naa, haa naa lɔ Yeesu Kristo waa nɔ yaradae ta bwa. 11He dɛ ɛ ken nɔ naa, Korowii ɛɛ tɛ heyaa ŋwɛnɛ kohonaa, asɛ he ja ya Dɔɔ waa ɛ ya Lɛɛ Yeesu Kristo Kora waa wola jaga dɔe la ta. 12Kasinteŋ waa la haa noa la, he dɔɔ jema kɛrɛdɛ dɛ che a ta kiŋkiŋ. Kɛ mɛɛ dɛɛ lii heyaa a waa saŋ bɛlbwaa. 13N dɛ lii kɛŋɔ maa wola sewɛ mɔɔ nɔ, a chɛ kɛ mɛɛ lii heyaa hé do wɔrɔbe waa nɔ ta. 14N jemɔ kɛŋɔ aa bigri n wur n harɛ nɔ ta bwadabii nɔ ta. Ya Dɔɔ Yeesu Kristo gelɔ n jemɛ gɛ waa nɔ. 15Mɛɛ takapɔɔ dɛ ɛ gɛ bwa maa won ɛ, asɛ dɛ n ba toole kwaraa naa, he won dɛɛ lii waa nɔ saŋ bɛlbwa. 16Ya Dɔɔ Yeesu Kristo kpegri waa dɔa ne o bala waa la yaa bol he be la, a ta waa yaa kpɔ liire dɛ teŋe nyosone ɛɛ. Ya gbagba kpɔ sie na gɛ o wa aa dɔ nyɛl kohona. 17O Mɛɛ Korowii gbagba aa tɛo duure ne jirima la, dɛ ya lɔ bela. Taa bɛl le o Mɛɛ Korowii waa dɔ jirima kohona la be kɛŋɔ, "N gbagba Bie maa dɛ nyinu o wa ɛɛ su n siwii nɔ." 18Taa la aa le Korowii doa ba la, ya noɔ. Dɛ ya ne Yeesu lɔ bwe la Korowii aa gela o do goroŋ la ta. 19Anɔ gelɔ ya jemɛ kpelakpela kɛŋɔ waa Korowii keamere la aa bola la ɛ kasinteŋ. A chɛ ke he cheg deŋne dɛɛ noa. Ba waa baa bola la do kɛ kandea waa dɛ chaah biro ta ka tel kɛŋɔ tɔ aa pera. Korowii Keamere Tɔne la ɛɛ chaah heyaa bɔree, asɛ Korowii gel he liire chaah gɛ chɔmbibi wewee aa dɛ chaah bɔr la. 20Hé jemɛ kɛrɛdɛ kɛŋɔ waa ba faa chwera Korowii Keamere Tɔne bini la, a bɛlbwa toole dɛ ɛ nɛwɛnyini nyu bini liire. 21Akai! Baa chwera la, ba gbagba liire ne laa ba chwera. Korowii Domadɛɛgee ir Korowii nɛra nɛ, asɛ baa bol waa Korowii aa kpɔa do ba nyoa.

will be added

X\