2 Jn 1

1Men Nomoa Jɔnee chwerɛ tɔn nɔ dɛɛ tɛ haah la Korowii aa kpɔɔ cheg dɛ tɛ o te la, ne o bii maa koh beŋkpoŋ ya bwa aa ɛa Korowii kasinteŋ waa la ta dɛɛ nyin ba la. N gbo laa dɛɛ nyin ba gɛ. Nɛra baa jemɛ Korowii kasinteŋ waa la bwa ge jao, 2dɛkalkɛŋɔ kasinteŋ la lɔ ya bwa bambile bini. Wɛɛ do lee dɛɛ la saŋ bɛlbwa. 3Ń Naa Korowii ne o Bie Yeesu Kristo sune ya bwa sekwara nɛ, dɛ cha yaa, dɛ tɛ yaa bosɔɔhna yá won jemɛ kasinteŋ la dɛ dɔ nɛnnyin. 4N sie lɛo kohona kɛ maa na he bii la bane kɛ ba teŋɛ kasinteŋ waa la ta gɛ ya Mɛɛ waa lɔ nyundua la aa ŋɔa yáa ɛ la. 5Kɛ n bidɛɛge, taraken n dɛ soŋe, dɛɛ teŋɛ waa Korowii aa bola bil la ta. Wefala laa. Dɛ́ hɛ́ɛ nyin dɔŋa. 6Dɛ ya dɛ nyin dɔŋa aa, dɛ ya dɛ teŋɛ o waa la ta. O waa laanee kɛŋɔ dɔŋa nyina, gɛ haa noa logla la. Anomanta hɛ́ɛ ɛ he wobɛlbwa dɔŋa nyina ta. 7Nyosonteŋna tenten balɔ taraken. Banee wola yarada kɛŋɔ Yeesu Kristo ba harɛ nɔ ta kɛŋɔ nɛwɛnyini la. Nomɛlbwa waa wola gɛ yarada la, o ɛ nyosonteŋni dɛ ɛ Yeesu Kristo dɔm. 8Hɛ́ɛ nyiŋi he te kɛrɛdɛ dɛ bɛ gel he toma ɛ pɛɛ, ásɛ he won dɔ he tɔnɔ bwa dɛ le a ta. 9Nomɛlbwa waa dɛ bagle Yeesu Kristo waa la dɛ kpɔ o gbabir nyu bini liire dɛɛ ja la, amɔ dɛ Korowii ta naate nɛɛ teŋɛ. Nomɛlbwa waa jemɛ Yeesu Kristo webagla la dɛɛ bagla gɛ aa doa la, dɛ Korowii ne o Bie la teŋɛ o nɛɛ kɛrɛdɛ. 10Dɛ nomɛlbwa ba he be dɛ baa bagle heyaa anɔ la aa wola Yeesu Kristo waa la ane ɛɛ yaa, he bɛ naate lɛ so he be, he bɛ o sie kwara lɛ. 11Nomɛlbwa waa lɛ gɛ te la sie la, o ge gba ja naate wechɔga la ta. 12N dɔ waa taeh dɛ́ bol he be, kɛ maa chwerɛ do tɔn ta. N dɛ nyin kɛ n ba he be ya sie ɛ anɛ asɛ n bol he be. Belaa ya sie ɛɛ ba lɛɛ kohona. 13He nime la Korowii aa kpɔɔ cheg tɛ o te la, o bii dɛ na heyaa kohona.

will be added

X\