2 Krent 8

1Yabalawa, ya dɛ nyin he jemɛ gɛ Korowii aa sune Makidoonia asɔre tena nɛɛ dɛ cha ba ba dɔ bonya kohona. 2Ba na wahala kɛrɛdɛ. A lole kɛ nyaaraa ban kohona, kɛ ba sie aa lɛ Yeesu lɛɛ waa lɛɛ ba la ta kohona nomanta, ba wono ta suuga kohona ásɛ ba kpɔ cha nɛra. 3Mɛɛ wonoo ŋɔ ba ta tea tɛ yaa kwaa gɛ ba bokpega aa tela, hale ba tɛo gwaa ba bokpega del kwara. Ba gbagba tetooraa ba ɛ gɛ, nɛn laa do ba. 4Ba gbagbaa soŋe yaa sibegra ne ŋɔ yá gel ba ja nɛra baa dɛ cha Korowii nɛra la nɛ. 5Ba ɛ waa dɛ gwaa gɛ ya te fe aa dɛ lii. Ba tɔ sie kpɔ ba te do N Naa Korowii nɔn ta, mɔɔ dɛ kpɔ ba te do ya ge nɔn ta gɛ Korowii aa dɛ nyin. 6Anomanta ya ŋɔ Taetos be ŋɔ tondɛɛga nɔ soo waa pa a mun la, ó den ba choŋi a ta, asɛ dɛ cha heyaa he ɛ wedɛɛga haa dɛ ɛ kwaa kɛɛ bɔr la ka tonɛ. 7He dɛ ɛ waa Yeesu waa bwa ta, yarada ta, waa bola ta, wejema ta, ne nyina haa dɛ nyin nɛra chae ta, ne nyina haa dɛ nyin yaa la ta. Anomanta ya dɛ nyin kɛ hɛɛ ɛ waa kwaa kɛɛ ge ta. 8N ta bolɛ dɛɛ bil a ɛ lao kɛŋɔ hɛ́ɛ kɛ. N dɛ nyin n jemɛ kɛŋɔ he nɛnnyin la ɛ nɛnnyin kasinteŋ. A waa n bagle gɛ bane siwi aa swɛɛ kwaa kɛɛ ta la. 9Kɛ he na gɛ ya Dɔɔ Yeesu Kristo aa sune ya nɛɛ dɛ cha yaa kenɛ? He nao kɛŋɔ o fa dɔ kwaa nɔ bwa, dɛ koh he waa dɛ berɛ nya, asɛ a che o nyae ta he berɛ dɔɔhna. 10Gɛ n te aa naa kɛŋɔ hé den tonɛ waa haa pa a mun bena ken la. Heyaa tɔ sie dɛ bagle kɛŋɔ he dɛ nyin nɛra chae. 11Hé swɛɛ siwi dɛ tonɛ warane. Hé swɛɛ siwi dɛ tonɔ gɛ haa vɔrɔwa la. Hé tɛ anɔ la haa dɔa. 12Dɛ he bambile lawɔ kɛ hɛɛ tɛ suugaa yaa, gɛ bwa haa dɔa dɛ́ tɛ la, aa su Korowii siwii. Waa ŋɔ hé tɛ gwaa gɛ haa dɔa. 13Koeh laa n laa dɛɛ kpɔ bane nɛɛ dɛ kpɔ baa dawɛ he nɛ. Haa dɔa kohona taraken nɔ, a wer kɛŋɔ he cha banɔ la aa kpega tɛɛ ba. He ɛ gɛ naa, a baa do kpegri tɛ heyaa asɛ ba ge dɔ aa, baa cha heyaa. Dɛ he bwa kɛrɛdɛ. 15Anee ba chwerɛ Korowii Tɔn bini la: "Naate waa pa kondikwaa kohona la, kondikwaa ta o nɛɛ gwaalɛ. Naate waa wola kondikwaa pae kohona la, o ta kondikwaa nyae." 16Ya dɛ jam Korowii kohona kɛŋɔ waa gela Taetos siwi swɛɛ wɛɛ cha heyaa kɛŋɔ ya siwi aa swɛɛ he nɛɛ la. 17Waa yaa ŋɔa Táetos ɛ la, o sɛoh ŋɔ wɛɛ ɛo. Dɛ o siwi swɛɛrɔ kɛŋɔ o cha heya, anomanta o tetooraa o ba he be la. 18Ya dɔŋ la asɔre tena bwa aa dɛ kpɛɛro Amanesoma la bola ta la, o ne Taetosee yaa tomɛ he be la. 19A gbo laa, asɔre tena la bwaa leo ŋɔ ó ja ya nɛɛ ya kpɔ koŋkɛɛla nɔ kaa Jerusalam gɛ aa ɛ asɛ ya Dɔɔ Yeesu dɔ sɔn. Ya dɛ ɛ toma nɔ dɛ́ kpɔ dɛɛ bagle kɛŋɔ ya dɛ nyin Korowii nɛra chae. 20Ya dɛ nyiŋi kɛrɛdɛ asɛ nomɛlbwa bɛ waane ba dɔ bol dɛ le gɛ yaa dɛ nyiŋi koŋkɛɛla damanta nɔ ta. 21Waa aa swɛɛ ya siwi kɛŋɔ yaa ɛ laanee waa aa togra. Waa aa togra Korowii be gbo laa yaa ba ɛɛ. Yaa ɛ waa aa tograa nɛwɛnyini ge be. 22A waa ya tomɛ ya dɔŋ ŋɔ ó ne ba ba la. Ya daahno na kera aŋwɛnɛ bwa, dɛ na kɛŋɔ saŋ bɛlbwa la, o siwi swɛɛrɔ kɛŋɔ o cha toma nɔ. Taraken te kwaraa la, o siwi begrɔ kɛŋɔ ó cha heyaa kohona, dɛkalkɛŋɔ o dɛ yarada heyaa kohona. 23Taetos te la, n ne onee dɛɛ ɛ toma nɔ dɛɛ cha heya. Yabala baa ja o nɛɛ la ge la, asɔre tenaa lee ba. Ba nɛɛ Yeesu Kristo che dɔ sɔn. 24Anomanta hé gel ba na gɛ haa dɛ nyin nɛn ásɛ asɔre tena bwa no, dɛ jemɛ kɛŋɔ yaa koh he waa dɛɛ maŋkura ya te la, pɛɛ laa.

will be added

X\