2 Krent 5

1Ya harɛ nɔ ta bwadabii nɔ do kɛ pata ya do o ta. Ya jemɔ kɛ dɛ o chɔgaa, Korowii ɛɛ tɛ yaa defale o gbagba aa doa waa wola chɔg bwa nyunduaa. 2Ya bwadabii nɔ te pe yaa. Ya sie chegɛ chiŋ yaa hime, dɛɛ nyin kɛŋɔ Korowii kpɔ ya Korowii doa bwadabii la do yaa, 3asɛ ya bɛ bwadabii nya. 4Ya taa lɔ ya bwadabii aa do kɛ patare ta nɔ, ya bwara dɛ nyɛg, yaa hime. Ya bwadabii nɔ kpɔe dɛ le ya nɛɛ waa laa dena swɛɛ ya siwi. Ya Korowii doa bwadabii la doe waa swɛɛ ya siwi kohona, ásɛ o chig bwadabii waa won sewa nɔ naa ta ya dɔ mkpa. 5Korowiirii cheg gɛ waa nɔ tɛ yaa, dɛ kpɔ o Domadɛɛge tɛ yaa a bagle kɛŋɔ wɛɛ ba tɛ yaa o mkpa laanee. 6Anomanta ya bwara aa yaa hwah bwa. Ya jemɔ kɛ ya lɔ ya bwadabii nɔ bini naa, ya toole ya Dɔɔ be, 7dɛkalkɛŋɔ waa yaa dɛ na la ne laa ya so. Waa yaa dɛ yarada a waa la nee ya so. 8Ya bwara aa yaa hwah tamaa bɛlbwa. Dɛ ya gel ya bwadabii nɔ waa do kɛ dea nɔ dɛ ka do ya Dɔɔ be naa, gɛɛ yaa nyin. 9Anomanta, ya bwadabii nɔ binii ya do oo, ya Dɔɔ bee ya do oo, ya dɛ nyin ya waa bwa won su o siwi, 10dɛkalkɛŋɔ ya bwa ɛɛ ba che Yeesu Kristo sie o bol ya waa dɛ pa bole, ásɛ bɛlbwa dɔ waa o faa lɔ mkpa ta dɛɛ ɛ la kembɔr. Dɛ bɛlbwa we-ɛɛla wer oo, aa were oo, wɛɛ dɔ a kembɔree. 11Yaa jemɛ gɛ Korowii aa do ɔma la waa ya bol waa dɛɛ bagle nɛra ásɛ ba jemɛ kasinteŋ la la. Korowii jemɛ ya bambile bini bwa. N dɛ lii kɛŋɔ he ge jemɛ ya nɛnsoore he bambile bini. 12Anɔ dɛ bagle kɛ kpɛɛraa ya kpɛɛ ya te dɛɛ bagle heyaa ja kɛɛ? Akai! Ya dɛ nyin ya bagle heyaa waa ásɛ he che a ta dɛ won dɛɛ maŋkura yaa nɛra baa dɛ chɔg yaa la be. Waa nɛwɛnyina aa dɛ naa laanee baa maŋkura. Baa nɛn bambile bini waa nyiŋi. 13Dɛ ya nyu toole naa, Korowii waa a ba gɛ. Ya sie chɔ harɛ ge aa, he wesomee a ba gɛ. 14Yeesu Kristo nyina waa dɛ nyin yaa laanee dɛɛ do yaa ya we-ɛɛla bwa ta. Gɛ yaa naa laanee kɛŋɔ dɛ nɛmbeŋkpoŋ lɛ nɛra bwa seo sewaa, a kaa chaa kɛ nɛra la bwa sewɔ. 15O sewɔ tɛ nɛra bwa. Anomanta nɛra baa soge le la ta chɛ kɛ ba so ba gbagba soga kpa. Bá so tɛ naate waa sewa tɛɛ ba asɛ Korowii iru seo ta la. 16Anomanta, fini habɔɔ, yaa nɛra nyiŋi gɛ nɛwɛnyina aa dɛ nyiŋ ba la. Ya fa dɛ nyiŋi Yeesu Kristo gba gɛ, kɛ yaa on gɛ nyiŋi kpa. 17Nomɛlbwa o ne Yeesu Kristo aa pɛa la, o berɛ nɛnfale. O gel o webena o faa dɛ ɛ la, dɛ charɛ dafale. 18Korowiirii ɛ a bwa. Yeesu Kristo nɛɛ o che dɛ kwaa ya ne o baah ya ne o pɛ, dɛ tɛ yaa toma nɔ ŋɔ yá nyin nɛra dɛɛ tɛo ásɛ ba ne o baah kwaa bá won pɛ. 19Korowii chegɛ Yeesu Kristo nɛɛ dɛ kwaa o ne nɛwɛnyina baah dɛ lag ba dɛɛ pɛl o te, waa wola ba wechɔga nyiŋe. Yanee o kpɔ o waa tɛ ŋɔ yá bagle gɛ waa kwaa o ne ba baah dɛ lag ba ásɛ o ne ba pɛ. 20Taraken nɔ, Yeesu Kristoo tomɛ yaa ŋɔ yá bol waa dɛɛ tɛo la. A kaa ɛ kɛŋɔ Korowiirii chegɛ ya nɛɛ dɛɛ bol waa nɛra be la. Ya chegɛ Yeesu Kristo naa ta dɛɛ soŋe heyaa kɛŋɔ hé gel he ne Korowii baah kwaa he pɛ. 21Dɛ wechɔga bɛlbwa toole Yeesu Kristo nɛ, kɛ ya kɛrɛdɛ nomanta, Korowii gelɔ o lɛ ya wechɔga che, asɛ dɛ ya ne o pɛo waa, ya waa won su Korowii siwi o lɛ yaa kɛ nɛndɛɛgaa yan.

will be added

X\