2 Krent 4

1Korowiirii sune ya nɛɛ dɛ tɛ yaa toma nɔ, anomanta ya bwara aa yaa hwah. 2Ya gel waa baa ɛa dɛɛ sɔh ne sihihwaa bɛlbwa. Yaa nɛra negre, yaa Korowii waa yaa dɛ bagle la sie berɛ. Kasinteŋ torodoo yaa di Korowii sie. A taa ya che dɛ gel nɛra ɛɛ jemɛ ya da. 3Yeesu Kristo Amanesoma nɔ yaa dɛ bol nɔ, dɛ a sɔɔh kwaraa naa, dɛ nɛra baa dɛ nyogre la bee a sɔh. 4Bɔnsam baa dɛ maŋkurao harɛ nɔ ta kɛŋɔ Korowii la, o chɔg nɛra baa wola Yeesu yarada la liire. Waa nyin kɛŋɔ Amanesoma nii aa le Yeesu Kristo o wa aa dɔ jirima kohona be la chaah ba. Yeesu do gɛ Korowii aa doa. 5Ya gbagba waa laa yaa bagle nɛra nɔ. Yeesu Kristo waa yaa bagle kɛŋɔ onee komɛlbwa Dɔɔ, dɛɛ bagle kɛŋɔ o nomanta, he bonɔɔnaa yan. 6Korowii waa pere bochaah le biro ta, dɛ gel bɔr chaah la, onee gela o nii chaah ya bambile ne ya sie, asɛ ya won jemɛ gɛ o jirima yaa naa Yeesu be la aa doa. 7Waa nɔ bwa yaa jema nɔ do kɛŋɔ baa kpɔ kondɛɛga do viine bini la. Yanee viine la. Yaa kpege, kɛ Korowii kpɔ o toma tɛ yaa asɛ yaa ɛ. O ɛ gɛ dɛ́ won bagle kɛŋɔ kpegri aa gwaa kpegri bwa la le o be. Ya be laa a le. 8Nɛra dɛ ha yaa kohona, kɛ baa ya nɛɛ pɔ. Waa dɛ hiah yaa ya nyiŋi gɛ yaa ɛ kahonɛ, kɛ ya bwara aa yɔr, yaa gel. 9Nɛra chegɛ ya nɛ, kɛ Korowii te ta ya habɔɔ leɛ. Ba go yaa bil te, kɛ ba ta wone kpo yaa. 10Wenaale nɔ yaa dɛ na nɔ dɛ bagle kɛ ya sɛoh kɛ yaa sewɛ Yeesu seo la dɔŋee, ásɛ nɛra na dɛ jemɛ kɛ ya dɔ o mkpa la. 11Yaa soge le nɔ, Yeesu nomanta saŋ bɛlbwaa ya so seo nyoa, ásɛ nɛra na o mkpa ya bwadabii waa won sewa nɔ aa dɔa. 12Anomanta a kaa ɛ kɛ ya te dɛ sewɛ, asɛ he te ɛɛ dɔ mkpa dɛ le ya seo la ta. 13Ba chwerɔ do Korowii Tɔn bini ŋɔ, "Maa yaradaa waa n bol." Gɛɛ ya gee yarada. Yaa yaradaa waa yaa bol. 14Ya jemɔ kɛŋɔ Korowii waa ir ya Dɔɔ Yeesu seo ta la, onee dɛɛ ba ya banɔ la ya ne Yeesu aa pɛa la seo ta ira, dɛ kpɔ ya ne heyaa kaa o be. 15He waa Korowii ɛ anɔ bwa. Waraa nɛra Korowii aa na ba sum den na dɛɛ warɛ. Baa kpɔ jam kohonaa tɛ Korowii ásɛ o dɔ jirima. 16Ken nɔ nomanta, bɔhwaah aa yaa lawɛ. Tɔ aa dɛ per nɔ bwaa ya bwadabii gwɛgre dɛɛ la. Kɛ ya bini te la, kpegrii ya yarada do dɛɛ la. 17Wahala tama nɔ yaa dɛ na tɔpera anɛ bɛl nɔ ɛɛ geloo ya dɔ jirima aa wola jaga dɔe, asɛ a gwaa wahala nɔ kwaraa ken. 18Kwaa baa dɛ naa siwi ne la ta laa ya te sie dawɛ. Anɔ la baa wola an na la taa ya sie dawɛ. Kwaa baa dɛ naa la te, tɔpera anɛ bɛlee aa di. Asɛ anɔ la baa wola an na ge la, a ta jaga dɔe bwa.

will be added

X\