2 Krent 3

1Yaa dɛ ŋɔ ken nɔ, kpɛɛraa yaa kpɛɛ ya te ja kɛɛ? A hiaoh kɛŋɔ ya kpoŋe tɔne aa bagle ya nɛnsoo ne gɛ ya toma aa doa mɔɔ he lɛ yaa aa? Kɛɛ a hiaoh kɛ ya dɔ ane le he be asɛ nɛra won yarada yaa aa? 2He gbagbaa ya tɔn waa dɛ bagle tondɛɛga yaa ɛa. Ya bambile taa Korowii chwerɛ, asɛ nomɛlbwa na heyaa dɛɛ pese heyaa kɛŋɔ nɛn aa dɛ kure tɔn la. 3He we-ɛɛla dɛ bagle kɛŋɔ he ɛ Yeesu Kristo tɔn waa chegɛ ya nɛɛ dɛ chwerɛ. Iŋki ne laa o chwerɔ, Korowii waa lole saŋ bɛlbwa la Domadɛɛgee o kpɔ chwerɔ. Bwe ta laa o chwerɔ, bambile taa o chwerɔ. 4Ya won gɛ bola, dɛkalkɛŋɔ ya chegɛ Yeesu Kristo nɛɛ dɛɛ yarada Korowii a gɛ waa nɔ ta. 5A ta ɛɛ kɛŋɔ ya dɛ lii kɛŋɔ ya won waane ɛɛ ya gbagba kpegri ta. Korowii bee ya dɔ kpegri dɛɛ ɛ anɔ la bwa yaa dɛ ɛ. 6Korowii gelɔ ya won dɛɛ ɛ o fɔofale la toma. A gɛ fɔofale nɔ ta mmara baa chwera waa ɛɛ, Korowii Domadɛɛge waa. Mmara baa chwera la dɛ ba seo ne, kɛ Korowii Domadɛɛge la te dɛ ba mkpa ne. 7Bwe taa Korowii faa chwerɛ Mosis Mmara la dawɛ. Bela Korowii aa kpɔ Mmara la tɛ Mosis la, Korowii jirima ba bela, bela bwa chaah, dɛ chaah Mosis nɛɛ o sie bɔr ɛɛ nyɛgle. Mosis aa la Israel tena be la, dɛ nyɛgla o sie bɔr aa dɛ nyɛgle la nyoa sɔɔhnɔ tonɛ. Kɛ Israel tena aa nao la, ba ŋɔ o sie bɔr dɛ nyɛgle kohona to, ba ta wone nyiŋu. Mosis Mmara kwara waa dɛ la nɛn ne seo ta la wono ba jirima nɔ dɔŋ ne naa, 8dɛ ɛrɛɛ Korowii Domadɛɛge la wa ɛɛ ba doe yɔ? Aa gɛɛ gwaa laa? 9Waa aa gela nɛra ɛɛ di bolchɔge Korowii sie la dɔ jirima ken aa, dɛ anɔ la aa gela nɛra ɛ nɛndɛɛga ba wa ɛɛ su o siwi la, ɛrɛɛ a jirima ɛɛ ba doe yɔ? 10Waa a faa dɔ jirima kohona la, taraken a ta jirima dɔe kpa, dɛkalkɛŋɔ anfala jirima tɔɔge a nɛ. 11Waa aa ɛa tɔpera anɛ dɛ tonɛ la, dɛ a dɔ jirima aa, dɛ anɔ la aa wola jaga dɔe bwa la, a jirima ta gwaalaa? 12Ya dɔ hwɛga gɛ waa nɔ ta, anomanta yaa ɔmɛ. 13Ya ta do kɛ Mosis o faa wola nyin kɛ Israel tena na kɛŋɔ o sie bɔr nyɛgla nyoa dɛ sɔɔh, dɛ koh a waa kpɔ yachaahne tɔ sie la. 14Israel tena faa waa la mun no. Taraken gba, gɛɛ ba ta do. Baa dɛ kure fɔobene la waa la, a ta do kɛ baa kpɔ yachaahne tɔ ba sie. Ba ta Yeesu Kristo waa lɛɛ yaa, yachaahne la aa ba sie lee ba. 15Hale fini gba, saŋ bɛlbwa ba dɛ kure Mosis Mmara Tɔn aa, a ta do kɛ yachaahne aa tɔ ba liire, dɛ gel baa a mun no. 16Kɛ, saŋ bɛlbwa nɛwɛnyini aa charɛ o liire dɛ berɛ ba Yeesu be la, yachaahne la ɛɛ leo. 17Ya Dɔɔ Yeesuu Domadɛɛge la. Bobɛlbwa ge o Domadɛɛge la aa lole la, nomɛlbwa dɔ o te, o toole Mmara lɔga. 18Anomanta, komɛlbwa ta ya te sie tɔe. Ya Dɔɔ Yeesu jirima chaah ya nɛ, dɛɛ begre yaa asɛ yaa do gɛ waa doa, jirima yaa dɔa la ɛɛ ja. Ya Dɔɔ Yeesu waa ɛ Domadɛɛge la bee a bwa le.

will be added

X\