2 Krent 2

1Anomanta, n ɛ n liire kɛŋɔ maa he bee ba asɛ dɛ ba gel he tea bini chɔg kpa. 2N gelɔ he tea bini chɔg aa, umee dɛ lar mɛ bwara jaɔ? Nɛn toole, nemenɛ he tenten maa chɔg he tea bini la. 3A waa n chwerɛ heyaa tɔn la la. Dɛ maa nyin kɛ he nɛra haa chɛ kɛ he gel n sie lɛ la, n ba he be asɛ he berɛ ba ɛɛ mɛ tebinichɔg wa, dɛkalkɛŋɔ n jemɛ he bwa waa kɛ n silɛɛ he silɛɛ. 4Tɔn la n faa chwerɛ heyaa la, dɛ a dɛ we n nɛɛ taeh, asɛ n tea bini chɔg mɛɛ wi siniire dɛɛ chwerɔ. N fa ta on chwerɛ dɛ́ gel he tea bini chɔg, kɛ n chwerɔ ásɛ he na gɛ del maa dɛ nyin he bwa. 5Nɛn o faa ba tebinichɔg ne la, n gbo tea bini laa o chɔg. He bwa tea binii o chɔg ŋwɛnɛ bɛl ta. Maa nyin kɛ n do naate siswɛm, a waa n bola ken la. 6Gɛ he kɛrɛdɛ nyoa aa pɛa he tɛr naate deŋne nɔ, a magrɔ. He bɛ ane ɛ ja kpa. 7A chɛ kɛ he kpɔ o wechɔga kɛo name, dɛɛ doo gbemba. Gɛ laa, o tea bini chɔgɔ kohona aa, wɛɛ horɔɔ. 8Anomanta, n dɛ soŋe heyaa kɛŋɔ he gel o jemɛ kɛŋɔ he dɛ nyinu kohona. 9Maa dɛ nyin kɛŋɔ n ɛ heyaa dɛ na kɛŋɔ hɛɛ no n waa ta wobɛlbwa taa kɛɛ haa no la, a waa n chwerɛ heyaa tɔn la la. 10Nomɛlbwa haa kpɔ o wechɔga kɛo la, n ge kpɔɔ kɛo. Nomɛl ɛɛ mɛ waane a chɛ kɛ n kpɔ kɛo waa, n koh he waa dɛ kpɔ kɛo Yeesu Kristo siwi ta, 11asɛ Bɔnsam bɛ ŋwɛnɛ ba dɔ dɛ chɔg ya wa, dɛkalkɛŋɔ ya jemɛ o ŋwɛnɛre waa kpɔa dɛɛ negre nɛn. 12Maa baa tel Troas ŋɔ n bol Yeesu Kristo Amanesoma la la, n nao kɛŋɔ ya Dɔɔ pili ŋwɛnɛ tɛ mɛ kɛ n ɛ toma bela. 13Kɛ maa wola ya dɔŋ Taetos ka pue bela la, n baah ta men sɔɔhnɛ. Anomanta n kal bela tena dɛ kaa Makidoonia harɛ. 14Korowii jam kɛ waa chegɛ ya Dɔɔ Yeesu Kristo nɛɛ dɛ gel ya yo dɛɛ le nɔ. Korowii chegɛ ya nɛɛ dɛ gel nɛra ɛɛ no Yeesu Kristo waa la bobɛlbwa kɛŋɔ konsɔɔhsoma sɔɔh aa dɛ le nomɛlbwa ɛɛ no la. 15Yeesu Kristo gelɔ ya ɛ konsɔɔhsoma Korowii be, ásɛ nɛra Korowii aa dɛ lɛɛ ba, ne banɔ la baa nyogre ŋwɛnɛ dɛɛ ba chɔga ta bwa ɛɛ no ya sɔɔh. 16Banɔ la baa dɛ nyogre la ɛɛ no sɔɔh laanee dɛ serewe, asɛ banɔ la Korowii aa dɛ lɛɛ ba la ge no dɛ dɔ mkpa. Umee dɛ won ɛ gɛ toma nɔ nɔ? 17Nɛra kɛrɛdɛ kpɔ Korowii waa la berɛ bona dii dɛ yog dɛɛ di. Ba laa yan. Korowiirii tɛ yaa waa nɔ ŋɔ yáa bola, asɛ yaa bola o siwi ta bambile bwa ne, pɛɛ ya ne Yeesu Kristo aa pɛa la nomanta.

will be added

X\