2 Krent 13

1N tooro tenaa nɔ maa dɛ ba ń ba chɔɔ heya. N balaa, wobɛlbwa nɛra banɛ kɛɛ nɛra batoro aa di danseɛ a ta la, anee mɛɛ ba noe kɛ a ɛ kasinteŋ, gɛ Korowii Tɔn aa bagla la. 2N dɛ nyin n ŋɔ he banɔ la he faa ɛ wechɔga la ne banɔ la baa kaa la be ŋɔ, n balɔ dɛ he ta gelaa, maa he gela ba, mɛɛ tɛr he deŋnee. N faa ba he be nɛɛtena la, n bolɔ, n kwaarɔ dɛɛ bol. 3He fa dɛ nyin he na waane dɛ jemɛ kɛŋɔ Yeesu Kristoo soge n nɛɛ dɛɛ bol waa la. Too, hɛɛ nao. Kpegri ta on nyae. Wɛɛ bagle o kpegri he nɛɛ. 4Ba faa kpaaro pɛl dagagre ta o sewɛ la, a baglɔ kɛŋɔ o gwɛgrɔ, kɛ Korowii kpegri nomanta o iro. Ya ne o bwa fa pɛo gwɛgre. Kɛ taraken, ya chegɛ Korowii kpegri ta dɛ dɔ mkpa, asɛ ya won do he be o kpegri la ta. 5Hé nyiŋi he te dɛ na kɛŋɔ he yaradao kɛrɛdɛ kɛɛ he ta on yaradae yɔ? Hé pese he te dɛ na. He jemɛ kɛŋɔ he ne Yeesu Kristo pɛo kɛɛ? He nao kɛŋɔ he ne o ta pɛɛ te naa, ate dɛ he horɛ o waa yaradae ta. 6N dɛ lii kɛŋɔ he nyiŋi yaa na naa, hɛɛ jemɔɔ kɛŋɔ yaa o waa yaradae ta horɛ. 7Kɛ, ya dɛ soŋe Korowii kɛŋɔ he bɛ wechɔga dɛɛ ɛ. Nɛra nao kɛŋɔ ya ta horaa, a wer, kɛ a laa hiah. Waa aa hiah kɛŋɔ he ɛ waa aa wera. Dɛ a gelɔ a do kɛŋɔ ya te horaa, a ta waane ɛɛ. 8Yaa won ɛ wobɛlbwa dɛ jo kasinteŋ la nɛ, chae a chɛ kɛ yaa chao. 9Ya gwɛgrɔ hé do kpegri aa, dɛ ya sie lɛo. Ya dɛ soŋe Korowii kɛŋɔ he waa togre ka tonɛ. 10A waa n chwerɛ heyaa tɔn nɔ dɛ n ta he be balɛ mɔɔ la. N dɛ ɛ gɛ asɛ dɛ bɛ sinyɛga ba kpɔ dɛɛ bol waa he be kpegri ya Dɔɔ la aa tɛ mɛ la ne. Korowii ŋɔ ń kpɔ a gɛ kpegri nɔ cha heya, o ta ŋɔe ŋɔ ń kpɔ chɔg heya. 11Too, yabala, n nyoa jagɛ bonɔ. Hé so kɛrɛdɛ. Hé swɛɛ siwi kɛ hɛɛ geloo he wobɛlbwa togre ka tonɛ. Hé no n waa maa bola dɛ kpɔ ja heyaa la. Hé gel he nyoa pɛ, he bɛ dɛɛ yo. Korowii waa dɛ nyin nɛwɛnyini kohona dɛɛ tɛ bosɔɔhna la, ó cha heya. 12Hɛ́ɛ lea dɔŋa kɛrɛdɛ kɛŋɔ nyabii. 13Korowii nɛra baa lɔ bonɔ bwa dɛ na heya. 14Yá Dɔɔ Yeesu Kristo na he sum dɛɛ cha heya, Kórowii bagle o nyina he nɛ, asɛ Kórowii Domadɛɛge la ne he bwa pɛ.

will be added

X\