2 Krent 12

1A chɛ kɛ n maŋkura n te. N jemɔ kɛ aa wobɛlbwa kwaa te. Mɛɛ bagle chaahna Korowii aa gela n na, ne waa waa pila bag me. 2N jemɛ asɔre te baa bɛl. Dɛ ɛ bene fi dɛ anaarɛɛ nɔ Korowii aa keeru kaa o be nyundujagla. Dɛ o nɛndaa gbabirii kaa nyundua oo, dɛ o lileo gboo kaa bela oo, maa jemɛ. Korowii gboo jema. 3N jemɔ kɛ ba lawɔ kaa nyundua, kɛ anee n bol la, o nɛndaa gbabirii kaa bela oo, dɛ o lileo gboo kaa bela oo, Korowii gboo jema. 4Korowii la o ne o be, o ka no waane nɛwɛnyini aa wola won bola. Korowii ta ŋwɛnɛ tɛɛ kɛ nɛwɛnyini bola. 5Dɛ n ŋɔ n maŋkura n te naa, gɛ nɛn nɔɔ mɛɛ ba kpɔe maŋkura n te. Maa n gbagba we-ɛɛlaa kpɔ maŋkura n te, nemenɛ n nɛŋgwɛgre ɛɛ gbo ta. 6Dɛ n ŋɔ ń kpɔ n gbagba we-ɛɛla maŋkura n te kwaraa naa, gɛnewaa laa te, dɛkalkɛŋɔ a ɛ kasinteŋ. Menee gɛ nɛn la, kɛ maa nyin n kpɔ gɛ waa la maŋkura n te. Dɛ n waa maa dɛ ɛ nɛra ɛɛ na, ne anɔ la baa dɛ no ta laa aa, maa nyin kɛ nɛra kpɛɛ mɛ wobɛlbwa ta. 7Korowii aa nyin kɛ n kpɔ wejena maa naa chaahna ta la dɛɛ maŋkura n te. Anomanta o gelɔ Bɔnsam kpɔ waane do n nɛɛ aa ha mɛ, dɛɛ tɔg mɛ kɛŋɔ sɔɔh, n bɛ won dɛɛ ɛ mbarafo. 8Kera atoro bwaa n soŋe Korowii kɛŋɔ o laa a gɛ waa nɔ kpɔ n nɛ, 9asɛ o ŋɔ, "Chae maa sune he nɛɛ dɛ chae nɔ gbo magre he ne. Bela nɛn aa gwɛgra la, belaa baa na n kpegri kohona." Anomanta a do n som kohona kɛ maa dɛ maŋkura n te n gwɛgra ta, dɛkalkɛŋɔ a taa mɛɛ na Yeesu Kristo kpegri n nɛ. 10N sie dɛ lɛ n gwɛgra maa gwɛgra, ne chɛga baa dɛ chɛg mɛ, ne kpegri bɔr yon do tɛ mɛ, ne chega nɛra aa chegɛ n nɛ, ne gɛ maa koh Yeesu Kristo waa aa noo mɛ bwa ta, dɛkalkɛŋɔ gɛ saŋ maa gwɛgre la, a taa mɛɛ do kpegri. 11N bol waa kɛ gɛne, kɛ heyaa gela n ɛ gɛ. Heyaa chɛ kɛ he fe ɛɛ tɛ me sɔn. A lole kɛ n waa aa bobɛlbwa tel te, kɛ nɛra baa dɛ maŋkura ba te gwaa Yeesu Kristo toroma la, ba bɛlbwa ta men gwaalɛ wobɛlbwa ta. 12N faa lɔ he be la, n lawɛ bambile kɛrɛdɛ dɛɛ ɛ waa aa chagla kɛŋɔ Yeesu toroma la bɛlee men. Wekpega ne nyokpowaa bwaa n ɛ. 13Bɔkwaa n ɛ tɛ asɔre tena baa kaa la maa wola ɛɛ tɛ heyaɔ? Anɔ la maa wola heyaa ɛɛ laanee kɛŋɔ, n ta heyaa hae suuga waa ta. Hé kpɔ n wechɔga kɛ me! 14N tooro tenaa nɔ maa kpɔ n te dɛɛ ba he be bala dɛ́ ba chɔɔ heya. Maa heyaa komɛlbwa bɔɔra ba. He waa hiah mɛ, he suuga laa hiah mɛ. Bechale ne ba mɛɛ, umee dɛɛ nyiŋi o dɔŋ ɔ? 15N sie ɛɛ lɛo kɛŋɔ n chɔg n komɛlbwa he nɛ. N chɔg n bokpega he nɛɛ kwara dɛ won cha heya aa, a som n be. Maa dɛ nyin heyaa kohona waa he te laa n waa kpɔ he bambile ta kɛɛ? 16He nao kɛŋɔ n ta n te kpɔe dawɛ he nɛɛ kenɛ? Kɛ nomɛl gee ŋɔɔ n sie pilo to mɛɛ negre heya. 17Nɛra n faa toma he be la, n chegɛ ba bini bane nɛɛ dɛ negre heyaa di aa? 18Men soŋe Taetos dɛ tomɛ o ne ya dɔŋ asɔre te la he be. Hɛɛ wonoo ŋɔ Taetos baa negre heyaa di aa? Dabeŋkpoŋ laa n ne o kpoŋaa? Ya bwa we-ɛɛla ta beŋkpoŋ ɛɛ yaa? 19Yaa dɛ ŋɔ ken nɔ, he dɛ lii kɛŋɔ ya sɔnee yaa kwaa he be kɛɛ? Akai! Korowii siee yaa bola, pɛɛ ya ne Yeesu Kristo aa pɛa la nomanta. Yabala, wobɛlbwa yaa bol la, he wer waa yaa bola, ásɛ he won che kiŋkiŋ. 20N dɛ ɔmɛ kɛ n balaa, gɛ maa dɛ nyin kɛ he do la, maa heyaa gɛɛ na, gɛ he ge aa dɛ nyin kɛ n do la, haa men gɛɛ na. N dɛ ɔmɛ kɛ mɛɛ ba na nagra, ne bɔweela, ne bandisale, ne n gbo dɔ, ne dɔŋa chɛgra, dɔŋa ŋwala, mbarafo, ne wesagasagare ɛɛ he baahnee. 21Maa nyin kɛ n ba ba he be asɛ N Naa Korowii koh he wechɔga waa dɛ gel n fɛgre. N balɔ dɛ wechɔg-ɛɛra ta warɔ he bini ba tea bini ta chɔgɛ ba charɛ ba liire ba wedoŋa ne ba jwamane ne ba pɛlchɔga we-ɛɛla baa dɛɛ ɛ ta naa, n tea bini ɛɛ chɔgoo.

will be added

X\