2 Krent 10

1Men Pɔɔl, n dɛ soŋe heya. Ba ŋɔ n lɔ he be naa, n pwɛre, kɛ n le he be te naa, n waa kpegri. N dɛ soŋe heyaa kɛŋɔ hé nyiŋi gɛ Yeesu Kristo aa pwɛra o tea do som la, 2asɛ dɛ no n be. Mɛɛ bagle kpegri nɛra baa dɛ lii kɛŋɔ harɛ bonɔ waa ŋwɛnɛre taa ya teŋɛ dɛɛ ɛ ya waa la nɛɛ. Maa nyin kɛ n bagle a gɛ kpegri la he nɛ. 3A ɛ kasinteŋ kɛŋɔ harɛ bonɔɔ ya so. Kɛ harɛ bonɔ laa laa yaa yo. 4Dɔmkwaa yaa dɛ yo a ne la, nɛwɛnyina kwaa laa. A ɛ Korowii dɔmkwaa o kpegri aa lɔ a ta, asɛ ya kpɔ dɛ pagre dekpega. 5Nɛwɛnyina wejema baa dɛ maŋkuraa dɛɛ tɔŋle waa la, a ne webagla baa dɛ maŋkuraa kohona dɛɛ tɔŋle waa ásɛ nɛra jemɛ Korowii kahonɛ la do kɛ dekpega yaa dɛ ba wona pagre la. Ya berɔ dɔ kpegri dɛ́ won berɛ nomɛlbwa liire, asɛ ba no Yeesu Kristo be. 6N kpɔ n te dɛ so dɛɛ kpa, ásɛ he te dɔɔ ba no n be ka tonaa, n tɛr nɛra baa vɛah la deŋne. 7Haa waa kari kɛɛ? Nomɛlbwa dɛ lii kɛ o ɛ Yeesu Kristo nɛn aa, ó jemɛ kɛŋɔ gɛ waa ɛ Yeesu Kristo nɛn la, gɛɛ ya ge ɛ Yeesu nɛra. 8Dɛ n dɛ maŋkura kpegri ya Dɔɔ aa tɛ yaa ŋɔ yá kpɔ dɛɛ cha heyaa la aa, sihiih aa men kpo. O tɛ mɛ kpegri ń won cha heya. O ta men kpegri tɛɛ ń kpɔ chɔg heya. 9Maa nyin kɛ a ɛ kɛŋɔ aahraa n kpɔ tɔne dɛɛ aah heya. 10Bane ɛɛ ŋɔɔ, "Pɔɔl tɔne nyoa kpegri to. Kɛ he na o gbagba aa, waa kpege. O wobol gba ta wale dɔe." 11A gɛ tena nɔ, a chɛ kɛ ba jemɛ kɛŋɔ ya toole he be naa, waa yaa chwera dɛɛ ha heyaa ta korɛ, asɛ waa yaa lɔ he be dɛɛ ɛ ge korɛ. 12Yanee bamewa ya kpɔ ya te magɛ nɛra baa dɛ lii ba te nɛnjena ɔ? Yaa ya nyu kpɔe dɛɛ lɔ ba. Ba yon nyiŋi ba bala we-ɛɛla dɛ kpɔ magɛ ba kwaa dɛ ŋɔ ba kwaa togrɔ. Ba gɛnɔ te! 13Waa aa wola toole anɔ la Korowii aa gela yaa ɛ ta la, ya te aa anee kpɔ maŋkura ya te. Anɔ la bwa waa maga tɛ yaa la, a gbo taa yaa ba ya te maŋkurae. Toma yaa dɛ ɛ he be la gba ja anɔ la waa tɛ yaa la ta. 14He be bala ja ya toma ta. Yaa ba he be la, dɛ ya ta ɛɛ ka garɛ. Yaa kpɔ Yeesu Kristo Amanesoma la ba he be la, dɛ ya ta ɛɛ ka garɛ ya toma jaga. 15Yaa nyin kɛ ya garɛ bela Korowii aa maga tɛ yaa. Toma yaa ɛa la, anee ya kpɔ dɛɛ maŋkura ya te. Toma nɛra bane aa ɛa la, yaa an kpɔe dɛɛ maŋkura ya te. Ya dɔ hwɛga kɛ he yarada ɛɛ kaa siee, asɛ toma yaa dɛ ɛ he bini la ɛɛ ja dɛ kaa sie. 16A taa yaa ba wona bol Amanesoma la harɛre aa lɔ sie la ta, asɛ dɛ bɛ waa nɛra bane aa ɛa kpɔ maŋkura ya te. 17Anee ba chwerɛ Korowii Tɔn bini la: "Nomɛlbwa waa dɛ nyin o te maŋkurae la, wɛɛ maŋkura o te waa Korowii aa ɛa ta." 18Naate waa dɛ kpɛɛ o te la, o laa nɛndɛɛge. Naate Korowii aa dɛ kpɛɛro la, onee nɛndɛɛge.

will be added

X\