1 Timoti 6

1Nɛra baa ɛ nɛndɔɔla la chɛ kɛŋɔ baa ɔmɛ ba dɔɔranar dɛɛ duu ba, asɛ nɛra bɛ ŋwɛnɛ dɔ bol wechɔga yagɛ Korowii ne waa nɔ yaa dɛ chagle nɔ. 2Nɛndɔɔla ba ne ba dɔɔranar bwa aa ɛ asɔre tena la bɛ koh kɛ ba ne ba bwa ɛ beŋkpoŋ nomanta ba siwi ɛɛ sa ba. Ba tenee chɛ kɛ ba tomɛ ba dɔɔranar kɛrɛdɛ kwara, dɛkalkɛ ba dɔɔranar la ge ɛ asɔre tena baa dɛ nyin ba la bini bane. Bol gɛ waa nɔ bag ba dɛ chag ba a bini. 3Nomɛlbwa waa dɛ chagle Korowii Wa, asɛ a korɛ ya Dɔɔ Yeesu Kristo kasinteŋ waa la ta, ne gɛ yaa dɛ chagle nɛra ŋwɛnɛ baa kpɔa dɛɛ tomɛ Korowii la ta la, 4naate dɛ maŋkura o te pɛɛpɛɛ. Waa wobɛlbwa jemɛ. Wetɔŋla dɛ weo chogla, asɛ wetama bɛlbwa dɛ o dɛ vuuga. Gɛ waa nɔɔ dɛɛ ba bɔweela ne nagra ne dɔŋa chɛgra ne liichɔga ne la. 5Gɛ te la ne nɛra baa wola wedɛɛga lii, baa wola ya kasinteŋ waa la jemɛ la, ba dɛ sagɛ wetɔŋla aa wola mun dɔe ta, dɛ yon dɛɛ lii kɛ Korowii toma ɛ ŋwɛnɛ bɛl baa kpɔ o ta dɛɛ nyin suuga. 6Nɛn haa dɛ tomɛ Korowii, he siwi ɛɛ su komɛlbwa Korowii aa tɛɛ la, he ɛ kondɔɔh tenten. 7Baa lolɛ yaa la, ya ta komɛlbwa ne harɛ nɔ ta balɛ. Gɛɛ a do ya seo tɔpere ge yaa wola won kpɔ komɛlbwa le bonɔ kaa. 8Anomanta, dɛ ya dɔ kwaa yaa di, dɛ dɔ yale dɛɛ tɔ aa, hé gel a magre ya ne. 9Nɛra ba siwi aa swɛɛ suuga ta la dɛ chole. Suuga sibegra dɛ neg ba dɛɛ do pɛlchɔga ta, dɛ gel baa na wa, dɛɛ pɛlɛ konsale ne waa aa dɛ ba waa ne nɛ, dɛ yon gel ba chɔg kwaraa. 10Suuga nyin kohona taa wechɔga bwa soosiwi ɛɛ le. Bane teŋɛ suuga nɛɛ kohona dɛ nyogre Korowii ŋwɛnɛ, dɛ gel suna dii berɛ ka ba name. 11Hei, Timoti! Haa dɛ teŋɛ Korowii nɛɛ nɔ, a chɛ kɛŋɔ hɛɛ ke he te gɛ waa la te bwa ta, dɛ swɛɛ siwi dɛɛ ɛ waa aa dɛ su Korowii siwi, dɛɛ tomɔ, dɛ kpɔ he te tɛo dɛɛ yaradao, dɛɛ nyin nɛn, dɛ won bambile lawa wobɛlbwa ta, dɛ do pwɛre. 12Yarada haa dɛ yarada Korowii nɔ, yodɛɛgee hɛɛ yo gɛ la. Anomanta yo kɛrɛdɛ dɛ́ dɔ mkpa aa wola jaga dɔe la. A gɛ mkpa nɔɔ Korowii lee ŋɔ he ba dɔ gɛ saŋ haa chegɛ kiŋkiŋ dɛ bol gɛ haa yarada Yeesu Kristo bagle nɛnlaa la la. 13Korowii waa tɛ komɛlbwa mkpa la, ne ya Dɔɔ Yeesu Kristo la waa wona dɛ che Pɔnteɔs Paelet sie dɛ bol kasinteŋ la sɔn taa n che dɛɛ jae 14kɛ hé lawɛ waa nɔ bini kɛrɛdɛ dɛ gel a togre asɛ nɛra bɛ a wobɛlbwa dɔ bol dɛ ka tel gɛ saŋ ya Dɔɔ Yeesu Kristo aa berɛ ba ja. 15Dɛ o tɔpere baa telaa, Korowii ɛɛ geloo o berɛ ba. Korowiirii chɛ kpɛɛra. O gboo ɛ komɛlbwa nyu. Koranar bwa Kooro on, asɛ dɔɔranar bwa ge Dɔɔree on. 16O gboo dɔ mkpa waa wola sewɛ bwa, dɛ so bela aa chaahna kohona nomɛlbwa aa wola won tel o jwɛh. Nomɛlbwa ta on nae ka, asɛ nomɛlbwa ge aa won nao bwa. Onee chɛ duure ne kpegri dɔe bwa saŋ bɛlbwa dɛɛ la. Aamen. 17Bol waa nɔ nɛra baa ɛ dɔɔhna harɛ nɔ ta la be ŋɔ ba bɛ gel ba nyu bini do ba som kohona, dɛ bɛ hwɛga kpɔ do a gɛ kondɔɔh aa won tona dɛ won hee la ta. Kɛ bá kpɔ ba hwɛga do Korowii waa ta tea dɛɛ tɛ yaa komɛlbwa ásɛ ya won kpɔ dɛɛ lɛ ya sie la nɛ. 18Ŋɔ ba be báa ɛ wedɛɛga ásɛ wedɛɛga berɛ ba kondɔɔh, ba won ba tea tae dɛɛ kɛ nɛra bwa. 19Dɛ ba dɛ ɛ gɛ naa, an dɛɛ ba kerekere kondɔɔh aa wola chɔg bwa nyina cheg ba nyundua. A taa baa ba wona dɔ mkpa tenten la. 20Hei, Timoti! Lawɛ waa la bwa Korowii aa kpɔa do he nɔn ta la bini kɛrɛdɛ. Laa he te kpɔ wesale nɛra aa dɛ bol a ne Korowii Waa aa wola kaa, ne gɛnewaa bane aa wola jemɛ dɛɛ yera wejema dɛ kpɔ dɛɛ tɔŋle kasinteŋ waa la ta, 21dɛkalkɛ gɛ waa nɔ taa bane teŋɛ dɛ nyogre Korowii kasinteŋ ŋwɛnɛ la. Ń Naa Korowii cha he bwa.

will be added

X\