1 Dɛ baa waa gwaale nomoa ɛ waane aa wola weraa, bɛ o nɛɛ nyɛg, kɛ bol waa baglo kɛŋɔ he gbagba mɛɛ, asɛ dɛɛ ɛ bibaala haa ɛ nomoa ka tɛɛ ba la ge kɛŋɔ he gbagba nimanar, 2 dɛ kpɔ haahna baa gwaale nomonome la ɛ he nyare. Asɛ bihaahna haa gwaa ba la ge, hɛ́ɛ ɛɛ ba kɛ he nimambii, wedoŋa bɛlbwa bɛ he ne ba baah ta do. 3 Haahna ba jaranar aa serewa baa wola nomɛlbwa dɔe ó nyiŋi ba nɛɛ la, dɛɛ duu ba dɛɛ cha ba. 4 Kɛ dɛ luhaah bɛl lole dɛ dɔ bii kɛɛ naanar aa, a chɛ kɛ ba jemɛ gɛ ba ne waa so, ba nyiŋu, dɛkalkɛŋɔ a wer kɛŋɔ nɛra baa dɛ teŋɛ Korowii waa ta la ɛɛ ɛ wedɛɛga dɛɛ nyiŋi ba lolanar gɛ ba ge faa koh ba nɛɛ la. Gɛɛ dɛɛ su Korowii siwi. 5 Luhaah waa nyaa o ta nɛn dɔe ó nyiŋi o nɛɛ la te, Korowii nɛɛ o sie dawɛ wɛɛ soŋo chɔɔ ne jwaana bwa ó chao. 6 Kɛ luhaah bodia wa aa dɛ lɛ o sie la, o soge le te, kɛ o do kɛŋɔ nɛn waa sewa. 7 Ja ba gɛ waa nɔ ta asɛ nɛra bɛ ba bwara wechɔge dɔ bol. 8 Dɛ nomɛl lole, waa o nya ne o mɛɛ kɛɛ o dem tena nyiŋi aa, naate Korowii toma ɛ pɛɛ. Naate waa wola Korowii yarada gba bɔɔ. 9 Bɛ luhaah waa wola bene fifraanumɛl dɔe mɔɔ la kure ja luhaahna maa bol ba waa ŋɔ hɛ́ɛ cha ba dɛɛ nyiŋ ba la nɛ. Luhaah waa dɔ bene fifraanumɛl, waa wola baa bɛlbwa jemɛ ka ja o jaa nɛ, 10 nɛra bwa jemɛ o wedɛɛga waa ɛa wa, kɛŋɔ waa wona dɛɛ o bii ŋwɛnɛdɛɛge ta ba ɛ bechadɛɛga, dɛ won dɛɛ kpoŋe hɔɔhra kɛrɛdɛ, dɛ pwɛr o te ɛ toma tɛ asɔre tena, dɛ won cha nɛra wa aa puu ba, asɛ dɛ won kpɔ o te bwa tɛ wedɛɛga ɛɛ gbo la waa mɛɛ bol he be ŋɔ hɛ́ɛ nyiŋi ba nɛɛ la. 11 Bɛ luhaahna ba taa ɛ toli kure ja luhaahna maa bol ba waa nɔ nɛ, dɛkalkɛ ba pɛla ɛɛ ba lawɛ yalee, ba gel Yeesu Kristo toma la dɛ ka yalɛ, 12 asɛ a ɛ wechɔga tɛɛ ba kɛŋɔ ba faa bola ŋɔ Yeesu Kristo toma gboo baa ba ɛɛ, dɛ berɛ vɛh la. 13 Luhaahna nɔ dɔŋa, baa wedɛɛga bɛlbwa dɔe dɛɛ ɛ ka ja kɛŋɔ baa dɛ gaage dɛɛ valɛ deremi ta pɛɛpɛɛ. A gbo laa. Baa kpɔ nyoa dɛɛ do nɛra waa ta, dɛɛ ŋwalɛ nɛra, asɛ dɛɛ bol waa aa wola chɛɛ kɛŋɔ ba bol bwa. 14 Anomanta dɛ luhaahna ba taa ɛ toli la yalɔ dɛ logle bii, dɛ won ba deremi ta nyiŋa, gɛ aa ɛ asɛ ya dɔma bɛ wedoŋa bɛlbwa dɔ bol yagɛ yaa aa, gɛɛ n fe ɛɛ nyin. 15 Taraken gba, luhaahna bane dɔɔ le Yeesu Kristo habɔɔ dɛ ka teŋɛ Bɔnsam nɛɛ tonɛ. 16 Haah bɛlbwa waa ɛ asɔre te asɛ luhaahna do o dem la, ó takapɔ kɛ wɛɛ nyiŋi luhaahna laanee asɛ dɛ bɛ koeh la bwa kpɔ dawɛ asɔre nɛ, gɛ aa ɛ asɛ asɔre ge won nyiŋi luhaahna la baa wola nɛra dɔe bá nyiŋi ba nɛɛ la. 17 Asɔre nomonome la baa dɛ tɔ asɔre tena sie kɛrɛdɛ la chɛ kembɔr bele anɛ. Banee kɛŋɔ banɔ la ba sie aa dɛ begre Korowii Waa la bola ne a chagla ta la, 18 dɛkalkɛ a lɔ Korowii Tɔn la bini kɛ, "He bɛ nae aa dɛ ɛ toma he koo ta la nyoa vɔwɛ dɛ ŋɔ a bɛ kwaa di." Dɛ berɛ chwerɛ do o bini ja ŋɔ, "Tom-ɛɛ bɛlbwa kembɔr chɛo." 19 Dɛ nomɛl ba he be dɛ ba kpɔ waa dɛ dawɛ asɔre nomoa bɛl aa, bɛ no nemenɛ nɛn nɛɛte ne tooro te baa di danseɛ kɛ waa la ɛ kasinteŋ mɔɔ he no dɛ kpɔ ɛ wa. 20 Dɛ bɛl ɛ wechɔga aa, yerɔ cheme asɔre tena la bwa sie dɛ kaoh. He ɛ gɛ naa, nɛra baa lɔ bela dɛ na la ɛɛ ɔmɔɔ dɛ laa ba te dɛɛ kpɔ wechɔga ta. 21 N chegɛ Korowii ne Yeesu Kristo ne nyundua toroma la bwa sie dɛ kpɔ waa nɔ dɛɛ tɛɛ, asɛ he we-ɛɛla bwa ta la, he bɛ gel nɛra bane waa su he siwi dɛ gwaa bane, kɛ dɛɛ ɛ ba bwa kɛrɛdɛ. 22 Bɛ totoo kpɔ nɔɔra dawɛ nomɛlbwa nɛɛ dɛ leo ŋɔ ó ɛ Korowii toma, asɛ dɛ naate ta ba wone kpoŋe tom la bini dɛ ka ɛ wechɔga aa, a ba maali. Nyiŋi he te kɛrɛdɛ dɛ bɛ gel wedoŋa bɛlbwa maali. 23 He tea la ne gɛ he bwara yon dɛɛ wee warawara la nomanta, bɛ nee gbo dɛɛ nyɔ kpa. He ɛo waa, hɛ́ɛ nyɔ sen ge tama. 24 Nɛra bane lole, ba te ne wechɔga ɛɛ dɛ nɛra bwa nao, a yon che a ta ba la ba ne kɔɔto ka pa ba bolchɔge. Kɛ nɛra bane ge ɛ wechɔga aa, waa la peu dɛ kaa kwaraa mɔɔ nɛra jemɛ. 25 Gɛ tentenee wedɛɛga ɛɛ ge aa wola won sɔh. Dɛ nɛn ɛ wedɛɛga sɔh gba aa, aa le baŋee.
