1 A ɛ kasinteŋ kɛŋɔ dɛ nɛn ŋɔ wɛɛ tɔ asɔre tena siee yaa, dɛ tondɛɛga tentenee naate ɛɛ nyin la. 2 A gɛ nɛn la, a ta chɛ kɛŋɔ nɛra dɔ o wechɔge bol. A chɛ kɛ o haah ɛ beŋkpoŋ. A chɛ kɛ o won o te lawa, dɛ dɔ nfɛrɛ, o we-ɛɛla ɛɛ lɛ nɛra sie. A chɛ kɛ o ɛ nɛn waa won hɔɔhra kpoŋa, dɛ won Korowii Waa bagla. 3 A ta chɛ kɛŋɔ o ɛ sennyɔdɛɛ, o bɛ nagrenyini ɛ. Kɛ ó ɛ nɛn waa pwɛra, waa wola o bwara ne waa nyin. A ta chɛ kɛ o siwi begre suuga. 4 A chɛ kɛ o won o haah ne bii nyiŋa, asɛ o bii ɛɛ no o deŋna waa dɛɛ tɛo duure. 5 Dɛ nɛn aa won o haah ne bii nyiŋi aa, ɛrɛɛ wɛɛ ba ɛɛ dɛ won nyiŋi asɔre tena nɛɔ? 6 A chɛ kɛ o ɛ nɛn waa kpɔ o te tɛ Korowii dɛ yaradao bigri, gɛ aa ɛ nɛra waa tɔ ba sie la nomanta, o nyu bini bɛ on som ba do o maŋkura o te kohona, asɛ o ba jo Korowii nɛɛ gɛ Bɔnsam aa ɛa la. 7 A chɛ kɛ o ɛ nɛn nɛra baa wola asɔre tena ɛɛ kwara aa dɛ yerɛ o sɔndɛɛge, asɛ o bɛ sihiih waane ba ɛ dɛ le Bɔnsam bel ta. 8 Nɛra baa chɔ tomare nyoa asɔre la ta la ge, gɛ. A wer kɛŋɔ baa ɛ waa aa dɔ duure, dɛɛ di kasinteŋ. Ba ta chɛɛ kɛ ba ɛ sennyɔdɛɛra, ba ta chɛɛ kɛ ba kpɔ suuga sibegra dɛɛ bɔ nɛra apoo. 9 A chɛ kɛ ba kpoŋe Korowii wesɔɔhla waa waa gela ya jemɛ la bini kiŋkiŋ, dɛɛ ɛ waa baa naa kɛ a togrɔ. 10 A wer kɛŋɔ he nyiŋi ba waa bini dɛ na dɛ ba waa wer mɔɔ he tɛɛ ba ŋwɛnɛ ba ɛ gɛ toma la. 11 Ba haahna chɛ kɛ baa ɛ waa aa dɔ duure, dɛ bɛ nɛra dɛɛ ŋwalɛ. A chɛ kɛ ba won ba te lawa, dɛ kpɔ kasinteŋ dɛɛ ɛ wobɛlbwa. 12 A chɛ kɛ nomɛlbwa waa chɔ asɔre tomare nyoa la haah ɛ beŋkpoŋ, dɛ won o haah ne bii nyiŋa kɛrɛdɛ. 13 Banɔ la baa dɛ ɛ ba toma kɛrɛdɛ la dɛ dɔ sɔn, dɛɛ do kpegri yarada baa dɔa dɛɛ teŋɛ Yeesu Kristo nɛɛ la ta. 14 N dɛ nyin kɛ n wonaa, ń ba nae. Kɛ n tɔ sie chwerɛ waa nɔ dɛɛ tɛɛ, 15 asɛ dɛ n baa bigri aa, tɔ́n nɔ bagle gɛ aa chɛ kɛ ya banɔ la Korowii aa kpɔ yaa ɛ o dem tena nɔ so dɛɛ ɛ ya wa. Yanee Korowii waa wola sewɛ bwa la toroma waa kpɔ o kasinteŋ waa la tɛ ŋɔ yá lawɛ a bini kpoŋe kiŋkiŋ kɛ pila yon lawɛ dea kpoŋe la. 16 Ŋwɛnɛ yaa kpɔ o ta dɛɛ tomɛ Korowii nɔ, tɔŋla toole kɛ wesɔɔhla aa lɔ o ta asɛ Korowii gel ya jemɛ la ɛ wejena kohona. Waa yaa lawɛ a bini kpoŋe laanee: Korowii baa berɛ o te nɛwɛnyini. O Domadɛɛge la gelɔ nɛra bwa jemɛ kɛ o waa togrɔ. Nyundua toroma nao. Nɛra bol o waa bagle harɛ nɔ ta nɛra baa lɔ bobɛlbwa. Ba no o waa harɛ nɔ ta dɛ yaradao, asɛ Korowii kpɔɔ kaa nyundua o ka dɔ jirima.
