1 Timoti 2

1Anɔ la aa tɔ sie mɛɛ ja asɔre tena kɛŋɔ báa teŋɛ a ta laanee kɛ hɛ́ɛ soŋe Korowii dɛɛ tɛ nomɛlbwa. Hɛ́ɛ soŋo dɛɛ jaamo wobɛlbwa ta. 2Hé soŋo dɛɛ tɛ koranar ne nɛra baa dɛ di nomonome bwa ásɛ ya bwa so bosɔɔhna ta jeih ken, dɛɛ tomɛ Korowii gɛ aa chɛa, dɛɛ ɛ waa aa wera o be. 3Gɛɛ wera, dɛɛ lɛ ya Lɛɛ Korowii sie. 4O te dɛ nyin kɛŋɔ nomɛlbwa dɔ o nyu, asɛ dɛ ba jemɛ kasinteŋ waa la. 5Anee kɛ Korowii beŋkpoŋii lole, dɛ dɔ nachige beŋkpoŋ do o ne nɛwɛnyini baah ta, o ge ɛ nɛn. Onee Yeesu Kristo 6waa kpɔ o te tɛ kɛŋɔ ba kpɔɔ charɛ nɛra bwa nyu la. Gɛ saŋ aa chɛ kɛŋɔ waa nɔ magre la taa a den chig la. O ɛ gɛ a chɔ danseɛ saŋ bɛlbwa. 7Anɔ waa Korowii lee mɛ ŋɔ ń lɔ a dawuro bagle nɛra, dɛ berɛ ɛ Yeesu torome ge la. Kasinteŋii mɛɛ bol la, maa nyosone teŋe. Onee gela mɛɛ bagle nɛra baa wola Juda tena ɛɛ la ásɛ ba yarada Yeesu dɛ jemɛ kasinteŋ la. 8N dɛ nyin kɛ bobɛlbwa baala baa ɛ asɔre tena la laa ba te kpɔ bandisale ne wetɔŋla ta, asɛ dɛ won ɛ nɛndɛɛga dɛ ir nɔɔra soŋe Korowii. 9Gɛ tentenee mɛɛ nyin kɛ dɛ haahna dɛ ba laala doe yaa, ba bɛ jwamanlaala ne laala a waa aa do bola dɛɛ do. Bá kpɔ laala aa magre ba ne, dɛ bɛ ba te kpɔ do nyuune ɛɛ aa dɛ ba kem ne, ne suugaswɛm koŋkwaare doe, ne yale a yog aa kpega liga ta. 10Kɛ báa ɛ wedɛɛga kɛ haahna baa dɛ tomɛ Korowii. Ba wedɛɛga ɛɛ laanee dɛ gel ba do wer toli. 11A wer kɛŋɔ haahna ɛɛ pwɛr ba te, dɛ cheg deŋne dɛɛ no Korowii Waa baa dɛ bag ba la. 12N ta ŋwɛnɛ tɛɛ kɛŋɔ haahna di nomonome baala nɛɛ dɛɛ bagle wa. A chɛ kɛŋɔ ba tɔ ba nyoa dɛɛ no, 13dɛkalkɛ Adamee Korowii tɔ sie ta mɔɔ dɛ ta o haah Hawa. 14Adam ge kwaraa laa Bɔnsam negre la. Hawaa o negre dɛ gel o ɛ wechɔga la. 15Kɛ dɛ haahna kpoŋe Korowii yarada bini kiŋkiŋ, dɛɛ nyin nɛn, dɛ laa ba te dɛɛ kpɔ wedoŋa ta, baa wesale ɛ aa, Korowii ɛɛ geloo ba dɔ ba nyu ba lola ta.

will be added

X\