1 Timoti 1

1Men Pɔɔl maa ɛ Yeesu Kristo torome laanee chwerɛ tɔn nɔ. Korowii waa ɛ ya Lɛɛ ne Yeesu Kristo yaa dɛ hwɛgɛ o nɛɛ laanee do mɛ ŋɔ mɛ́ɛ bol o waa nɔ. 2N bie Timotii n chwerɛ tɔn nɔ dɛɛ tɛ. Menee bol Korowii Waa he no, dɛ berɛ n bie a ta la. Ń Naa Korowii ne ya Dɔɔ Yeesu Kristo chae dɛ na he sum, dɛ tɛɛ bosɔɔhna. 3Waa maa ba dɛ kaa Makidoonia harɛ ta dɛ ŋɔ he be la, a taa n ta do. N ŋɔ hé so Ɛfesos dɛ kah nɛra baa teŋe nyosone dɛɛ tɛ nɛra ŋɔ Korowii Waa baa chagle la ŋɔ bá gel gɛ waa la, dɛ bɛ Korowii waa la sie berɛ. 4Ŋɔ ba bɛ gel nyosone la ne gɛ baa dɛ bagle ba naanar lee bɔra baa wola a nyoa na bwa la lɛ ba liire. Wetɔŋla gbo nee gɛ waa nɔ ɛɛ ba. Korowii toma ŋwɛnɛre laa baa bagle la, dɛkalkɛ yarada gbo taa a che baa jemɛ Korowii toma ŋwɛnɛre. 5Wee maa koh a waa doe waa nɔ ta laanee kɛŋɔ bá won dɔ nɛnnyin. Nɛn waa dɔ nɛnnyin nɔ soo la ta wechɔga bɛlbwa dɔe, o tea too, o dɔ yarada kasinteŋ. 6Nɛra bane gel gɛ waa nɔ dɛ ka teŋɛ wesale aa wola mun dɔe bola ta. 7Ba dɛ nyin kɛ ba ɛ ba te kɛ nɛra baa dɛ chagle nɛra Mmara la, kɛ waa ba siwi yon swɛɛ a ta baa bol la, ba gba aa a mun jemɛ. 8Ya bwa jemɔ kɛ dɛ nɛn wono ɛ gɛ Mmara la aa dɛ bagle la aa, Mmara la wer tɛo. 9A chɛ kɛŋɔ he jemɛ kɛŋɔ nɛndɛɛga waa laa ba koh dɛɛ do mmara, kɛ nɛra baa wola mmara ta teŋɛ la, ne deŋnekpeg tena, ne nɛra baa vɛh Korowii la, ne wechɔg-ɛɛra, ne nɛra baa wola Korowii tomɛ, baa wola on duu la, ne nɛra baa dɛ kpoo ba mɛɛnanar ne ba nyare, dɛ nɛra baa dɛ kpo nɛra bwa, 10ne jwamane tena, ne baala ba ne ba bandɔŋa aa dɛ chɔ haah ne baa, ne nɛra baa lawɛ nɛra dɛɛ yog ba kɛ yoma, ne nyosonteŋna, ne nɛra ba yon jemɛ kɛ nyosonee baa teŋe dɛ garɛ dɛɛ ŋwɛɛ Korowii la, ne nɛra baa dɛ ɛ we-ɛɛla te bɛlbwa a ne webagla aa togra la aa wola kaa la, ba waa ba koh dɛɛ do mmara. 11Gɛ waa aa togra la bwa lɔ Amanesoma Korowii aa kpɔa do n nɔn ta ŋɔ ń chagle nɛra la ta. Anee dɛɛ bagle Korowii waa dɔ jirima ne silɛɛ la wa. 12N dɛ jam ya Dɔɔ Yeesu Kristo waa tɛ mɛ o kpegri la kɛ waa yarada mɛ dɛ kpɔ o toma nɔ do n nɔn ta nɔ. 13A lole kɛ n fa dɛ ɛ Yeesu Kristo la nɛnhɛla, dɛɛ ɛo hɔhɔrɔwa, n siwi sao mɛɛ yoo. Kɛ Korowii na n sum, dɛkalkɛ maa wola Korowii yarada dɔe n bini la, dɛ maa jemɛ gɛ maa dɛ ɛ. 14O sune n nɛɛ kohona dɛ cha mɛ taeh n dɔ yarada ne nɛnnyin yaa dɔa le pɛɛ ya ne Yeesu Kristo aa pɛa la ta. 15Waa nɔ ɛ kasinteŋ aa chɛ kɛŋɔ he lɛa kɛŋɔ wechɔg-ɛɛra waa Yeesu Kristo koh ba harɛ nɔ ta dɛ́ ba lɛɛ ba. N wechɔgaa kana gwaa nomɛlbwa kwa. 16Kɛ Korowii sune n nɛ, asɛ Yeesu dɔ bambile tɛ mɛ n wechɔga damanta nɔ bwa ta, ásɛ nɛra baa ba no Korowii waa dɛ yaradao la jemɛ gɛ Yeesu aa dɔ bambile kohona, dɛ won yaradao dɛ dɔ o mkpa aa wola jaga dɔe la. 17Yá kpɔ duure tɛ Koojen la o Kora dii aa wola jaga dɔe, waa wola sewɛ bwa, baa wola won on na, o gbo aa ɛ Korowii la, dɛɛ guŋu harɛ fini ne tɔpere bɛlbwa. Aamen. 18N bie Timoti, n dɔ waane dɛ́ bol he be, ásɛ he lawɛ a bini he Korowii toma ta. Gɛ ba faa chegɛ Korowii Domadɛɛge kpegri ta dɛ bol o toma waa tɛɛ kpegri hɛ́ɛ ɛ nɔ waa la, gɛ waa la tenten taa mɛɛ doe la. Anomanta gel gɛ waa la doe gbemba ásɛ he won yo kɛrɛdɛ, 19asɛ dɛ kpoŋe Korowii yarada bini kiŋkiŋ, dɛɛ ɛ waa haa jema kɛ a togrɔ. Gɛɛ bane aa wola ɛɛ, asɛ ba ta wone yarada Korowii ka tonɛ dɛ horɛ la. 20Banɔ la baa hora la bini banee Haemeneas ne Alɛksanda. N kpɔ ba do Bɔnsam nɔn ta ásɛ ba jemɛ kɛŋɔ baa Korowii nɛnhɛla ɛ.

will be added

X\