1 Yabala, a ta chɛ kɛŋɔ n chwerɛ dɛ bagle heyaa tɔpere la waa nɔ aa dɛ ba chiga, 2 dɛkalkɛŋɔ he bwa jemɔ kpela kɛŋɔ tɔpere ya Dɔɔ la aa ba la ɛɛ pigruu kɛŋɔ ŋwɛɛ aa dɛ pigri nɛn jwaana la. 3 Gɛ saŋ nɛra aa ba ŋɔ, "Bobɛlbwa sɔɔhnɔ, ya dɔ deŋnesɔɔhna name te" la, belaa dɛ harɛchɔg la ɛɛ ba ba pigra. Wɛɛ pigruu kɛŋɔ haah naa kpoŋe tea asɛ lol tea lɔɔ la ken. Gɛ saŋ la, baa bɔree dɔ dɛ chwa ka sɔh. 4 Kɛ yabala, he te toole biro ta, he sie chaah waa nɔ ta. Anomanta Yeesu bala la aa heyaa pigri kɛŋɔ ŋwɛɛ. 5 He bwa sekwara ɛ nɛra he sie aa chaah Korowii waa ta. Biro bini nɛra laa yan, bochaah ta nɛraa yan. 6 Anomanta ya bɛ bɔhwaah ɛ kɛŋɔ bane aa dɛ ɛ la, kɛ hé gel ya sie chɔ harɛ yaa nyiŋi kɛrɛdɛ. 7 Bɔhwaahra ne nɛra baa dɛ dɛɛ te bwa ɛ biro bini nɛra. 8 Ya te yaa ɛ bochaah ta nɛra nɔ, hé gel ya sie chɔ harɛ, asɛ dɛ kpɔ yarada ne nɛnnyin ɛ ya laa batakaare kɛŋɔ baa do laa batakaare dɛɛ yo laa la, dɛ berɛ kpɔ hwɛga yaa dɔa ya Dɔɔ Yeesu be kɛŋɔ wɛɛ lɛ yaa la ɛ buni gbɛrɛ dɛ kpɔ pi. 9 Korowii ta yaa tae ŋɔ yá ba di bolchɔge o sie. O ta yaa ŋɔ yá che Yeesu nɛɛ dɛ dɔ ya nyu. 10 Onee sewa tɛ yaa, asɛ awola o balaa, dɛ ya soge mkpa ta noo, sewaa ya sewɛ oo, yá ne Korowii won pɛ. 11 Anomanta hɛ́ɛ do dɔŋa gbemba dɛɛ cha dɔŋa, gɛ haa dɛ ɛ nɔ. 12 Yabala, ya dɛ soŋe heyaa kɛŋɔ hɛ́ɛ duu nɛra baa ɛ he nomonome dɛɛ ɛ Korowii toma nɔ dɛɛ ja heyaa la. 13 Ba toma la nomanta hɛ́ɛ duu ba kɛrɛdɛ taeh, dɛɛ nyin ba wa. Hé gel he bwa nyoa pɛ. 14 Yabala, ya dɛ soŋe heyaa kɛ hɛ́ɛ ja banɔ la baa ɛ bɔhwaahra la, dɛɛ do ɔmeera la gbemba, dɛ lawɛ banɔ la baa wola chegɛ kiŋkiŋ Korowii ŋwɛnɛ ta la kpoŋe, dɛ dɔ bambile tɛ nomɛlbwa. 15 Hé nyiŋi kɛrɛdɛ dɛ bɛ gel bɛlbwa kpɔ wechɔga dɛɛ bɔ wechɔga kem, kɛ hé ɛ wedɛɛga dɛɛ tɛ he dɔŋa ne nomɛlbwa. 16 Hé gel he sie ɛɛ lɛ tɔpere bɛlbwa, wobɛlbwa ta, 17 dɛɛ soŋe Korowii saŋ bɛlbwa. 18 Hɛ́ɛ jam Korowii wobɛlbwa ta, dɛkalkɛŋɔ gɛɛ Korowii che Yeesu Kristo nɛɛ dɛɛ bagle o tetoowaa he be. 19 He bɛ gel Korowii Domadɛɛge waa soge he nɛɛ la nyoa sɔɔh. 20 He bɛ he bala baa dɛ na chaahna la nyoa dɛɛ vɛh. 21 Kɛ hé nyiŋi ba webagla asɛ dɛ lawɛ anɔ la aa wera la bini. 22 Hé laa he te kpɔ wechɔga bɛlbwa ta. 23 Korowii waa dɛ tɛ yaa bosɔɔhna la, ó gbabir laa doŋa bwa kpɔ he nɛ, dɛ ɛ heyaa nɛndɛɛga ŋwɛnɛ bɛlbwa ta ka tel kɛŋɔ ya Dɔɔ Yeesu Kristo aa ba. 24 Korowii waa le heyaa he ba ɛ o bii la, o ɛ kasinteŋ te. Onee dɛɛ ba heyaa nɛndɛɛga ɛɛ. 25 Yabala, hé soŋe Korowii dɛɛ tɛ yaa. 26 Hɛ́ɛ lea dɔŋa kɛrɛdɛ kɛŋɔ nyabii. 27 N kpɔ ya Dɔɔ dɛɛ do heyaa kɛ hé kure tɔn nɔ bagle yabala la bwa sekwaraa. 28 Ya Dɔɔ Yeesu Kristo waa dɛ na nɛra sum la, wɛɛ cha heyaa.
