1 Tsalonika 4

1Anɔ la aa jaa la, yabala, waa la haa hwela ya be gɛ aa chɛ kɛ he so asɛ Korowii sie lɛ he nɛɛ la, gɛɛ hɛɛ ɛ la. Ya chegɛ ya Dɔɔ Yeesu naa ta dɛɛ ja heyaa ŋɔ a chɛ kɛ he ɛ dɛ gwaa gɛ. 2He jemɛ waa yaa chegɛ ya Dɔɔ Yeesu nɛɛ dɛ bol bagle heyaa la. 3Korowii dɛ nyin kɛ he ɛ nɛndɛɛga dɛ laa he te kpɔ jwamane ta. 4Báa bɛlbwa nyiŋi kɛrɛdɛ kɛ wɛɛ mo haahnee ŋwɛnɛdɛɛge ta. 5He bɛ siyala ne sibegra ŋwɛnɛ ta kpɔ kɛ nɛra baa wola Juda tena ɛɛ la. 6Nomɛlbwa bɛ o dɔŋ nɛɛ jo a gɛ waa nɔ ta, dɛkalkɛ Korowii ɛɛ tɛr nɛra baa dɛ ɛ gɛ la deŋnee, gɛ yaa ja heyaa logla la ŋɔ hé nyiŋi a ta kɛrɛdɛ la. 7Korowii aa le yaa ŋɔ ya ɛ o bii la, o ta ŋɔe ŋɔ yá ba ɛ wedoŋa. O ŋɔ yá ba ɛ wedɛɛga. 8Nomɛlbwa waa wola a gɛ waa nɔ ta teŋɛ la, dɛ nɛwɛnyini waa laa o vɛh, dɛ Korowii waa tɛ heyaa o Domadɛɛge la waa o vɛh. 9Too. Ane gee la. A ta hiaih kɛ ya berɛ bagle heyaa dɔŋa nyina waa kpa, dɛkalkɛŋɔ Korowii bagle heyaa ŋɔ hé nyin dɔŋa. 10Kasinteŋ, he dɛ nyin he bala baa lɔ Makidoonia harɛ la bwa. Yabala, ya dɛ soŋe heyaa kɛ he bɛ waa nɔ gel, kɛ hé ɛ gwaa gɛ. 11Hé takapɔ dɛ ɛ he te nɛŋgwɛgra dɛ bɛ nɛra waa ta dɛɛ jo. Hé kpɔ he bokpega ɛ toma, dɛ bɛ he te kpɔ dɛɛ dawɛ nɛra nɛ, gɛ yaa ŋɔ he be wubwa la. 12He dɛ ɛ ken aa, hɛɛ dɔ jirima nɛra baa wola asɔre tena ɛɛ la bee, haa he tenee kpɔ dawɛ nɛra nɛ. 13Yabala, ya dɛ nyin kɛ ya bol yabala baa serewa la wa, asɛ he tea bini bɛ chɔg kohona kɛŋɔ nɛra baa kaa, baa wola hwɛga dɔe kɛŋɔ yaa ir seo taa la. 14Ya yaradao kɛ Yeesu sewɔ dɛ ir. Gɛ tentenee yaa yarada kɛŋɔ Korowii dɛ ba banɔ la baa yarada Yeesu mɔɔ dɛ serewe la kpɔe dɛ ja Yeesu nɛɛ ba ne o ba gɛ saŋ waa ba la. 15Ya Dɔɔ la waa waa bolaa nɔ. Ya banɔ la yaa so le dɛ ka tel gɛ saŋ ya Dɔɔ la aa ba la, yaa yabala baa serewa la siee tɔ kaa ya Dɔɔ be, 16dɛkalkɛŋɔ ya Dɔɔ la gbabir ɛɛ le nyundua dɛ tu ba, dɛ ba yerɛ o nɛra takpeg ne, asɛ o nyundua toroma nomoa ge yerɛ, Korowii bɛla si tɔ o sie, asɛ banɔ la baa yarada Yeesu Kristo mɔɔ dɛ serewe la ir, 17asɛ Korowii kpɔ ba ne ya banɔ la ge ya taa soge le gɛ saŋ la bwa kaa nyundua baama ta dɛ́ ka cheme ya Dɔɔ bela, asɛ ya ne o so saŋ bɛlbwa. 18Anomanta hé kpɔ waa nɔ dɛɛ larawe dɔŋa bwara.

will be added

X\