1 Tsalonika 3

1Ya haŋrɔ kahonɛ, yaa wola he waa no la, ya liiro kɛŋɔ aa do werii kɛ ya tomɛ Timoti he be asɛ a ka ya nɛra banɛ gbo Atens. 2Timoti ɛ ya dɔŋ dɛ ɛ Korowii torome dɛɛ bol Yeesu Kristo Amanesoma la. Ya tomɔ ó ba do heyaa gbemba dɛ ja heyaa he yarada haa dɛ yarada Korowii la bɔr, 3he bini bɛlbwa bɛ wahala nɔ waa koh dɛ chwa. He bwa jemɔ kɛ gɛɛ chɛ kɛ ya na. 4Ya ne haa lole la, ya bol wahala nɔ waa dɛ ba bala nɔ waa he be he jemɛ wubwa. Asɛ gɛ yaa ŋɔa laanee bala la. 5A waa gela n haŋre kahonɛ dɛ tomɛ Timoti ásɛ dɛ jemɛ he yarada bini kɛŋɔ Bɔnsam ken baa negre heyaa dɛ gel ya toma yaa baa ɛ la ken ɛ pɛɛpɛɛ. 6Kɛ taraken Timoti aa le he be ba la, o ba amanesoma ne kɛŋɔ he dɛ yarada Korowii dɛɛ nyin nɛra ge. O ŋɔ ya be ŋɔ he dɛ lii ya waa kɛrɛdɛ tɔpere bɛlbwa, dɛɛ nyin kɛ he na yaa gɛ yaa dɛ nyin heyaa dɛ na la. 7Yabala, ya wahala ne ya wenaale yaa dɛ na nɔ, ya gel a bwa. He yarada gelɔ ya baah sɔɔh yaa he wa. 8Dɛ he lawɛ Korowii waa la kpoŋe kiŋkiŋ naa, dɛ ya dɔ bokpega. 9Bɔkwa jaamee yaa ba wona kpɔ tɛ Korowii he waɔ? Silɛɛ yaa dɔa le Korowii be nɔ kan. He waa gela ya sie lɛ la. 10Ya dɛ soŋe Korowii chɔɔ ne jwaana bwa ásɛ dɛ na he sie bɔr ja, dɛ bol waa aa dɛ ba wona cha heyaa he yarada bini ásɛ he do kpegri ja. 11N Naa Korowii gbabir waa bera ɛ ya Mɛɛ la ne ya Dɔɔ Yeesu ɛɛ chagle yaa ŋwɛnɛɛ ya ba he be. 12Yá Dɔɔ Yeesu ja heyaa dɔŋa nyina kɛrɛdɛ ásɛ hɛɛ nyin nomɛlbwa gɛ yaa dɛ nyin heyaa la. 13Wɛɛ geloo he do kpegri dɛ bɛ wechɔga dɔ, dɛ ɛ nɛndɛɛga N Naa Korowii waa ɛ ya Mɛɛ la be awola o ne o toromedɛɛga la bwa aa ba la.

will be added

X\