1 Tsalonika 2

1Yabala, he gbabir jemɔ kɛ chɔɔra yaa chɔɔ heyaa la ta pɛɛ ɛɛ. 2He jemɔ kɛ ba tɔ sie ɛ yaa hɔhɔrɔwa Felepae dɛ chɛgre yaa taeh mɔɔ ya ba he be Amanesoma la ne la. Kɛ Korowii tɛ yaa bansua ya won bol o waa la. 3Jae yaa dɛ ja nɛra la, kasinteŋ ŋwɛnɛ taa, negra laa yaa negre nɛra, wedoŋa ge laa ya lii. 4Anɔ la Korowii aa dɛ nyin laanee yaa bol. Yanee o dɔ hwɛga tɛ kɛŋɔ ya bol o Amanesoma la. Anomanta yaa anɔ la nɛwɛnyini sie aa dɛ lɛ a ta bol, kɛ anɔ la Korowii waa jemɛ bambile bɛlbwa waa la aa dɛ nyin la, anee yaa bol. 5Gɛ haa jema la, he kpɛɛra waa laa ya koh ba he be. Ya ta balɛ dɛ́ ba bol waa dɛ negre heyaa dɛ lɛ kwaane ge. Korowii gboo jema. 6Ya ta sɔn nyine dɛ le he ne nomɛlbwa be. 7Ya ɛ Yeesu Kristo toroma, dɛ fe dɔ ŋwɛnɛ kɛ ya lɛ komɛl le he be. Kɛ ya tɛ heyaa sisɔna kɛŋɔ haah naa ta tea dɛɛ dɛɛ o bechasɔɔhna la. 8Ya nyin he waa ya bambile bwa ne. Korowii Amanesoma la gbo ne laa ya ba he be. Yaa nyin he waa gɛ la, a ɛ yaa silɛɛ kɛŋɔ ya kpɔ ya te ja wobol la ta dɛ tɛ heya. 9Yabala, haa ya toma ne ya koeh la waa lii kɛɛ? Ya ɛ toma chɔɔ ne jwaana bwa asɛ ya bɛ he bɛlbwa koeh do gɛ saŋ yaa lɔ he be dɛ bol Korowii Amanesoma la dɛɛ bagle heyaa la. 10He asɔre tena nɔ ne Korowii bwa ɛ ya danseɛ tena, dɛkalkɛŋɔ he nao kɛ ya we-ɛɛla wer dɛ lɛ Korowii sie, doŋa bɛlbwa aa wola toole a ta. 11He nao gɛ yaa do he bini bɛlbwa gbemba gɛ baa yon dɛɛ ɛ o bii la. 12Ya do heyaa gbemba dɛ larawe he bwara dɛ do heyaa ŋɔ hé so sodɛɛga ásɛ he waa lɛ Korowii sie. Onee le heyaa he ba ɛ o bii, dɛ kpɔ o Kora la ne o nyanyini la pera tɛ heya. 13Ya dɛ jam Korowii tɔpere bɛlbwa, dɛkalkɛŋɔ yaa bol Korowii Waa la he be la, he noa kɛŋɔ Korowii Wa. He ta an noɛ kɛŋɔ nɛn wa. Gɛɛ a do kpela. A gɛ waa nɔɔ dɛɛ ɛ toma he asɔre tena nɔ bini la. 14Yabala, he ne Korowii nɛra baa lɔ Judia harɛ dɛɛ teŋɛ Yeesu Kristo nɛɛ la bwa ɛ beŋkpoŋ, dɛkalkɛŋɔ wahala baa naa Juda tena be la, he ge na a dɔŋa he bwɛɛ tena be. 15Juda tena nɔɔ kpo ya Dɔɔ Yeesu Kristo ne Korowii keamere la, dɛ hah yaa, dɛ doŋi yaa la. Gɛ nɛnchɔga nɔ aa Korowii siwi su. Ba ɛ nɛra bwa dɔm, 16dɛkalkɛŋɔ ba dɛ tɔ yaa ŋwɛnɛ ya bɛ Korowii Waa la bol chagle nɛra baa wola Juda tena ɛɛ la asɛ Korowii bɛ ban lɛ. Anomanta ba wechɔga dɛ warɛ tɔpere bɛlbwa, ásɛ Korowii bwaawee ir ba nɛ. 17Ya te la, yabala, baa doŋi yaa le he be tɔpere tamaa nɔ la, ya ta he waa soɛh. Kɛ nae yaa wola heyaa na. Yaa le he be la, dɛ he be bala swɛɛ ya siwi, dɛkalkɛŋɔ dɛ sikii lawɛ yaa taeh. 18Yaa dɛ nyin he be bala la, ya takapɔ gɛ yaa ɛ dɛ́ na heyaa ja. N Pɔɔl yon takapɔ kɛ n fe ɛɛ ba he bee. Kɛ Bɔnsam aa yaa ŋwɛnɛ tɛ. 19Ya sie begra aa begra nɔ, he bee ya hwɛga ne silɛɛ do. He waa ya Dɔɔ Yeesu ɛɛ ba yaa tɔɔ dawa, ya hɛgre awola waa ba ya ba che o sie la. 20He nɛɛ aa ba chega ya dɔ sɔn ne silɛɛ.

will be added

X\