1 Pita 5

1N dɛ nyin n bol waane he asɔre nomonome baa dɛ tɔ he sie la be. Asɔre nomoa la bɛlee n ge. N gbagba kpɔ siwi na wahala la soo Yeesu Kristo aa naa. Awola waa dɛ ba gela nɛra na o jirima la, n gee dɔ o jirima la bɛlee. N dɛ soŋe heyaa kɛŋɔ 2hɛ́ɛ nyiŋi Korowii nɛra baa ɛ o peera waa kpɔ ba tɛ heyaa ŋɔ hɛ́ɛ nyiŋi ba nɛɛ la kɛrɛdɛ. He bɛ gel ba do heyaa mɔɔ hɛɛ nyiŋ ba kɛrɛdɛ, hé gel a ɛ he gbagba tetoowa. He bɛ suuga sibegra waa koh dɛɛ ɛ gɛ toma nɔ, hé nyiŋi nyina haa dɛ nyin kɛ toma la kaa kɛrɛdɛ la dɛɛ ɛa. 3He bɛ kpegri dɛɛ di nɛra baa kpɔ ba do he nɔn ta la nɛ. Hé gel he we-ɛɛla do wer ásɛ ba nyiŋa dɛɛ chaara. 4He dɛ ɛ gɛ naa, Petegra Bwa Dɔɔ la balaa, wɛɛ tɛ heyaa jirima kon o wer aa wola tu bwa, o ɛ kompoŋ haa yoa dɛ le ba vɔwɛ heya. 5He bonɔɔna ge la, hɛ́ɛ tɛ he nomonome duure. Hé bwa pwɛr he te dɛɛ tɛ dɔŋa, dɛɛ cha dɔŋa, dɛkalkɛŋɔ Korowii Tɔn bolɔ ŋɔ, "Korowii ne mbarafo tena aa jo, kɛ o dɛ sune nɛra baa dɛ pwɛr ba te nɛɛ dɛɛ cha ba." 6Anomanta, hé pwɛr he te dɛɛ no Korowii waa dɔ kpegri bwa la wa, ásɛ o gɔɔ heyaa ir tɔpere waa wera o be ta. 7Wobɛlbwa aa dɛ ha heyaa la, hé kpɔa bil Korowii sie, dɛkalkɛŋɔ he waa lɔ o bambile ta. 8Hé gel he sie chɔ harɛ, hɛɛ nyiŋi kɛrɛdɛ, dɛkalkɛŋɔ he dɔm Bɔnsam lole. Gɛ nyujente yon dɛɛ kɔgre, dɛ gaage dɛɛ nyin ola dɛ́ lawɛ la, gɛɛ o ge gaage dɛɛ nyin nɛra dɛ́ lawɛ. 9Anomanta hé che kiŋkiŋ he yarada ta. He bɛ Bɔnsam ŋwɛnɛ tɛ. Hé jemɛ kɛ he bala baa dɛ yarada Yeesu bobɛlbwa la dɛ na a gɛ waa nɔ haa dɛ na nɔ dɔŋa. 10Kɛ he baa na waa tama aa, Korowii waa dɛ na nɛra sum dɛɛ cha ba kohona la, o gbagba ɛɛ kwaa he wobɛlbwaa, dɛ gel he che kiŋkiŋ, dɛ do kpegri, dɛ lawɛ heyaa he bɛ chole. Onee le heyaa hé won che pɛɛ he ne Yeesu Kristo aa pɛa la ta dɛ dɔ o jirima aa wola jaga dɔe bwa la. 11On chɛ kpegri aa wola jaga dɔe bwa. Aamen. 12Silasee cha mɛ n chwerɛ heyaa tɔmbora nɔ la. N jemɔ kɛ o waa dɔ kasinteŋ ya teŋa yaa dɛ teŋɛ Yeesu Kristo nɛɛ nɔ ta. N dɛ nyin he jemɛ gɛ aa chɛ kɛ hɛɛ ɛ, dɛ jemɛ kɛŋɔ gɛ n faa bagle heyaa chae Korowii aa sune ya nɛɛ dɛ cha yaa la, a ɛ kasinteŋ. Hé den lawɛ a bini kiŋkiŋ. 13Asɔre tena baa lɔ Babilɔn, Korowii aa lee ba gɛ waa le heyaa la, ba dɛ na heya. N bie Maak ge dɛ na heya. 14Hɛ́ɛ lea dɔŋa nɛnnyin ne. He nɛra he ne Yeesu Kristo aa pɛa la, Kórowii tɛ he bwa bosɔɔhna.

will be added

X\