1 Pita 4

1Yeesu Kristo aa baa ɛ nɛwɛnyini la, o na bonyɛga. Anomanta a chɛ kɛ he kpɔ he te dɛ jemɛ kɛ gɛɛ he ge bwara ɛɛ ba nyɛga. Nomɛlbwa waa wona lawɛ bambile dɛ na bonyɛga ka la, waa wechɔga ɛ. 2Le fini dɛɛ kaa, hé kpɔ Korowii tetoora dɛɛ tɔ sie he soga bini harɛ bonɔ. He bɛ kwaa nɛwɛnyina aa dɛ pɛlɛ a ta la nɛɛ dɛɛ teŋɛ kpa. 3Waa nɛra baa wola Korowii tomɛ aa dɛ ɛa asɛ he faa ɛa la, he ta a nyoa nae yaa? Dɛ he sie dɛ lɛ jwamane ne pɛlchɔga we-ɛɛla ta. Dɛ he dɛ sɔ sen, dɛɛ ɛ sagasaga, dɛ lawɛ dɔŋa dɛɛ nyɔ sennyɔbala. Dɛ he dɛ tomɛ voga dɛɛ jo Korowii kii nɛ. 4Nɛra baa wola Korowii tomɛ la, a dɛ ɛɛ ba anebɛlbwa kɛŋɔ he ne baa wola pɛɛ dɛɛ ɛ wedoŋa ne wesagasagare baa dɛ ɛ la. A waa baa chɛgre heyaa la. 5Anɔ bwa baa dɛ ɛ nɔ, baa ba tɔh ba nyoa Korowii siee. O kpɔ o te dɛɛ ba weera ne lala bwa waa bola dɛ pa bole. 6Nɛra baa serewa la, ba bol Amanesoma nɔ bagle ba ge, dɛkalkɛŋɔ Korowii ɛɛ bol ba ge waa dɛ pa bole gɛ waa dɛ ba weera ɛɛ la. Waa ba faa dɛ ɛ gɛ saŋ baa wola sewɛ mɔɔ la, anee wɛɛ ba nyiŋa dɛ pa ba bole. Korowii dɛ nyin kɛ ba dɔ mkpa gɛ waa dɔ mkpa la, a waa o gel Yeesu bol Amanesoma la chag ba la. 7Wobɛlbwa jaga tɔpere la telo. Anomanta hé nyiŋi kɛrɛdɛ, dɛ gel he sie chɔ harɛ, asɛ dɛ won dɛɛ soŋe Korowii kɛrɛdɛ. 8Waa aa ɛ wehiah kohonaa kɛ hɛ́ɛ nyin dɔŋa bambile bwa ne, dɛkalkɛŋɔ dɔŋa nyina dɛ tɔ wechɔga kɛrɛdɛ ta. 9He dɔŋ baa choge naa, lɛo, bɛ waa dɛɛ nagre. 10Kpegri bɛlbwa nomɛlbwa aa dɔa la, Korowiirii kpɔa chao ŋɔ ó kpɔ dɛɛ ɛ o Korowii toma. Anomanta bɛ́lbwa nyiŋi o toma ta kɛrɛdɛ, dɛ kpɔ dɛɛ cha o bala. 11Nomɛlbwa Korowii aa chao o won dɛɛ bol o Waa la, wɛ́ɛ bola dɛ jemɛ kɛŋɔ Korowii Waaa wɛɛ bol la. Nomɛlbwa Korowii aa chao o won dɛɛ tomɛ o dɔŋ la, wɛ́ɛ tomɔ bokpega Korowii aa tɛo bwa ne, ásɛ wobɛlbwa ta la, Korowii che Yeesu Kristo nɛɛ dɛ dɔ sɔn. On chɛ kpegri ne jirima aa wola jaga dɔe bwa. Aamen. 12N dandɛɛga, he bɛ gel nii haa dɛ na taraken nɔ kpo he nyoa. Daahnaa Korowii kpɔa dɛɛ daah he yarada. He bɛ gel a ɛ heyaa wehɔɔhra. 13Hé gel he sie lɛ kɛŋɔ haa dɛ na Yeesu Kristo wenaale dɔŋa nɔ, ásɛ awola haa ba na o jirima waa dɔa la, he sie lɛ, he bwara sɔɔh heyaa kohona. 14Dɛ ba koh he teŋa haa teŋɛ Yeesu Kristo nɛɛ la waa dɛɛ chɛgre heya aa, he na som. A ba gɛ naa, a dɛ bagle kɛŋɔ Korowii Domadɛɛge o wa aa dɔ jirima la soge he nɛ. 15Dɛ he bini bɛl dɛ na wahala aa, a bɛ ɛ kɛŋɔ nɛnee o kpo, kɛɛ ŋwɛɛ o ŋwɛ, kɛɛ nɛnchɔgee on, kɛɛ nyoaa o kpɔ do nɛra waa ta. 16Dɛ a chegɛ he Kristo te ɛɛ ta asɛ hɛɛ na wahala aa, bɛ gel a ɛɛ sihiih. Jam Korowii kɛŋɔ Yeesu Kristo sɔn aa dawɛ he nɛ. 17Tɔpere telo kɛŋɔ Korowii bol nɛwɛnyina waa dɛ pa bole. Korowii nɛra nɛɛ wɛɛ ba mun pae. Waa dɛ ba ya kwaraa kpɔe pa mun nɔ, dɛ ɛrɛɛ nɛra baa wola Amanesoma la yaradae waa ɛɛ ba doe yɔ? 18Korowii Tɔn bolɔ ŋɔ, "Nɛra baa ɛ nɛndɛɛga ba waa su Korowii siwi kwaraa la, dɛ a kpegri kɛŋɔ ba dɔ ba nyu aa, dɛ wechɔg-ɛɛra baa wola Korowii ɔmɛ la, ɛrɛɛ ba waa ɛɛ ba doe yɔ?" 19Anomanta he nɛra aa ɛ Korowii tetoora kɛ he na wahala la, hɛ́ɛ ɛ wedɛɛga, dɛ kpɔ he te do Korowii waa ta heyaa la nɔn ta. O waa dɔ kasinteŋ.

will be added

X\