1 Pita 3

1He haahna ge, hé pwɛr he te dɛɛ tɛ he jaranar. Dɛ he dɛ ɛ gɛ naa, he banɔ la he jaranar aa wola Korowii waa yaradae la, he we-ɛɛla ɛɛ geloo ba yarada. Haa nyoa kwaraa pili bol wa, 2dɛkalkɛ baa na gɛ he we-ɛɛla aa wera doŋa bɛlbwa aa wola toole a ta, ne gɛ haa dɛ ɔmɛ Korowii. 3Gɛ haa dɛ ɛ he nyumpona, ne suugaswɛm koŋkwaare kɛŋɔ baŋa kwaa ne deŋna kwaa doe, ne laala haa dɛ do laa dɛ gel he do wer toli. 4Hé gel nɛra na he wer waa aa lɔ bambile bini siwi aa wola an na la ta. Hé do pwɛre, dɛɛ ɛ waa bɔeh. Anee wer aa wola tu bwa, dɛ do wer kohona Korowii be. 5A saŋ la haahna ba faa dɛ tomɛ Korowii kasinteŋ ne dɛɛ yaradao la, dɛ ba pwɛr ba te dɛɛ tɛ ba jaranar. Anee ba ge wer. 6Dɛ gɛɛ Abraham haah Saara ge do. O pwɛr o te tɛ o jaa dɛ faa yerɔ o dɔɔ. He waa togrɔ, haa ɔmɛ ge aa, ate Saara biirii heya. 7Baala ge, gɛɛ a chɛ kɛ he dɔ liire he ne he haahna soga bini, dɛ jemɛ kɛŋɔ baa kpege kɛŋɔ heya. Hɛ́ɛ duu ba, dɛkalkɛŋɔ he ne ba bwaa dɛɛ ba Korowii mkpa waa cha heyaa hɛɛ ba dɔe la dɔe. Hɛ́ɛ ɛ ken ásɛ wobɛlbwa bɛ he Korowii soŋa ŋwɛnɛ tɔ. 8Waa maa dɛ nyin n bol laanee kɛŋɔ hé gel he nyoa pɛ, hé dɔ dɔŋa chal, hɛ́ɛ nyin dɔŋa kɛŋɔ nyabii, dɛɛ sune dɔŋa nɛ, dɛ pwɛr he te dɛɛ tɛ dɔŋa. 9He bɛ wechɔga kpɔ dɛɛ bɔ wechɔga kem. He bɛ wobochɔga kpɔ dɛɛ bɔ wobochɔga kem. Nɛn ɛɛ wechɔga aa, soŋe andɛɛga tɛo. Korowii aa le heyaa la, dɛ́ hɛ́ɛ ɛ gɛ ásɛ o tɛ heyaa hɛɛra. 10Ba chwerɔ do Korowii Tɔn bini ŋɔ, "Nomɛlbwa waa dɛ nyin mkpajaŋ, dɛɛ nyin kɛ o bwara sɔɔhno la, wɛ́ɛ nyiŋi o nyoa kɛrɛdɛ. O bɛ wobochɔga dɛɛ bol, o bɛ nyosone dɛɛ teŋe. 11Wɛ́ɛ ke o te wechɔga ta, dɛɛ ɛ wedɛɛga. Ó swɛɛ siwi dɛɛ ɛ waa aa dɛ ba nyopɛo ne. 12A do gɛ, dɛkalkɛ nɛra ba we-ɛɛla aa wera dɛ su Korowii siwi la, Korowii dɛ nyiŋ ba, dɛɛ no ba wesoŋa. Kɛ nɛra baa dɛ ɛ wechɔga te, o ne baa jo." 13He siwi swɛɛ wedɛɛga ɛɛ ta naa, umee dɛɛ ba he hae yɔ? 14He dɛ ɛ wedɛɛga a che a ta hɛɛ na waa kwara naa, dɛ he ta som nae yaa? A ba gɛ naa, bɛ nɛra baa dɛ hae la ɔmɛ. Bɛ gel a hae. 15Hɛ́ɛ duu Yeesu Kristo dɛɛ ɔmɔ he bambile bini kɛŋɔ he Dɔɔree on. Hé kpɔ he te saŋ bɛlbwa, asɛ nomɛlbwa bɔɔ heyaa he hwɛga haa dɔa nɔ wa aa, he won baglo a bini. 16He dɛ bagla aa, hé kpɔ sisɔna ne taa dɛɛ bagla. A chɛ kɛ he tea to he jemɛ kɛŋɔ nomɛlbwa aa he wobɛlbwa dɔ dɛ bol. He dɛ ɛ gɛ naa, nɛra baa koh he teŋa haa dɛ teŋɛ Yeesu Kristo nɛɛ ne he wedɛɛga haa dɛ ɛ waa dɛ bol wobochɔga dɛɛ yagɛ heyaa la, sihiih ɛɛ kpo baa. 17He dɛ ɛ wedɛɛga dɛɛ na wa aa, an wera kɛ haa dɛ ɛ wechɔga dɛɛ na wa. Dɛ Korowii tetooraa kɛ he koh he wedɛɛga ɛɛ waa dɛɛ na wa aa, a wer. 18Yeesu Kristo gbagba sewɔ tɛ heyaa dɛ bɔ wechɔga kem. Kerabeŋkpoŋii o sewɛ, waa wola berɛ sewɛ kpa. O ta wechɔga ɛɛ bwa, kɛ o sewɔ tɛ wechɔg-ɛɛra. Gɛ waa ɛ ya ne Korowii pɛ waa o ɛ gɛ. Baa kpoo la, o bwadabii sewa, kɛ o lileo te dɔ mkpafale. 19O lileo la lala baa vɔg ba Lala Bwɛɛ la be, dɛ ka bol Korowii Waa ba be. 20A saŋ la tena baa ɛ deŋnekpeg dɛ vɛh Korowii Waa noe gɛ saŋ Nowa faa dɛ kwaa o gberjen la la, ba lalaa o bol Korowii Waa bagle la. Korowii fa lawɛ bambile ba nɛɛ bigri, dɛ ka tel kɛŋɔ Nowa aa kwaa o gberjen la tonɛ. Nɛra tama baa lɔ o bini laanee Korowii lɛ nee la ta. Dɛ ba lɔ nɛra banuatoro. 21A gɛ nee nɔ chegɔ tɛ Korowii nee baa dɛ sɔ yaa aa lɛ yaa la. Korowii nee sɔe ta bwara doŋa yagla ɛɛ. Korowii nee sɔe munii kɛ ya soŋe Korowii ó tɛ yaa tepoŋ. A chegɛ Yeesu Kristo seo ta ira ta asɛ nee sɔe la won dɛɛ lɛ yaa. 22O kaa Korowii be nyundua, dɛ ka so nomombɔr o dig ta, dɛɛ di kora nyundua toroma ne konchɔga aa bea yaa wola an na bwa soosiwi nɛ.

will be added

X\