1 Pita 2

1Anomanta hé le wechɔga bɛlbwa kɛŋɔ dɔŋa negra bɛlbwa, ne nɛra sie nyiŋa dɛɛ ɛ wa, ne bɔweela ne nɛra waa bola bɛlbwa sese ta. 2Hé gel he siwi swɛɛ Korowii Waa la noe ta kɛŋɔ bechasɔɔhne siwi yon swɛɛ elnee ta la, a che a ta he won kpeg he lɛɛ waa la ta. 3He dagɛ ya Dɔɔ la na taraken dɛ na kɛ o wer. 4O te ɛ Bwe waa dɔ mkpa. Nɛwɛnyini liiru konsala dɛ vɛoh, kɛ onee Korowii te nyiŋi kɛ o ɛ Bwedɛɛge o wa aa hiah dɛɛ nyinu. Haa ba o be nɔ, 5he ge do kɛ bwea aa dɔ mkpa. Hé gel o kpɔ heyaa ma Korowii Dea ásɛ he ɛ Korowii Sɔfore haa do goroŋ, asɛ dɛ che Yeesu Kristo nɛɛ dɛɛ tomɛ Korowii bambile bwa ne a ɛ saraha dɛɛ su o siwi. 6Ba chwerɛ Korowii Tɔn bini ŋɔ, "Na, n pɛne Bwedɛɛge o wa aa hiah, dɛ kpɔ pa n dea mun Saayɔn o lawɔ kpoŋe. Nomɛlbwa waa dɛ yaradao la, waa sihiih di bwa." 7He nɛra haa dɛ yaradao ge be la, wɛɛ ɛ Bwedɛɛge o wa aa hiaah tɛ heya. Asɛ nɛra baa wola on yaradae ge la, wɛɛ ɛ gɛ baa chwera Korowii Tɔn bini laanee ba be, kɛŋɔ: "Bwe la mamaala aa vɛah la, onee bera lawɛ dea kpoŋe la," 8dɛ ɛ gɛ baa bera chwerɛ o waa ŋɔ, "Bwe waa dɛ ba gela nɛra lɔ naa dɛ chogli laanee la." Ba vɛh Korowii waa la ta teŋa, an gela baa lɔ na. Korowiirii chega gɛ. 9Kɛ he te la, Korowiirii le heya. O Kora Sɔforee heyaa. He do goroŋ. He ɛ o nɛra waa le heyaa ŋɔ hɛ́ɛ bol o nyokpowaa waa ɛa. On le he ne biro ta dɛ ba he ne o bochaah waa wera kohona la ta. 10He fa ta Korowii nɛra ɛɛ, kɛ taraken te, o nɛraa heya. O fa ta he sum nae, kɛ taraken te, o na he sum. 11N dandɛɛga, n dɛ soŋe heyaa kɛŋɔ haa ɛ hɔɔhra bonɔ, bonɔ aa wola he bwɛɛ ɛɛ nɔ, hé laa he te kpɔ he bwadabii pɛlchɔga ta. Anee dɛɛ vuugi heyaa haa wola won ɛ waa Korowii aa kpɔa do he bambile bini la. 12Haa lɔ nɛra baa wola Korowii tomɛ baah nɔ, hé gel he wobɛlbwa togre, asɛ dɛ ba dɛ bol he waa ŋɔ he ɛ wechɔg-ɛɛra aa, a habɔɔ la, bá na he we-ɛɛla kɛŋɔ a wer, dɛ kpɔ jam tɛ Korowii awola waa ba ya ne o na dɔŋa la. 13Hé koh ya Dɔɔ la waa dɛ pwɛr he te dɛɛ tɛ nomonome baa cheg ba harɛ bonɔ bwa, he harɛ bwa nyu waa chɔ wobɛlbwa nyoa, 14ne o ge nɛra waa lee ba ŋɔ báa tɛr wechɔg-ɛɛra deŋne dɛɛ kpɛɛ nɛra baa dɛ ɛ waa a ŋwɛnɛ ta la. 15Korowii dɛ nyin kɛ hɛɛ ɛ wedɛɛga dɛ́ won dɛɛ tɔ gɛna ŋwɛnɛ ba bɛ won bol gɛnewaa dɛɛ chɔg heya. 16Hé so kɛŋɔ nɛra haa dɔ he te haa wola yoma ɛɛ. Kɛ he bɛ dɔe haa dɔ he te la kpɔ dɛɛ ɛ wechɔga. Hé gel nɛra na kɛŋɔ Korowii bonɔɔna ne tolii heyaa he soga bini. 17Hɛ́ɛ tɛ nomɛlbwa duure, dɛɛ nyin he bala baa dɛ yarada Yeesu Kristo la. Hɛ́ɛ ɔmɛ Korowii, dɛ kpɔ duure dɛɛ tɛ he harɛ bwa nyu. 18He banɔ la baa dɛ do heyaa bonɔɔna kɛɛ toli la, hé pwɛr he te dɛɛ tɛ he dɔɔranar dɛɛ duu ba. He dɔɔranar ba tea aa soma ba do pwɛre gbo laa n ŋɔ. Hɛ́ɛ duu banɔ la ba nyu bini aa kpega gba. 19Maa dɛ ŋɔ nɔ, naate baa dɛ fiigu aa wola a ŋwɛnɛ ta ɛɛ, asɛ o koh Korowii waa dɛ won lawɛ bambile la, a wer dɛɛ lɛ Korowii sie. 20Haa ɛ wechɔga, asɛ dɛ lawɛ bambile ba lɔɔre a waa la, bɔkwa sɔnee lɔ he bambile lawa la ta nɔ? He ɛ wedɛɛga, ba garɛ koh a waa dɛɛ ɛɛ hɔhɔrɔwa he lawɛ bambile aa, a ɛ sɔn dɛɛ tɛɛ Korowii be. 21A gɛ waa nɔɔ Korowii le heyaa ŋɔ hɛɛ na, dɛkalkɛŋɔ Yeesu Kristo koh he waa dɛ na wahala, asɛ a chɔ tɛ heyaa kɛŋɔ hɛɛ lawɛ bambile he wahala ta. Ba chwerɔ ŋɔ, 22"O ta wechɔga ɛɛ bwa. Nyosonwaa ta o nyoa leɛ bwa." 23Ba faa dɛ chɛgro chɛgtɔrɔ la bwa la, o ta nyoa pile chɛgɛ nomɛlbwa. Ba faa dɛ ɛo hɔhɔrɔwa la bwa la, o ta nomɛlbwa aahrɛ. O kpɔ a bwa tɛ Korowii waa dɛ bol nɛra bwa waa dɛɛ pa bole kasinteŋ ne la. 24O gbagba lɛ ya wechɔga dawɛ o nɛ, dɛ na wahala dagagre ta, asɛ ya bɛ so tɛ wechɔga, dɛ so tɛ wedɛɛga ɛɛ. Pirae baa pirao la taa a che he dɔ bokpega. 25He fa do kɛ peera aa kpaŋa, kɛ taraken te, he ba he Dɔɔ waa dɛ nyiŋi he nyu la be.

will be added

X\