1 Jn 5

1Nomɛlbwa waa yaradaa kɛŋɔ Yeesu ɛ Kristo la Korowii aa bagɛ nyoa ŋɔ wɛɛ tomɔɔ la, naate ɛ Korowii bie, dɛkalkɛŋɔ dɛ he dɛ nyin nomɛl waa aa, dɛ he dɛ nyin o bie ge wa. 2Dɛ ya dɛ nyin Korowii dɛɛ teŋɛ o waa ta naa, a taa ya jemɛ kɛŋɔ ya dɛ nyin o bii. 3Dɛ ya dɛ teŋɛ waa Korowii aa kpɔa tɛ yaa ta naa, anee dɛ bagle kɛŋɔ ya dɛ nyinu. O waa la ta teŋa ge aa kpege kohona tɛ yaa, 4dɛkalkɛŋɔ nomɛlbwa waa ɛ Korowii bie la won harɛ nɔ ta liire ne o komɛlbwa nɛɛ pɔe. Ya chegɛ yarada yaa dɛ yarada Yeesu la ta dɛ pɔ a nɛ. 5Umee dɛ won pɔ harɛ nɔ ta liire ne o komɛlbwa nɛɔ? Nomɛlbwa toole atane kɛŋɔ naate waa dɛ yarada kɛ Yeesu ɛ Korowii Bie la gbosoroo. 6Yeesu Kristo aa bala dɛ ba ɛ o toma la, nee ne chal taa o che dɛ ba. Korowii nee sɔe la gbo ta laa o toma la che. Kɛ o chal waa fuga ta la ne Korowii nee sɔe la bwa taa a che. Asɛ Korowii Domadɛɛge gee di danseɛ, dɛkalkɛŋɔ o ɛ kasinteŋ te. 7Kon bele atoroo di danseɛ dɛɛ tɛ Yeesu. 8Korowii Domadɛɛge la, ne Korowii nee baa sɔɔ la, ne o chal waa fuga ta la bwaa di danseɛ dɛɛ tɛo dɛɛ bagle wesiwi beŋkpoŋ. 9Dɛ ya dɛ yarada nɛwɛnyini danseɛ aa, amɔ yaa Korowii kwaa yarada aa? O kwaa laanee kpega gwaa nɛwɛnyini kwa. Korowii gbagbaa kpɔ waa nɔ di o Bie danseɛ. 10Anomanta nomɛlbwa waa yarada Korowii Bie la la, naate dɔ gɛ danseɛ nɔ o gbabir bambile bini dɛ won jemɛ kɛŋɔ a ɛ kpela. Kɛ nomɛlbwa waa wola Korowii yarada la gelɔ Korowii waa la ɛ nyosone, dɛkalkɛŋɔ naate aa gɛ Korowii aa bol o Bie la waa la yarada. 11Waa Korowii aa bola a ɛ danseɛ laanee nɔ: O tɛ yaa o mkpa aa wola jaga dɔe bwa la, asɛ o Bie la bee gɛ mkpa la ge le. 12Nomɛlbwa waa kpɔ o te pɛl Korowii Bie la dɔ a gɛ mkpa nɔ. Nomɛlbwa waa wola o te kpɔe pɛl Korowii Bie la ta mkpa la dɔe. 13N chwerɛ waa nɔ baa tɛ he banɔ la haa dɛ yarada Korowii Bie la ásɛ he jemɛ kɛŋɔ he dɔ Korowii mkpa aa wola jaga dɔe la. 14Ya dɔ hwɛga Korowii be kɛŋɔ wobɛlbwa yaa soŋo la, dɛ a ɛ o tetoowa aa, wɛɛ no ya bee. 15Dɛ ya jemɔ kɛŋɔ Korowii dɛ no ya be kwaa yaa dɛ soŋo la te naa, amɔ te dɛ ya jemɔ kɛŋɔ ya dɔɔ dɔ kwaa yaa dɛ soŋe o be la. 16Dɛ he na he dɔŋ wɛɛ ɛ wechɔga aa, soŋe Korowii tɛo. Wɛɛ tɛo mkpaa. N ŋɔ gɛ naa, banɔ la baa wola seo wechɔga ɛɛ laanee n ŋɔ hé soŋe tɛ. Wechɔga ane lole, dɛ he ɛa aa, a chɛ kɛŋɔ he sewɛ. N ta ŋɔe ŋɔ hé soŋe Korowii tɛ nɛn a te bɔr. 17Waa aa wola were bwa ɛ wechɔga, kɛ wechɔga bwa laa ɛ seo wechɔga. 18Ya jemɔ kɛ nomɛlbwa waa ɛ Korowii bie la aa teŋɛ dɛɛ ɛ wechɔga, dɛkalkɛŋɔ Korowii Bie la dɛ nyiŋi naate nɛɛ asɛ Bɔnsam bɛ won ɛo wobɛlbwa. 19Ya jemɔ kɛŋɔ ya bwa ɛ Korowii bii, asɛ nɛra baa dɔ harɛ nɔ ta gbo liire ne kwaa aa lɔ harɛ nɔ ta bwa ge do Bɔnsam lɔga. 20Ya jemɔ kɛŋɔ Korowii Bie la balɔ dɛ ba tɛ yaa liire yá kpɔ jemɛ Korowii tenten la. Korowii tenten la lawɛ yaa pɛl o nɛ, dɛkalkɛŋɔ o kpɔ ya te pɛl o Bie Yeesu Kristo la. O ɛ Korowii tenten, dɛ dɔ mkpa aa wola jaga dɔe bwa. 21N bidɛɛga, hé nyiŋi he te kɛrɛdɛ dɛ laa he te kpɔ komɛlbwa waa wola Korowii tenten ɛɛ la ta dɛ toma.

will be added

X\