1 Jn 4

1Yabala, he bɛ nɛra baa ŋɔa ba dɔ Korowii Domadɛɛge la dɛ che o ta dɛɛ bagle waa la dɛɛ yarada warawara. Hé pese ba dɛ na kɛŋɔ kpegri baa dɔa la le Korowii Domadɛɛge la be kɛɛ? Dɛkalkɛŋɔ nɛra baa dɛ negre nɛra kɛŋɔ ba ɛ Korowii keamere ba harɛ nɔ ta bobɛlbwa pirim. 2Ŋwɛnɛ nɔ taa hɛɛ ba chega dɛ jemɛ nɛra baa dɔ Korowii Domadɛɛge la. Nomɛlbwa waa dɛ bagle Yeesu waa ɛ Kristo Korowii aa tomɔ ó ba lɛ yaa la waa kɛŋɔ o baa ɛ nɛwɛnyini la, o dɔ Domadɛɛge waa le Korowii be la. 3Nomɛlbwa waa dɛ tɔŋle Yeesu nɛwɛnyini ɛɛ la ta Domadɛɛge la dɔe le Korowii be. Kpegri naate aa dɔa la le Yeesu dɔm tenten la be. He noɔ kɛ wɛɛ bao. Taraken, on bala la. 4N bidɛɛga, Korowii nɛraa heya. He pɔ keamere baa ɛ nyosonteŋna la nɛ, dɛkalkɛŋɔ Korowii Domadɛɛge waa lɔ he bini la kpegri gwaa kon waa lɔ nɛra baa dɔ harɛ nɔ ta gbo liire la kpegri. 5Keamere baa ɛ nyosonteŋna la te, nɛra baa dɔ harɛ nɔ ta gbo liire la bini banee ban. Harɛ nɔ ta waa baa bol. A waa ba won dɛɛ bol wa, asɛ nɛra baa dɔ harɛ nɔ ta gbo liire la sie ɛɛ lɛ ba nɛɛ dɛɛ no ba be la. 6Ya te ɛ Korowii bii. Nomɛlbwa waa jemɛ Korowii la dɛ no ya wa. Nomɛlbwa waa wola Korowii jemɛ la aa ya waa no. Anɔ taa yaa ba chega dɛ jemɛ banɔ la baa dɔ kasinteŋ Doma waa ɛ Korowii kon ne banɔ la baa dɔ nyosone kon la. 7Yabala, hé gel ya nyin dɔŋa, dɛkalkɛŋɔ nɛnnyin le Korowii be. Nomɛlbwa waa dɛ nyin nɛn la, o ɛ Korowii bie dɛ jemɔ. 8Nomɛlbwa waa wola nɛn nyin la aa Korowii jemɛ, dɛkalkɛŋɔ Korowiirii nyina bwa Dɔɔ. 9Kenii o bagle o nyina waa dɛ nyin yaa: O gelɔ o bibeŋkpoŋ la ba harɛ nɔ ta, ásɛ ya che o nɛɛ dɛ dɔ mkpa. 10Anɔɔ dɛɛ bagle gɛ nyina tenten aa doa. Ya te nyina yaa dɛ nyin Korowii la aa bobɛlbwa tel, kɛ o ge garɔ dɛɛ nyin yaa. Hé na gɛ Korowii aa gela o Bibeŋkpoŋ la koh ya wechɔga waa dɛ ba harɛ nɔ ta dɛ sewɛ dɛ kwaa ya ne Korowii baah. 11Yabala, dɛ kenii Korowii ɛɛ nyin yaa te naa, amɔ a chɛ kɛŋɔ ya nyin dɔŋa. 12Nomɛlbwa ta Korowii nae ka. Kɛ dɛ ya dɛ nyin dɔŋa aa, anee Korowii ɛɛ ba yaa lawɛ pɛl o nɛ, asɛ o nyina la do ya be kɛrɛdɛ ka tonɛ. 13Korowii Domadɛɛge la waa kpɔa tɛ yaa la gelɔ ya jemɛ kɛŋɔ kpela, ya kpɔ ya te pɛlo asɛ o ge lawɛ yaa pɛl o nɛ. 14Ya na o Bie la dɛ di danseɛ kɛŋɔ Korowiirii gela o ba harɛ nɔ ta dɛ́ ba ɛ nɛwɛnyini Lɛɛ. 15Nomɛlbwa waa yarada Yeesu kɛŋɔ Korowii Biee on la, dɛ naate kpɔ o te pɛl Korowii asɛ o ge lawɔ pɛl o te. 16Anomanta ya gbabir jemɔ kɛŋɔ Korowii dɛ nyin yaa, dɛ kpɔ siwi dawɛ o nyina la nɛ. Korowiirii nyina bwa Dɔɔ. Nomɛlbwa waa dɛ nyin nɛn la, o kpɔ o te dɛɛ pɛl Korowii, asɛ o lawɔ dɛɛ pɛl o nɛ. 17Waa lawɛ yaa pɛl o nɛɛ la, a taa a che nyina la do ya nɛɛ kɛrɛdɛ ka tonɛ, asɛ ya dɔ hwɛga awola Yeesu aa ba dɛ ba bol nɛndɛɛga ne wechɔg-ɛɛra bwa waa dɛ pa bole la. Yaa Yeesu bala waa ɔmɛ, dɛkalkɛŋɔ gɛ o da aa doa la, gɛ tentenee ya ge do nɛra baa dɔ harɛ nɔ ta gbo liire bini. 18Nɛn dɛ nyin o dɔŋ aa, waa gɛ Korowii aa dɛ tɛr nɛra deŋne ɔmɛ. Nyina waa ɛ nyina tenten la dɛ doŋi ɔmee. Deŋne tɛra waa nɛn ɛɛ ɔmɛ Korowii. Anomanta naate waa dɛ ɔmɛ la ta nyina tenten dɔe o be. 19Ya dɛ nyin dɔŋa, dɛkalkɛŋɔ Korowiirii tɔ sie nyin yaa. 20Dɛ nomɛl hah o dɔŋ dɛ ŋɔ o dɛ nyin Korowii aa, dɛ o teŋe nyosone. Dɛ nomɛl aa o dɔŋ o ne waa pɛa wɛɛ nao la nyin aa, ɛrɛɛ ó ɛ dɛ won nyin Korowii waa wola on na nɔ? 21Waa Yeesu Kristo aa kpɔa tɛ yaa laanee nɔ: Nomɛlbwa waa dɛ nyin Korowii la, a chɛ kɛŋɔ o nyin o dɔŋ ge.

will be added

X\