1 Hé na nyina ya Mɛɛ waa lɔ nyundua aa dɛ nyin yaa, dɛɛ yerɛ yaa o bii. Ya ɛ o bii kpela. A waa gela nɛra baa dɔ harɛ nɔ ta gbo liire aa wola yaa jemɛ la. Gɛ baa wola Korowii jemɛ la, gɛɛ baa wola ya ge jemɛ. 2 Yabala, taraken ya ɛ Korowii bii. Yaa jemɛ kɛrɛdɛ gɛ yaa dɛ ba doe. Kɛ ya jemɔ kɛŋɔ awola Yeesu Kristo aa forɛ le nɛra nao la, gɛ waa doa la, gɛɛ ya gee ba doe, dɛkalkɛŋɔ yaa nao dɛ na gɛ waa doa. 3 Nomɛlbwa waa dɔ gɛ hwɛga Yeesu Kristo nɛɛ la chɛ kɛ o lawɛ o te, dɛ laa o te dɛɛ kpɔ wechɔga ŋwɛnɛre ta dɛ́ won do kaih gɛ tenten Yeesu Kristo aa do kaih la. 4 Nomɛlbwa waa dɛ ɛ wechɔga la di bolchɔge Korowii mmara ta, dɛkalkɛŋɔ wechɔgaa dɛɛ tia mmara. 5 He jemɔ kɛŋɔ Yeesu Kristo ba harɛ nɔ ta ásɛ dɛ ba laa wechɔga kpɔ dɛ tɔ a ŋwɛnɛ. O te, dɛ wechɔga toole o nɛ. 6 Anomanta nomɛlbwa waa kpɔ o te pɛl Yeesu Kristo la aa berɛ teŋɛ dɛɛ ɛ wechɔga kpa. Nomɛlbwa o taa teŋa dɛɛ ɛ wechɔga la, naate ta on pesee dɛ jemɔ. 7 N bidɛɛga, he bɛ gel nomɛlbwa negre heya. Nomɛlbwa waa dɛ ɛ wedɛɛga aa su Korowii siwi la ɛ nɛndɛɛge gɛ Yeesu Kristo aa ɛ nɛndɛɛge la. 8 Nomɛlbwa waa teŋa dɛɛ ɛ wechɔga la ɛ Bɔnsam nɛn, dɛkalkɛŋɔ harɛ mumpar la bwaa Bɔnsam le dɛɛ ɛ wechɔga. A waa Korowii Bie la koh ba harɛ nɔ ta dɛ́ ba chɔg Bɔnsam toma bwa. 9 Nomɛlbwa waa ɛ Korowii bie la aa teŋɛ dɛɛ ɛ wechɔga kpa, dɛkalkɛŋɔ o ɛ Korowii dwee. Anomanta waa won teŋɛ dɛɛ ɛ wechɔga kpa, dɛkalkɛ o mɛɛɛ Korowii. 10 Anɔ taa yaa ba chega dɛ jemɛ banɔ la baa ɛ Korowii bii ne banɔ la baa ɛ Bɔnsam kwa. Nomɛlbwa waa wola wedɛɛga aa su Korowii siwi ɛ, kɛɛ waa wola o dɔŋ nyin la, o ta o bie ɛɛ. 11 Waa haa noa le mumpar laanee kɛŋɔ a chɛ kɛŋɔ ya nyin dɔŋa. 12 Ya bɛ ɛ kɛŋɔ Keen, waa ɛ o te Bɔnsam bie dɛ kpo o nime Abɛl la. Bɔkwaa gela o kpoo wɔ? O we-ɛɛla waa ɛa la aa wola were asɛ o nime kwaa do wer la, anee gela o kpoo. 13 Yabala, dɛ nɛra baa dɔ harɛ nɔ ta gbo liire hah heya aa, he bɛ gel a ɛ heyaa nyokpoa. 14 Ya jemɔ kɛŋɔ ya le seo nɔn ta dɛ ba dɔ mkpa, dɛkalkɛŋɔ ya dɛ nyin dɔŋa. Nomɛlbwa waa wola o dɔŋ nyin la ta lɔ seo nɔn ta. 15 Nomɛlbwa waa hah o dɔŋ la do kɛŋɔ nɛn waa dɛ kpoo nɛra ken. He jemɔ kɛŋɔ nomɛlbwa ge waa dɛ kpoo nɛra la ta Korowii mkpa aa wola jaga dɔe la dɔe. 16 Gɛ Yeesu Kristo aa koh ya waa dɛ kpɔ o te tɛ dɛ sewɛ la, a taa ya che dɛ jemɛ gɛ nyina aa doa. A chɛ kɛŋɔ ya ge koh yabala waa dɛ ge kpɔ ya te tɛ kɛŋɔ yaa sewɔɔ tɛɛ ba. 17 Dɛ nomɛl dɔ harɛ nɔ ta kwaa bwa, dɛ na o dɔŋ waa nyaa, dɛ laa sie kpɔ o nɛ aa, amɔ dɛ o dɛ nyin Korowii aa? 18 N bidɛɛga, he bɛ gel ya kpɔ wobol ne nyotor berɛ dɔŋa nyina. Kɛ hé gel ya we-ɛɛla bagle kɛŋɔ ya nɛnnyin ɛ kasinteŋ nyina. 19 Anɔ taa yaa ba wona jemɛ kɛŋɔ ya chegɔ tɛ kasinteŋ la. Anɔ taa yaa ba bambisɔɔhna dɔe Korowii sie. 20 Dɛ ya liire pa yaa bolchɔge aa, Korowii gwaa ya liire dɛ jemɛ komɛlbwa. 21 Anomanta, yabala, dɛ ya liire aa yaa bolchɔge pa te naa, amɔ ya dɔ bambile dɛ́ che Korowii sie, yaa wola ɔmɛ. 22 Komɛlbwa yaa soŋo la, o dɛ tɛ yaa, dɛkalkɛŋɔ ya dɛ no o waa dɛɛ ɛ anɔ la aa dɛ su o siwi. 23 Waa Korowii aa dɛ ŋɔ ya be laanee kɛŋɔ yá yarada o Bie Yeesu Kristo la, dɛ nyin dɔŋa gɛ waa ŋɔ ya be la. 24 Nomɛlbwa waa dɛ no Korowii waa la, o kpɔ o te dɛɛ pɛl Korowii, asɛ o ge lawɔ dɛɛ pɛl o nɛ. Korowii Domadɛɛge la waa kpɔa tɛ yaa la gelɔ ya jemɛ kɛŋɔ ya bwa ɛ beŋkpoŋ.
