1 Jn 2

1N bidɛɛga, n chwerɛ waa nɔ dɛɛ tɛ heya, asɛ he bɛ wechɔga dɛɛ ɛ. Kɛ dɛ nomɛlbwa garɔ ɛ wechɔga aa, ya dɔ nomɛl o do ya Mɛɛ waa lɔ nyundua la be dɛ́ soŋe ya wechɔga dɛɛ tɛ yaa. Onee Yeesu Kristo la. O ɛ nɛŋkaih. 2Onee koh ya wechɔga waa dɛ sewɛ tɛ yaa dɛ kwaa ya ne Korowii baah. Ya gbo wechɔga waa laa o sewɛ. Nomɛlbwa waa lɔ harɛ nɔ ta bwa jao. 3Ya teŋɛ o waa ta naa, anee dɛɛ ba yaa bagla kɛ ya jemɔ. 4Dɛ nomɛlbwa ŋɔ o jemɛ Korowii, dɛ waa o waa ta teŋaa, gɛ nɛn la ɛ nyosonteŋni, dɛ kasinteŋ toole o be. 5Nomɛlbwa waa dɛ teŋɛ Korowii waa ta la, onee dɛɛ nyin Korowii waa kɛrɛdɛ. Anɔ taa yaa ba chega dɛ jemɛ kɛ ya ne Korowii pɛo. 6Nomɛlbwa waa ŋɔa o ne Korowii pɛo la, a chɛ kɛŋɔ o kpɔ Yeesu Kristo da la. 7Yabala, waa nɔ maa dɛ chwerɛ heyaa nɔ ta wefala ɛɛ. Webena la yaa bagle heyaa le mumpar la, anee ta. 8Kɛ ŋwɛnɛ bɛl ge ta la, a ɛ wefala, dɛkalkɛŋɔ biro dɛ kaa. Bochaah tenten balɔ asɛ bɔr ɛɛ chaah kɛrɛdɛ. Yeesu we-ɛɛla ne he gbagba we-ɛɛla bagle a gɛ waa nɔ mun. 9Nomɛlbwa waa ŋɔa o lɔ bochaah ta kɛ dɛ hah o dɔŋ la ta lɔ biro tenten ta. 10Nomɛlbwa waa dɛ nyin o dɔŋ la do kɛŋɔ nɛn waa lɔ bochaah ta. Bochaah la nomanta, komɛlbwa toole dɛ gel o lɔ nakpala dɛ chole. 11Nomɛlbwa waa hah o dɔŋ la do kɛŋɔ nɛn waa lɔ biro ta. O dɛ valɛ, kɛ waa jemɛ bela waa dɛ kaa, dɛkalkɛŋɔ biro la gelɔ o nyoŋe. 12N bidɛɛga, n chwerɛ waa nɔ dɛɛ tɛ heya, dɛkalkɛŋɔ Korowii koh Yeesu waa dɛ kpɔ he wechɔga kɛ heya. 13Nomonome, n chwerɛ waa nɔ dɛɛ tɛ heya, dɛkalkɛŋɔ heyaa jemɛ naate waa lole le mumpar bwa la. Bonɔɔna, n chwerɛ waa nɔ dɛɛ tɛ he ge, dɛkalkɛŋɔ he pɔ Bɔnsam nɛ. 14N bidɛɛga, n chwerɔ dɛɛ tɛ heya, dɛkalkɛŋɔ he jemɛ ya Mɛɛ waa lɔ nyundua la. Nomonome, n chwerɔ dɛɛ tɛ heya, dɛkalkɛŋɔ he jemɛ naate waa lole le mumpar bwa la. Bonɔɔna, n chwerɔ dɛɛ tɛ heya, dɛkalkɛŋɔ he bwaraa kpega, Korowii waa la do he bambile bini. Heyaa wona pɔ Bɔnsam nɛ. 15He bɛ gel he sie lɛ waa aa dɛ lɛ nɛra baa dɔ harɛ nɔ ta gbo liire sie la ne harɛ nɔ ta kwaa ta. Dɛ he sie dɛ lɛ a gɛ kwaa la ta naa, dɛ haa he Mɛɛ waa lɔ nyundua la waa nyin. 16Bwadabii pɛlchɔga kwa, ne anɔ la aa ɛ siwi pɛla kwa, ne waa yaa nyina dɛ́ kpɔa dɛɛ maŋkura ya te la ɛ harɛ nɔ ta wa. A ta ya Mɛɛ waa lɔ nyundua la be leɛ. 17Harɛ nɔ ne o pɛla kwaa bwa sekwaraa dɔ jaga. Naate waa dɛ ɛ anɔ la Korowii aa dɛ nyin la gbosoo dɛɛ ba le doe saŋ bɛlbwa. 18N bidɛɛga, wobɛlbwa jaga saŋ telo. He noɔ kɛŋɔ Yeesu Kristo dɔm tenten la ɛɛ bao. Hale taraken o dɔma dɔɔ warɛ dɛ ba. Anomanta ya jemɔ kɛŋɔ wobɛlbwa jaga saŋ telo. 19Dɛ bane fa ja ya nɛ, kɛ dɛ ba ta denɛ ɛ ya bini bane, dɛkalkɛ ba chwao. Dɛ ba fe ja ya nɛ aa, ya ne ba fe ta pɛo. Kɛ ba chwao, asɛ a den bagle kɛŋɔ ba bini bɛlbwa ta ya nɛɛ jae. 20He te dɔ Domadɛɛge la he nɛɛ dɛ le Korowii Bidɛɛge be, dɛ jemɛ o kasinteŋ waa la bwa. 21Kasinteŋ bɛ jema waa laa n chwerɛ tɔn nɔ baa tɛ heya. He jemɛ kasinteŋ la, dɛ jemɛ kɛŋɔ nyosone ne kasinteŋ aa valɛ bwa. 22Amɔ umee ɛ nyosonteŋni ɔ? Nyosonteŋnii naate waa ŋɔa Yeesu laa Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la. A gɛ nɛn la, onee Yeesu Kristo dɔm tenten. Onee vɛh ya Mɛɛ waa lɔ nyundua ne o Bie bwa. 23Nomɛlbwa waa dɛ tɔŋle kɛŋɔ Yeesu laa Korowii Bie Kristo la, waa won yerɛ Korowii o Mɛɛ. Gɛɛ a do, nomɛlbwa waa sɛah ŋɔ Yeesuu Korowii Bie la, o Mɛɛɛ Korowii. 24Hé kpoŋe anɔ la haa noa dɛ le mumpar la bini. Dɛ he ɛ gɛ naa, saŋ bɛlbwa he ne Yeesu ne o Mɛɛ bwa ɛɛ wonoo pɛ ba kpoŋe heya. 25Dɛ ya ne Yeesu ne o Mɛɛ wono pɛ aa, a taa yaa ba chega dɛ dɔ Korowii mkpa aa wola jaga dɔe Yeesu aa bagɛ yaa nyoa la. 26Nɛra baa dɛ ba dɛ́ fee baa negre heyaa la waa n chwerɛ gɛ waa nɔ dɛɛ tɛ heyaa la, ba bɛ won dɛ negre heya. 27Yeesu Kristo aa dɔa tɛ heyaa Korowii Domadɛɛge o do he bini nɔ, haa nomɛlbwa nyin o bagle heyaa waa kpa. O Doma la dɛ bagle heyaa wobɛlbwa. O ɛ kasinteŋ te, waa nyosone teŋe. Hé no anɔ la waa dɛ bagle heyaa la, asɛ dɛ kpɔ he te pɛ Yeesu Kristo nɛ. 28N bidɛɛga, hé gel he ne Yeesu Kristo pɛ, asɛ o baa forɛ le awola aa, ya bɛ ɔmɛ, asɛ sihiih bɛ yaa kpo o sie awola waa ba la. 29He nao kɛŋɔ Korowii ɛ nɛndɛɛge, anomanta nomɛlbwa waa dɛ ɛ wedɛɛga aa su Korowii siwi la ɛ Korowii bie.

will be added

X\