1 Krent 8

1A ka kwaa baa kpoora dɛɛ tɛ voga wa. A waa jema te, ya bwa jemɛ a wa. Kɛ nɛwɛnyini wejema gelɔ wɛɛ nyin sɔn. Asɛ nɛnnyin ge ɛ chae. 2Nomɛlbwa waa dɛ lii kɛŋɔ o ɛ wejereme la, o ta wejema aa chɛ kɛ o jemɛ la dɔe mɔɔ. 3Naate waa dɛ nyin Korowii la te, Korowii gba jemɔ. 4Anomanta vog kwaa dii maa dɛ bol a waa nɔ, ya jemɔ kɛ voga ta komɛlbwa ɛɛ harɛ nɔ ta, Korowii beŋkpoŋii lole. 5Kwaa nɛra aa kpɔa ɛ Korowii dɛɛ yera ba dɔɔranar la warɔ dɛ do nyundua ne harɛ. 6Kɛ ya te be, Korowii lɔ beŋkpoŋ. Onee N Naa Korowii waa ta komɛlbwa, asɛ ya do le dɛɛ tomɔ la. Ya Dɔɔ ge lɔ beŋkpoŋ. Onee ya Dɔɔ Yeesu Kristo. O nɛɛ Korowii che dɛ ta komɛlbwa, asɛ ya ge che o nɛɛ dɛ dɔ mkpa. 7Nomɛlbwa laa jemɛ gɛ. Bane duu gɛ voga nɔ bigri a man ba. Hale ba le fini, dɛ ba di kwaa baa kpoora tɛ voga nɔ naa, dɛ ba liire dɛ ɛɛ ba kɛŋɔ voga laanee dɔ kwaa la. Ba yarada aa wola kanɛ Yeesu waa la ta nomanta, dɛ ba dɛ lii kɛŋɔ ba ɛ wechɔga. 8Ya kondikwaa yaa dɛ dia laa dɛ gel ya ɛ nɛndɛɛga Korowii be. Dɛ ya dɛ dia oo, ya dɛ kia oo, aa wobɛlbwa bagle. 9Kɛ a ne a bwa hɛ́ɛ nyiŋi kɛrɛdɛ kɛ dɛ he ta an kie, he dɛ dia aa, he bɛ gel he we-ɛɛla negre nɛra ba yarada aa wola kanɛ Yeesu waa ta ba kia la. 10Nɛn o yarada aa wola kanɛ Yeesu waa ta la, o na he nɛn haa jemɛ Yeesu waa la kɛrɛdɛ soge vog mun dɛɛ di kwa aa, aa geloo o ge di. 11He gelɔ he dɔŋ waa wola kiŋkiŋ chegɛ, Yeesu Kristo aa koh o waa sewɛ, ɛɛ ba he wejema ne daŋra dɛ nyogre aa? 12Dɛ he dɛ ɛ he bala ba yarada aa wola kanɛ Yeesu waa ta la wechɔga ken asɛ ba tea bini chɔg aa, Yeesu Kristoo hɛɛ ɛ wechɔga la. 13Dɛ n nao kɛ kondikwaa maa dɛ di la ɛɛ geloo n dɔŋ ge di a kaa o ne wechɔga ta naa, amɔ te mɛɛ gel a dii asɛ n dɔŋ ge bɛ di dɛ ba kaa wechɔga ta.

will be added

X\