1 Krent 7

1He fa chwerɛ tɔn dɛ ba bɔɔ mɛ ŋɔ, dɛ baa ŋɔ waa haahnee mo aa, a wer aa? Baa ŋɔ waa haahnee mo aa, a wer. 2Kɛ jwamane aa wara la nomanta, a chɛ kɛŋɔ baa bɛlbwa dɔ o haah, asɛ haah bɛlbwa ge dɔ o jaa. 3Baa bɛlbwa bɛ ŋɔ o ne o haah naa chɔ, gɛɛ haah ge bɛ ŋɔ waa sɛh o ne o jaa chɔ. 4Haah ta o bwadabii kpegri dɔe chɔe bɔr, o jaaree dɔ. Gɛɛ baa ge aa wola o bwadabii kpegri dɔe, o haahnee dɔ. 5Anomanta bɛlbwa bɛ o te kpɔ sɔh o dɔŋ chɔe be pera, atane kɛŋɔ he bwa sɛoh kɛŋɔ he dɛ nyin kɛ he kpɔ bambibeŋkpoŋ soŋe Korowii tɔpere bɛl tama mɔɔ. Gɛ te wer. Kɛ dɛ he ɛ gɛ tonaa, hé berɛ pɛ ja. Dɛ he ta pɛɛ yaa, haa wola won lawɛ he te la, Bɔnsam ɛɛ geloo he ɛ wechɔga. 6Waa nɔ maa bagla nɔ ta denɛ dɛɛ do heyaa ŋɔ a chɛ kɛŋɔ he mo haahna. Kɛ n dɛ bagle kɛŋɔ dɛ he mo haah naa, a ta wechɔga ɛɛ. 7N te fe dɛ nyin kɛŋɔ nomɛlbwa fee bɛ haah mo, dɛ so gɛ maa soga nɔ. Kɛ nomɛlbwa laa Korowii ta ŋɔ ó gbo so dɛ bɛ haah mo. O dɛ tɛ nomɛlbwa o we-ɛɛla waa dɛ ɛ la kpegri, bɛl yon do kpegri anɔ ta, bɛl ge do kpegri anɔ ta. 8Waa maa dɔa dɛ tɛ nɛra baa wola haahna dɔe, ne haahna baa wola jaranar dɔe, ne nɛra ba jaranar aa serewa laanee kɛ bá fee so gɛ n gbo aa soga nɔ. 9Dɛ bɛlbwa nao kɛŋɔ waa won haŋre dɛ gbo so te naa, amɔ ó mo haah kɛɛ ó yalɛ. A bɔ kɛŋɔ haah kɛɛ baa pɛla aa dɔe aa we he nɛɛ kohona. 10Anɔ la maa bera dɔ dɛɛ tɛ hahmoola ne jadɔɔhnaa nɔ. N gbagba laa dɛɛ bol. Ya Dɔɔree ŋɔa ŋɔ haah bɛ o jaa vɛh. 11Kɛ dɛ o vɛh o jaa raa, o bɛ baa bɛlbwa yalɛ kpa, atane kɛŋɔ o berɛ la o jaa la be asɛ ba ka pɛ dɛ so ja. Baa ge bɛ o haah vɛh. 12N gbagbaa dɛɛ bol anɔ te dɛɛ tɛ he kar la. Ya Dɔɔ laa bola. Dɛ he ɛ asɔre te dɛ mo haah waa wola asɔre te ɛɛ, a too o tea o ŋɔ wɛɛ soo waa, bɛ on vɛh. 13Dɛ haah ge ɛ asɔre te dɛ yalɛ baa waa wola asɔre te ɛɛ, dɛ o tea toorɔ kɛŋɔ o ne wɛɛ soo waa, haah la bɛ on vɛh. 14Baa waa wola asɔre te ɛɛ la, o mo haah waa ɛ asɔre te aa, pɛɛ o ne haah la aa pɛa la nomanta, Korowii kpɔ baa la dɛɛ ɛ o nɛn. Gɛɛ a do, haah ge ta asɔre te ɛɛ dɛ yalɛ baa waa ɛ asɔre te aa, pɛɛ o ne waa pɛa la nomanta, Korowii kpɔ haah la ge dɛɛ ɛ o nɛn. Dɛ gɛ laa aa, he bii fe ta Korowii bii ɛɛ, kɛ taraken ba ɛ o kwa. 15Dɛ onɔ la waa wola asɔre te ɛɛ ŋɔ wɛɛ vɛh o dɔŋ waa ɛ asɔre tee yaa, tɛo ŋwɛnɛ wɛɛ la. A ba gɛ naa, a ta wechɔga ɛɛ. Korowii dɛ nyin kɛŋɔ ya so deŋnesɔɔhna ta. 16Dɛ Korowii ɛɛ che haah haa ɛ asɔre te nɛɛ dɛ lɛ he jaa raa, he jemaa? Gɛɛ a do baa haa ɛ asɔre te la nɛɛ kɛŋɔ Korowii ken ɛɛ che he nɛɛ dɛ lɛ he haah naa, he jemaa? 17Korowiirii tɛ bɛlbwa o we-ɛɛla wɛɛ ɛ. Anomanta a chɛ kɛŋɔ bɛlbwa ɛ gɛ Korowii aa leo dɛ tɛo ŋɔ wɛ́ɛ ɛ la. Gɛɛ mɛɛ bol asɔre tena baa lɔ bobɛlbwa la be. 18Dɛ ba kpɔ kere chɔgɛ nomɛl mɔɔ Korowii leo o ba ɛ asɔre te aa, o bɛ kpɔ sɔh. Korowii le nomɛl ge, dɛ ba ta kere kpɔe chɔgɔ waa, o bɛ gel ba kpɔ kere chɔgɔ. 19Ba kpɔ kere chɔgɛ noo, a ta waane ɛɛ, ba ta kere kpɔe chɔgɛ noo, a ta waane ɛɛ. Kɛ Korowii Waa la ta teŋaa ɛ kasinteŋ. 20Anomanta do gɛ haa doa mɔɔ Korowii lee he ba ɛ asɔre te la. 21Dɛ he ɛ yom dɛ ba ɛ asɔre te aa, bɛ gel a we he nɛ. Kɛ dɛ ba tɛɛ ŋwɛnɛ ŋɔ hé le he yom ɛɛ la ta naa, bɛ vɛh. 22Nomɛlbwa waa ɛ yom dɛ ɛ asɔre te la, o dɔ o te Korowii be. Gɛɛ a do, nomɛlbwa waa dɔ o te dɛ ba ɛ asɔre te la, o ɛ Yeesu Kristo yom. 23Korowiirii kpɔ Yeesu Kristo chal la yawɛ heya, anomanta he bɛ lii kɛŋɔ nɛraa dɔ heya. 24Yabala, gɛ he faa doa mɔɔ Korowii le heyaa he ba ɛ asɔre tena la, hé ta do gɛ, asɛ he ne Korowii do le. 25Korowii ta men nɛra baa wola yalɛ la waa baglɛ, kɛ o dɛ cha mɛ asɛ mɛɛ ɛ o toma kɛrɛdɛ. Anomanta mɛɛ bagle gɛ maa jemaa. 26Waa lole dɛ dawɛ ya nɛɛ kɛrɛdɛ, anomanta n te be te, a wer kɛ gɛ haa soga la, hé ta so gɛ. 27Dɛ he dɔ haah naa, bɛ ŋɔ hɛɛ vɛoh. Dɛ he ta bɛl dɔe ge aa, bɛ ŋɔ hɛɛ nyin bɛlee. 28He mo haah naa, a ta wechɔga ɛɛ. Dɛ haah ge yalaa, a ta wechɔga ɛɛ. Kɛ waa lɔ a ta he soga bini, a waa mɛɛ nyin n lɛ heyaa le a ta la. 29Maa ŋɔ gɛ nɔ, yabala, yaa harɛ nɔ taa bigri bɛlbwa. Anomanta le fini dɛɛ kaa, a chɛ kɛŋɔ he banɔ la haa dɔ haahna la ɛ kɛŋɔ he ta haahna dɔe ken, 30he banɔ la haa dɛ wi ɛ kɛŋɔ he waa aa sume ken, he banɔ la ge haa dɛ mamɛ ɛ kɛŋɔ he sie ta lɛɛ ken, he banɔ la ge aa dɛ yawɛ la ɛ kɛŋɔ kwaa haa yawa la ta he kwaa ɛɛ ken. 31Asɛ he banɔ la ge haa dɛ ɛ wobɛlbwa harɛ nɔ ta la bɛ ɛ a gwaa kohona, dɛkalkɛŋɔ harɛ nɔ ne o waa dɔ jaga. Waa bigri bɛlbwa. 32N dɛ nyin kɛŋɔ harɛ nɔ ta waa bɛ heyaa ha kohona. Baa waa wola haah dɔe la, o siwi dɛ swɛɛ Korowii toma ta, wɛɛ nyin kɛŋɔ Korowii sie lɛ o nɛ. 33Kɛ baa waa dɔ haah la te sie dɛ begre harɛ nɔ ta kwaa ta, ásɛ o haah sie ɛɛ lɛ o nɛ. Webele anɛɛ yon do o baŋa. 34Haah waa wola yalɛ, kɛɛ tolo, o sie dɛ begre Korowii toma ta, o kpɔ o te ne o liire bwa dɛɛ tɛ Korowii toma. Asɛ haah waa yala la ge sie ɛɛ begre harɛ nɔ ta kwaa ta ásɛ o jaa sie lɛ o nɛ. 35N dɛ nyin kɛ n cha heya, a waa gela mɛɛ bol waa gɛ la. Maa nyin kɛŋɔ he ŋwɛnɛ tɔ. N dɛ nyin kɛŋɔ he ɛ anɔ la aa wera ásɛ he liire bwa won do Korowii toma ta. 36Dɛ baa bɛlbwa dɔ o bihaah waa kpega ne yala, o ŋɔ waa gel o yalɛ, dɛ berɛ na kɛŋɔ a wer kɛŋɔ bie la yalaa, ó ɛ gɛ bwa waa dɛ nyin. Ó gel o yalɛ. A ta wechɔga ɛɛ. 37Dɛ baa bɛlbwa nyiŋi gɛ waa nɔ kɛrɛdɛ dɛ ŋɔ waa o bihaahnee kpɔ tɛ baa bɛlbwa ó mo aa, dɛ nomɛl laa hɛo, dɛ o gbagba bambile binii a le, asɛ o ta on kpɔe tɛ baa laa, o ɛ wa. 38Anomanta, dɛ nomɛl lawɛ o bihaah tɛ baa o mo aa, o ɛ kɛrɛdɛ. Kɛ naate waa wola o bihaah lawɛ tɛ baa ó mo la ɛa kɛrɛdɛ gwaa o dɔŋ waa lawɛ o bihaah tɛ yal la. 39Dɛ haah yalɔ, o jaa ta do le naa, baa laanee dɔ haah la kpegri. Kɛ dɛ baa la sewaa, o ta haah la kpegri dɔe kpa. Haah la won kaala dɛ ka yalɛ baa waa dɛ nyinu ja. Kɛ o bɛ baa waa wola asɔre te ɛɛ yalɛ. 40A ka n waa aa, dɛ o fe ta yalɛ kpa kwaraa fe wer tɛo gwaa kɛŋɔ waa yala. N gbagba liire te, kɛ Korowii Domadɛɛge la soge n nɛ.

will be added

X\