1 Krent 4

1A wer kɛ hɛɛ yerɛ yaa Yeesu Kristo bonɔɔna. Korowii bagle yaa o wesɔɔhla dɛ kpɔ do ya nɔn ta ŋɔ yáa bagle nɛra. 2Waa aa chɛ nɛn baa kpɔ waa do o nɔn ta laanee kɛŋɔ o gel o waa dɔ kasinteŋ. 3Dɛ he dɛ kpɛɛ mɛ kɛɛ he dɛ chɔg mɛ noo, n waane laa. Nɛwɛnyini laa dɛ won bol n waa dɛ pa mɛ bole. N gbabir aa won kpɛɛ n te dɛ chɔg n te. 4N ta wechɔga bɛlbwa nae n waa bini te, kɛ a ta baglɛ kɛ mɛɛ di bolee. N Dɔɔ Yeesu Kristoo dɛɛ ba n waa bola dɛ pa bole. 5Anomanta he bɛ nomɛlbwa kpɛɛ kɛɛ dɛ chɔgo ka tel kɛŋɔ Yeesu Kristo aa ba. Dɛ o balaa, wobɛlbwa aa sɔah la ɛɛ le bochaahnee, wedɛɛga oo, wechɔga oo, a bwa ɛɛ leo, asɛ wobɛlbwa aa sɔah dɛ do nɛwɛnyini bambile bini la chɔ baŋ, asɛ Korowii kpɛɛ nomɛlbwa gɛ aa chɛo. 6Yabala, n kpɔ toma n ne Apolos aa ɛa la dɛ che a ta dɛ bagle waa nɔ, ásɛ he no a mun dɛ jemɛ waa aa wera kɛŋɔ he ɛ. Ba chwerɛ Korowii Tɔn bini ŋɔ: He bɛ ɛ garɛ gɛ baa chwera Korowii Tɔn bini la. He bɛ bane kpɔ gwaa bane dɛ́ɛ maŋkura he te. 7Umee ŋɔ he be ŋɔ he gwaa bane ɔ? Wobɛlbwa haa jema la, Korowiirii tɛɛ. Bɛ nyoa dɛɛ ta a do kɛŋɔ Korowii laa kpɔ waa haa jema la kɛɛ. 8He dɛ lii kɛŋɔ he dɔ komɛlbwa a magre he ne, he ɛ dɔɔhna. He berɔ garɛ yaa dɛɛ di kora. Dɛ he fe dɛ di kora kpela te naa, a fe bɔ. Ya ne he bwa fe ɛ koranar. 9N te be, Korowii gelɔ ya banɔ nɔ yaa ɛ Yeesu toroma nɔ ka mun, dɛ do kɛŋɔ nɛra baa lag ba dɛɛ la ka kpoo ba, asɛ nɛra bwa ɛɛ nyiŋ ba, dɛkalkɛŋɔ nyundua toroma ne nɛra bwa dɛ nyiŋi yaa. 10Yeesu Kristo nomanta ya ɛ gɛna nɛra be, kɛ he dɛ yerɛ he te wejerema o waa ta. Ya ɛ nɛŋgwɛgra nɛra be, kɛ he ɛ he te o kpegnɛra. Ba dɛ duu heya, dɛ lawɛ ya te sie dɛɛ tegɛ harɛ. 11Lɔr ne nyɔgre dɛ kpo yaa, yakwanee yaa tɔ, nɛra ɛɛ lɔɔ yaa, ya ta sobɔr dɔe dɛ kpoŋe ba le fini. 12Ya bokpega taa yaa di. Nɛra hah yaa dɛɛ chɛgre yaa, kɛ ya te soŋe wedɛɛga dɛɛ tɛɛ ba. Ba dɛ ɛ yaa hɔhɔrɔwa, kɛ ya te sɔɔh bwara dɛɛ tɛɛ ba. 13Nɛra dɛ chɔg ya sɔn, kɛ ya te dɛ kwaa ba sɔn. Ya do kɛŋɔ puldoa haahra nɛra be, hale ba le fini. 14N ta gɛ waa nɔ chwerɛ ba tɛ heyaa dɛ́ gel sihiih kpo heya, kɛ jae mɛɛ ja heya, haa ɛ n bidɛɛga maa dɛ nyin heyaa la nomanta. 15Dɛ he dɔ nɛra ba warɛ pirim dɛ won cha heyaa Yeesu Kristo ŋwɛnɛ ta naa, n gboo ta he mɛɛ. Menee tɔ sie bol Amanesoma la he be. A taa n che ɛ he mɛɛ Yeesu Kristo waa ta. 16Anomanta n dɛ soŋe heya, hé kpɔ n da. 17A waa gela n tomɛ Timoti he be la. O ɛ n bie maa dɛ nyinu, wɛɛ no n deŋna waa Yeesu Kristo toma nɔ ta. Wɛɛ lii heyaa gɛ maa dɛ teŋɛ Yeesu Kristo waa la ta. Gɛ maa dɛ bagle asɔrere ta bobɛlbwa laanee wɛɛ ba heyaa liira. 18He bane dɛ bagle he te dɛɛ lii kɛŋɔ maa ba dɛ ba na heyaa kpa. 19Dɛ Korowii sɛoh waa, aa bigri mɛɛ ba he bee dɛ gbagba ba na kpegri nɛra baa dɛ bagle ba te la aa dɔa. Ba wobol gbo ta laa n ŋɔ. 20Korowii Kora bini doe ta nyoa wobol pɛɛpɛɛ ɛɛ. O kpegri dɔe waa. 21Ɛrɛ balaa hɛɛ nyin kɛ n ba he be nɔ? Hɛɛ charɛ he daa asɛ n nyin he waa dɛ ba bambisɔn ne kɛɛ ń kpɔ chweema ba dɛ́ ba tɛr he deŋne ɔ?

will be added

X\