1 Krent 2

1Yabala, a gɛ saŋ n faa ba he be dɛ ba di Korowii waa danseɛ he be la, nyotor ne nɛwɛnyini wejema laa n kpɔ bol waa bagle heya. 2Maa lɔ he be la, dɛ maa nyin kɛ n kpɔ wejema ane ja n wobol ta, nemenɛ Yeesu Kristo seo waa sewa dagagre la ta la wa. 3N faa lɔ he be la, n ta kpegri dii he nɛ. Ɔmee ne bochela nee n ɛ toma he bini. 4N webagla bini la, n ta wejema kpɔe bol waa bagle heyaa ásɛ he sie lɛ. Kɛ Korowii Domadɛɛge laanee di n wobol la danseɛ dɛ gel a do kpegri. 5Anomanta nɛn wejema ta laa a che hɛɛ yarada Yeesu Kristo dɛɛ teŋɛ o nɛ. Korowii kpegri la taa a che. 6Ya dɛ bol wejema waa te dɛɛ bagle nɛra ba sie aa chaah Korowii waa ta kɛrɛdɛ. Wejema yaa dɛ bagle a waa nɔ ta harɛ nɔ ta nɛra ne ba nɛnjena wejema ɛɛ. Ba te ɛɛ ba ɛ pɛɛpɛɛ. 7Korowii wejema waa yaa bagle. A fa sɔɔh, nɛwɛnyini faa wola a waa jemɛ. A ɛ waa Korowii aa ɛa cheg yaa mɔɔ dɛ ta harɛ nɔ, ásɛ a ba cha yaa ya dɔ jirima. 8Harɛ nɔ ta nomonjena fa ta a gɛ wejema nɔ mun noɛ. Dɛ ba fe no a mun aa, ba fe ta gelɛ ba kpo ya Dɔɔ la waa dɔ jirima la dagagre ta. 9A gɛ waa nɔ waa ba faa chwerɛ dɛ ŋɔ, "Waa nomɛlbwa aa wola a dɔŋa nae, nomɛlbwa aa wola a waa noɛ, nomɛlbwa ge aa wola an liire laanee Korowii ɛ cheg nɛra baa dɛ nyin o wa." 10Kɛ Korowii chegɛ o Domadɛɛge la ta dɛɛ bagle yaa a waa ásɛ ya won no a mun. O Domadɛɛge la dɛ na wobɛlbwa bini kɛrɛdɛ, hale dɛ jemɛ Korowii wesɔɔhla gba. 11Nomɛlbwa aa o dɔŋ nyu bini jemɛ, nemenɛ naate gbagba. Gɛɛ a do nɛwɛnyini aa wola waa aa lɔ Korowii be jemɛ. O Domadɛɛge gbosoroo jemɛ o nyu bini. 12Ya te, liire yaa dɔa ta harɛ nɔ ta liire ɛɛ. Korowiirii kpɔa tɛ yaa. O kpɔ o Domadɛɛge tɛ yaa o do ya nɛ. Anee gela ya jemɛ kwaa waa tɛ yaa la. 13Yaa dɛ bol waa nɔ, yaa nɛwɛnyini wejema ta chegɛ dɛɛ bola. Korowii Domadɛɛge laanee dɛɛ bagle yaa waa yaa bol. Anɔ la waa bol la, anee ya ge kpɔ dɛɛ bagle o wa. 14Nomɛlbwa Korowii Domadɛɛge aa wola toole o nɛɛ la, o dɛ vɛh o Domadɛɛge la wa. A ɛ wesale tɛ naate, waa a mun no, dɛkalkɛŋɔ Korowii Domadɛɛge gboo gela nɛn ɛɛ no Korowii waa mun. 15Nɛn Korowii Domadɛɛge aa lɔ o nɛɛ la jemɛ wobɛlbwa ŋwɛnɛre. Kɛ nɛn waa wola toole o nɛɛ la aa won jemɛ naate waa lɔ o nɛɛ la ŋwɛnɛre. 16Korowii Tɔn bini ba pɛɛrɔ ŋɔ, "Nɛn besoo dɛ won jemɛ Korowii liire o? Umee dɛ won baglo waɔ?" Kɛ ya te dɔ Yeesu Kristo liire.

will be added

X\