1 Krent 15

1Yabala, hé gel n lii heyaa Amanesoma la n faa bola bagle heyaa asɛ he no dɛ taa teŋɛ a ta, 2asɛ a lɛ heyaa la wa. Dɛ yarada haa dɔa Amanesoma la ta la ɛ kpela, he ta an vɛɛh dɛ kpoŋe a bini kɛrɛdɛ gɛ maa bagle heyaa la te naa, amɔ te a lɛ heya. Dɛ gɛ laa te naa, amɔ dɛ he yarada la ɛ pɛɛpɛɛ. 3Gɛ Korowii aa bag mɛ laanee n bagle heyaa la. O bagle waane aa ɛ wejena kɛŋɔ gɛ Yeesu aa koh ya wechɔga waa dɛ sewɛ gɛ Korowii Tɔn aa bagle o waa mɔɔ a ɛ la. 4Ba hugo, asɛ a tɔpetooro wee la Korowii iru seo ta. Gɛɛ Korowii Tɔn bagle mɔɔ a ɛ. 5Pitaa tɔ sie nao, mɔɔ o habɔteŋra fi dɛ banɛ la bwa nao, 6mɔɔ o habɔɔ nɛra lafraanue la ge nao kerabeŋkpoŋ. Ba galga ta lole ba le fini, bane ge serewe. 7A habɔɔ la Jems nao, asɛ Yeesu toroma bwa nao. 8Menee ka mun nao. N do kɛŋɔ bechala o nya aa kpoŋe o tea o ta beɛ kɛrɛdɛ mɔɔ ba lolɔ la. 9Menee Yeesu toroma la bwa bechala n waa aa wola hiaih. N ta chɛɛ kwaraa kɛ ba yer mɛ o torome, dɛkalkɛ gɛ n faa hah asɔre tena dɛ ɛɛ ba hɔhɔrɔwa la aa were. 10Kɛ Korowii sune n nɛ, dɛ cha mɛ. Chae waa cha mɛ laanee gela n do gɛ maa doa nɔ la. O suna waa sune n nɛɛ la ta pɛɛ ɛɛ. N iro, asɛ dɛɛ ɛ o toma la kohona hale dɛ gwaa n bala kwara. N gbagba kpegri ne laa mɛɛ ɛ toma nɔ. Korowiirii sune n nɛɛ dɛ cha mɛ, asɛ mɛɛ ɛa gɛ la. 11Dɛ menee bol Amanesoma la bagle heya o, nɛra banee yoo, webeŋkpoŋii ya bwa ɛɛ bagle, anee he gee yarada. 12Dɛ ya bagle Yeesu Kristo waa ŋɔ Korowiirii iru seo ta naa, ɛrɛɛ he bini bane berɛ dɛɛ ŋɔ Korowii aa nɛraa ir seo ta nɔɔ? 13Dɛ Korowii aa nɛraa ir seo ta naa, amɔ te Yeesu gba ta seo ta ire. 14Dɛ Korowii ta Yeesu Kristo ire seo ta te naa, amɔ te waa yaa dɛ bagle heyaa la, ne yarada haa dɛ yarada Yeesu Kristo la bwa ɛ pɛɛpɛɛ. 15Dɛ gɛɛ te naa, amɔ te Korowii danseɛ yaa dɛ di la ta kasinteŋ ɛɛ, dɛkalkɛŋɔ ya dɛ bagle heyaa ŋɔ Korowiirii ir Yeesu le seo ta. Dɛ nɛra aa seo taa ir te naa, amɔ ya teŋe nyosone. 16Dɛ nɛra aa seo taa ir aa, amɔ te Korowii ta on ire seo ta. 17Dɛ Korowii ta Yeesu Kristo ire seo ta naa, amɔ te he dɛ yaradao pɛɛpɛɛ, dɛ he wechɔga ta lɔ he nɛ. 18A berɔ dɛɛ bagle kɛŋɔ nɛra ba faa dɛ yarada Yeesu Kristo mɔɔ dɛ serewe la, Korowii aa ban lɛ. 19Dɛ ya soga yaa soga nɔ gbo taa ya dɔ hwɛga Yeesu Kristo be naa, amɔ te ya waa sum gwaa nɛra bwa wa. 20Kɛ gɛ laa a do. Korowiirii ir Yeesu Kristo seo ta. Onee tɔ sie ir seo ta nɛra baa serewa la nɛɛ mɔɔ ba ge baa ir. 21Nɛmbeŋkpoŋii ba seo ne. Nɛmbeŋkpoŋ gee ba seo ta ira ne. 22Ya ne Adam bwa aa ɛ beŋkpoŋ la waa yaa serewe la. Gɛɛ a do ya banɔ la ge ne Yeesu Kristo aa ɛ beŋkpoŋ la ɛɛ ir seo taa dɛ dɔ mkpa. 23Kɛ ya bwa ne ya tɔperaa ya ir. Yeesu Kristoo tɔ sie ir mɔɔ, ásɛ ya banɔ la ya ne waa ɛ beŋkpoŋ la ge ir gɛ saŋ waa ba ja la, 24asɛ mɔɔ wobɛlbwa ba a jaga. A taa Yeesu Kristo dɔ kpegri dɛ pɔ konchɔga aa bea yaa wola an na bwa soosiwi nɛ, dɛ kpɔ kora la do o Mɛɛ Korowii nɔn ta ó di. 25Yeesu Kristo chɛ kɛŋɔ o di kpegri komɛlbwa waa lɔ harɛ nɔ ta nɛɛ ka tel kɛŋɔ waa pɔ o dɔma bwa nɛ. 26Dɛ o baa pɔ ba bwa nɛɛ tonaa, o dɔm muŋkaa waa pɔ o nɛɛ laanee seo. 27Ba chwerɛ Korowii Tɔn bini ŋɔ, "Korowii gelɔ o dɔ komɛlbwa kpegri." Dɛ ba ŋɔ, "O gelɔ o dɔ komɛlbwa kpegri" aa, a ta baglɛ kɛŋɔ o dɔ o Korowii waa dɔ kpegri la dɛ kpɔ tɛo o di la ge kpegri. 28Dɛ Korowii baa ɛ gɛ tonaa, o Bie gee kpɔ o tenee do o Mɛɛ Korowii waa kpɔ komɛlbwa kpegri tɛo la lɔga, asɛ Korowii gbo ɛ kpegri bwa dɔɔ. 29Nɛra bane chegɛ lala naa ta dɛ gel baa sɔ ba Korowii ne. Bɔkwa waa baa ɛ gɛ nɔɔ? Dɛ lala aa seo taa ir aa, bɔkwa waa gela ba gel ba ɛ gɛ dɛɛ tɛɛ baɔ? 30Bɔkwa waa ya gee jo siswɛm waa ta saŋ bɛlbwa nɔɔ? 31Yabala, kpelaa mɛɛ ŋɔ, dɛ maa siswɛm ta jo tɔpere bɛlbwa naa, amɔ te dɛ n laa yon dɛɛ kpɛɛ heyaa ya Dɔɔ Yeesu Kristo nɛɛ teŋa ta la. 32Gɛ nɛra faa ɛɛ mɛ Ɛfesos la do kɛŋɔ n ne kpɔg bini olchɔga aa yoa ken. Dɛ harɛ nɔ ta waa gbo waa n ne ba yo aa, bɔkwa tɔnɔɔ n dɔ a ta nɔ? Dɛ nɛra aa seo taa iraa, ya fe ɛɛ ŋɔɔ hé gel ya ir dɛ di kwaa dɛ lɛ sie, dɛkalkɛŋɔ tɔpebɛl yaa sewɔɔ. 33He bɛ gel nɛra ɛɛ negre heya. Danchɔge kpɔe dɛ chɔg dadɛɛge. 34Anomanta hé ir dɛ gel he sie chɔ harɛ hɛɛ ɛ kɛrɛdɛ, dɛ bɛ wechɔga dɛɛ ɛ. He bini bane aa Korowii waa jemɛ kɛrɛdɛ. A ta sihiih ɛɛ tɛ heya aa? 35He bini bɛl ɛɛ bɔɔroo ŋɔ, "Ɛrɛɛ lala ɛɛ ba wona ir seo ta nɔ? Ɛrɛɛ ba bwara ɛɛ ba doe yɔ?" 36Gɛne! Komɛlbwa haa du la, o dɛ pɔh mɔɔ dɛ le. 37Komɛlbwa haa du la, dɛ mea yoo, kon waa dɔ bii yoo, o papooni laa hɛɛ du. O bii hɛɛ du, asɛ o yon ɛ papooni dɛ le baŋ. 38Korowiirii dɛɛ begra gɛ a bwa soosiwi aa doa gɛ waa dɛ nyin. 39Bwadabii bwa ta beŋkpoŋ ɛɛ. A bwa ne a soosiwii. Nɛwɛnyini bwadabii korɛ ola kwaa ta. Asɛ pɛŋa ge kwaa korɛ jumbii kwaa ta. 40Korowii doa kwaa lole, asɛ harɛ ta ge kwaa do le, kɛ a wer korɛ dɔŋa ta. 41Wee wer korɛ korobie wer ta. Weweela ge wer korɔ. Hale weweela bini kwara, ane dɛ chaah gwaa ane. 42Gɛɛ nɛra seo ta ira ɛɛ ba doe. Bwadabii yaa dɔa nɔ, dɛ ya baa serewe aa, o bwa ɛɛ chɔgoo, kɛ bwadabii yaa dɔ dɛ ir seo ta la, o te aa chɔg bwa. 43Bwadabii yaa dɔa mɔɔ dɛ serewe la ɛɛ chɔgoo. O ɛ kompɛɛ baa hugo, kɛ Korowii ɛɛ leo seo taa asɛ o ɛ kondɛɛge. Kon baa hugo la aa kpegri bɛlbwa dɔ, kɛ Korowii ɛɛ iruu asɛ o do kpegri. 44Bwadabii yaa dɔɔ harɛ nɔ ta laanee baa ba huga, kɛ onɔ la Korowii aa dɛ ba ira seo ta la te ɛɛ korɔɔ. Gɛ harɛ nɔ ta bwadabii aa lole la, gɛɛ Korowii doa kon ge do le. 45Ba chwerɔ do Korowii Tɔn bini ŋɔ, "Korowii ta nɛnlogle, dɛ yerɔ Adam, asɛ o dɔ mkpa dɛ do le." Kɛ muŋkaa Adam la te ɛ Korowii doa nɛn dɛɛ tɛ mkpa. Onee Yeesu Kristo. 46Korowii doa bwadabii laa ya tɔ sie dɔ. Harɛ nɔ ta konee ya tɔ sie dɔ mɔɔ dɛ dɔ Korowii doa kon la. 47Nɛnlogle la, ba mao tee ne o ɛ harɛ nɛn. Asɛ nɛɛte la ge le nyundua. 48Gɛ onɔ la baa mao tee ne faa doa la, gɛɛ o nɛra ge do. Asɛ gɛ onɔ la waa le nyundua aa doa la, gɛɛ o ge nɛra do. 49Gɛ yaa le onɔ la waa le harɛ nɔ ta la, gɛɛ yaa ba onɔ la waa le nyundua la ge lee. 50Yabala, hé gel n ŋɔ he be, harɛ nɔ ta bwadabii aa won la Korowii be. Kon waa dɛ pɔh la ne onɔ la waa wola pɔh aa won pɛ. 51Hɛ́ɛ no, mɛɛ bagle heyaa wesɔɔhle bɛlee. Ya bwa laa dɛɛ ba serewa. Hale dɛ ya serewɔ oo, ya ta serewoo, Korowii ɛɛ begre ya bwa bwadabii kerabeŋkpoŋii. 52Aa ɛo wɔrɔbe nɛɛ kilo, gɛ saŋ Korowii bɛla aa ba si dɛ bagle waa bwa jaga la. Dɛ o sio waa, Korowii ɛɛ ir serewa laanee seo ta asɛ ba dɔ bwadabii waa wola pɔh, dɛ begre ya banɔ la yaa wola sewɛ dɛ ta so le la bwara, 53dɛkalkɛŋɔ a ɛ kpela kɛŋɔ bwadabii waa wola pɔh la chɛ kɛŋɔ o chig onɔ la waa dɛ pɔh la naa ta. A chɛ kɛŋɔ bwadabii waa wola sewɛ la chig onɔ la waa dɛ sewɛ la naa ta. 54Dɛ onɔ la waa wola sewɛ, waa wola pɔh la baa chig onɔ la waa dɛ sewɛ dɛɛ pɔh la naa ta naa, belaa waa baa chwera do Korowii Tɔn bini la ɛɛ ba kpela ɛɛ. Ba chwerɔ ŋɔ, "O kpɔ kpegri pɔ seo nɛ." 55"Seo, lee he kpegri dɔɔ jaɔ? Ɛrɛɛ hɛɛ ba ɛɛ dɛ won dɛ do yaa weweele ta nɔ?" 56Wechɔgaa gela seo ɛɛ do yaa weweele ta. Mmara yaa wola o ta teŋɛ la ge gelɔ seo dɔ kpegri ya nɛ. 57Korowii chɛ jam kohona. O tɛ yaa kpegri dɛ le ya Dɔɔ Yeesu Kristo be ásɛ ya pɔ seo nɛ. 58Anomanta, yabala maa dɛ nyin he wa, hé lawɛ waa la bini kiŋkiŋ dɛ bɛ gel wobɛlbwa ha heyaa asɛ he berɛ habɔɔ. Hé lawɛ ya Dɔɔ toma bini bambile bwa ne, dɛkalkɛŋɔ he koeh aa pɛɛ ɛɛ ba.

will be added

X\