1 Krent 13

1Dɛ n wono dɛɛ bol nɛra bwa ne nyundua toroma wobol, kɛ dɛ maa nɛn nyin aa, dɛ gbɔgaa mɛɛ do kɛŋɔ baa dɛ lɔ dawuro waa pera wɛɛ do gbɔga la. 2Hale n wono che Korowii kpegri la ta dɛɛ bol o waa la kɛrɛdɛ, dɛ jemɛ o wesɔɔhla bwa, dɛ dɔ sipila kɛrɛdɛ, dɛ che o kpegri la ta dɛ dɔ yarada dɛ́ won ŋɔ bwejen be ó chugri le o bug ta dɛ kaa bofale asɛ o chugri, dɛ maa nɛn nyin aa, dɛ n ta nɛn ɛɛ. 3Dɛ n wono kpɔ n komɛlbwa kɛ nyaara bá lɛ di, asɛ n berɛ koh Yeesu waa la waa dɛ sɛh ŋɔ mɛɛ geloo ba kpɔ nii fuuh mɛ, dɛ maa nɛn nyin aa, dɛ a ɛ pɛɛpɛɛ. 4Dɛ nɛn dɛ nyin nɛn aa, o dɔ bambile dɛɛ tɛ o bala, dɛɛ ɛɛ ba kɛrɛdɛ. Waa bɔweela ɛ. Waa o te nɛnjen yerɛ. Waa o te bagle. 5Waa waa sagasaga ɛ o bala be. Waa o gbo nyin, o dɛ nyin nomɛlbwa. O baah naa nɛra nɛɛ di warawara. Waa nɛn waa lɛɛ dɛɛ do o bini. 6Kasinteŋii dɛɛ lɛ o sie. O sie aa wechɔga ta lɛ. 7Dɛ nɛn dɛ nyin nɛn aa, wɛɛ pwɛr o tenee tɛo wobɛlbwa ta. O dɛ yaradao wobɛlbwa waa dɛ ɛ ta, dɛ dɔ hwɛga ne bambile wobɛlbwa ta. 8Nɛnnyin ta jaga dɔe. Korowii waa baa chegɛ o kpegri ta dɛɛ bol bwa ɛɛ tonɔɔ tɔpebɛl wee. Wobofala baa chegɛ Korowii kpegri ta dɛɛ bol bwa ɛɛ teŋoo tɔpebɛl wee. Wejema gee ba tonɔɔ. 9Ya waa yaa jema la ta jema bɛl ɛɛ, waa yaa chegɛ Korowii Domadɛɛge ta dɛɛ bol la gba ta bola bɛl ɛɛ. 10Anɔ la aa wera ka tonɛ la saŋ telaa, tama yaa dɔa taraken nɔ bwa ɛɛ tonɔɔ. 11Gɛ saŋ n faa ɛ bechala la, dɛ n dɛ bol bechawobol, dɛɛ ɛ bechawa, dɛɛ lii bechaliire. Kɛ maa baa kpeg dɛ ɛ nomoa la, n gel n bechawaa la bwa. 12Gɛ tentenee ya waa do taraken. A do kɛŋɔ yaa dɛ nyiŋi digi waa wola na kɛrɛdɛ ta ken. Dɛ tɔpere bɛl telaa, yaa naa kɛrɛdɛɛ kɛŋɔ a chɔ ya sie. Anɔ la bwa yaa jema taraken nɔ, anjena ta lɔ mun ta. Kɛ tɔpere la telaa, mɛɛ jemɛ wobɛlbwa gɛ Korowii aa jem mɛ la. 13Anomanta webele atoroo lole, yarada, hwɛga ne nɛnnyin. Kɛ nɛnnyinii gwaa a bwa.

will be added

X\