1 Krent 12

1Yabala, n dɛ nyin kɛŋɔ he jemɛ kpegri Korowii Domadɛɛge aa dɛ cha yaa ya dɔ la bini kɛrɛdɛ. 2He na kɛŋɔ gɛ saŋ he faa wola Korowii tomɛ la, dɛ he nyogrɔ dɛɛ tomɛ voga aa wola waa bol, kɛ dɛ a dɔ kpegri he nɛɛ hɛɛ toma. 3Anomanta n dɛ nyin kɛŋɔ he jemɛ gɛ waa nɔ kɛrɛdɛ, dɛ jemɛ kɛŋɔ nomɛlbwa waa dɛ bol waa Korowii Domadɛɛge la kpegri ne la, waa won taah Yeesu. Nomɛlbwa ge waa dɛ bol ŋɔ Yeesuu ya Dɔɔ la, dɛ Korowii Domadɛɛge la kpegrii gela wɛɛ ŋɔ gɛ la. 4Kpegri Korowii Domadɛɛge la aa cha nɛra ba dɔ la kogrɔ, kɛ Doma beŋkpoŋ laanee tɛ a bwa. 5Toma ya Dɔɔ aa bɔna tɛ yaa la kogrɔ, kɛ Dɔɔ beŋkpoŋ tomaa yaa ɛ. 6Wejema Korowii aa bɔna tɛ yaa la kogrɔ, kɛ Korowii beŋkpoŋii chegɛ ya bwa nɛɛ dɛɛ ɛ wobɛlbwa. 7Korowii Domadɛɛgee tɛ nomɛlbwa kpegri ŋɔ ó kpɔ dɛɛ cha o bala. 8O tɛ nɛra bane wejema, dɛ tɛ bane ge sipila. O Doma beŋkpoŋ laanee tɛ ba bwa a gɛ kpegri la, bá won bol waa dɛɛ bagle nɛra, 9dɛ gel bane che o kpegri la ta dɛ dɔ yarada kɛrɛdɛ, asɛ dɛ tɛ bane ge kpegri weela chaeh ta. 10O tɛ bane kpegri ba won nyokpowaa ɛɛ, asɛ bane ge won che o kpegri la ta dɛ won bol Korowii Wa. O gelɔ bane won jemɛ kon la soo waa dɛ ir nɛra nɛɛ ba che o ta dɛɛ ɛ wa, dɛ gel bane ge won bol wobofala, asɛ dɛ gel bane ge won wobofala mun bagla dɛɛ bagle nɛra. 11A gɛ waa nɔ bwa, Korowii Domadɛɛge beŋkpoŋ laanee tɛ nomɛlbwa kpegri o kpɔ dɛɛ ɛ gɛ la. Gɛ aa too o teaa o tɛ nomɛlbwa. 12Hé ta sie nyiŋi he bwadabii na, o ɛ kombir, kɛ o dɔ pegra, asɛ a bwa pɛ dɛ ɛ bwadabii beŋkpoŋ. Gɛɛ Yeesu Kristo do. 13Juda tena o, Grik tena o, yoma o, nɛra baa dɔ ba te noo, Korowii kpɔ o Domadɛɛge la sɔ ya bwa ne, asɛ ya ɛ beŋkpoŋ. O tentenee o gel ya bwa dɔ dɛ nyɔ do ya bini. 14Nɛwɛnyini bwadabii ta konsiwi beŋkpoŋ ɛɛ. O pegra warɔ. 15Dɛ he nakpala ŋɔ o ta nɔn ɛɛ nomanta o ta bwara ta jae yaa, dɛ nyosonee. O ta nɔn ɛɛ te, kɛ o ge ja bwadabii ta. 16Dɛ deŋne ge ŋɔ o ta siwi ɛɛ nomanta o ta bwadabii ta jae yaa, dɛ nyosonee. O ta siwi ɛɛ, kɛ o ja bwadabii ta. 17Dɛ bwadabii fe dɔ siwi gbo, deŋne ta jae yaa, ɛrɛɛ o fe ɛɛ ba waa noe yɔ? Dɛ bwadabii fe ɛ deŋne gbo o ta mee dɔe yaa, ɛrɛɛ o fe ɛɛ ba sɔɔh noe yɔ? 18Gɛ laa Korowii ta yaa. O do bwadabii pegra nɔ bwa, bɛlbwa ne o dobɔr. Onee saahna ɛa gɛ. 19Dɛ bwadabii fe ɛ konsiwi beŋkpoŋ gbo, pegra bɛlbwa toole o ta naa, o fe ɛ bwadabii aa? Akai. 20Ya bwadabii pegra la kogrɔ, kɛ bwadabii la te ɛ kombeŋkpoŋ. 21Siwi aa won ŋɔ nɔn be ŋɔ, "He ta n nɛɛ jae yaa, n gbo ɛɛ wonoo ɛ toma." Gɛɛ nyu ge aa wola won ŋɔ nakpala be ŋɔ, "He ta n nɛɛ jae yaa, n gbo ɛɛ wonoo ɛ toma." 22Bwadabii bobɛla yaa wola lii kɛŋɔ a kpegri la dɔ tɔnɔ. 23Bwadabii bobɛla yaa wola lii kɛŋɔ a wer laanee yaa nyiŋi kɛrɛdɛ. Anɔ la sihiih aa dɛ kpo yaa a waa yaa wola nyin kɛŋɔ nɛn na la, anee yaa tɔ a ta kɛrɛdɛ. 24Anɔ la aa wera te, a ta hiaih kɛŋɔ ya nyiŋi a ta kpa. Gɛɛ Korowii ɛ ya bwadabii ásɛ yaa heeh a gɛ bɔra yaa wola lii kɛŋɔ a waa hiaoh la. 25Korowii ɛa gɛ asɛ bwadabii la bini bɛ pegri, asɛ a bwa ɛɛ cha dɔŋa. 26Dɛ bwadabii bobɛl dɔ weela aa, dɛ bwadabii bwaa weela lawɛ la. Dɛ ba kpɛɛ bwadabii bobɛl aa, a dɛ do bwadabii la bwa som. 27He bwa ɛ beŋkpoŋ Yeesu Kristo bwadabii ta. He bwa pɛo dɛ ɛ o bwadabi. 28Korowii tɛ he bɛlbwa toma waa dɛɛ ɛ asɔre tena bini. Anɔ la aa tɔ sie, o ŋɔ bane ɛ Yeesu toroma; nɛɛ, dɛ ŋɔ báne che Korowii kpegri ta dɛɛ bol waa waa kpɔa bag ba; tooro, dɛ kpɔ bane ŋɔ báa bagle nɛra o wa, dɛ berɛ kpɔ bane ge ŋɔ báa ɛ nyokpowa, dɛ tɛ bane ge kpegri ŋɔ báa chah weela tena. Dɛ ŋɔ báne ɛɛ cha nɛra, báne ɛ nomonome dɛɛ tɔ nɛra sie, dɛ gel bane ge won wobofala bola. 29He bwaa ɛ Yeesu toroma aa? He bwaa won Korowii kpegri la ta chega dɛ bol wa aa? He bwaa won Korowii waa la bagla aa? He bwaa won nyokpowaa ɛɛ yaa? 30He bwaa won weela tena chaeh yaa? He bwaa won wobofala bola aa? He bwaa won wobofala mun bagla aa? 31Hé gel he sie begre asɛ hɛɛ nyin kpegri Korowii Domadɛɛge be ásɛ dɛ won cha nɛra ŋwɛnɛre aa wera kohona la ta. Mɛɛ bagle heyaa ŋwɛnɛ waa wera gwaa a bwa.

will be added

X\