1 Krent 10

1Yabala, n dɛ nyin kɛ n lii heya, ya naanar bwa nɛɛ Korowii bam la faa tɔ. Moo la aa teŋa la, ba bwaa kpɔ o baah kaa. 2A kaa ɛ kɛŋɔ ba faa sɔ ba bwa nee bam la ne moo la ta ásɛ ba ne Mosis pɛ. 3Ba bwa dɔ kondikwaa le Korowii kpegri ta dɛ di. 4A berɔ che Korowii kpegri ta ba dɔ nee dɛ nyɔ. Bwe taa ba dɔ nee la le. Kristoo bwe la, dɛ faa teŋɛ ba nɛɛ ba kaa. 5Kɛ Korowii sie ta ba galga nɛɛ lɛɛ, asɛ ba serewe perɛ kpɔg la baah bobɛla. 6A gɛ waa nɔ bwa ɛo dɛ́ gel ya jemɛ wa, asɛ wechɔga pɛla bɛ yaa dɔ gɛ a pɛla faa dɔɔ ba la. 7Ya bɛ voga dɛɛ tomɛ gɛ ba bini bane faa dɛ ɛ la. Mosis chwerɔ ŋɔ, "Nɛra la sogo dɛ kwaa ba voga, dɛ di kwa, dɛ nyɔ sen, dɛ ir sa sachɔga." 8Ya bɛ jwamane bɔ gɛ nɛra la bane faa ɛa asɛ Korowii kpoo ba bini kagboŋa fifraanɛ dɛ batoro tɔpebeŋkpoŋ la. 9Ya bɛ Korowii daah dɛɛ na gɛ bane faa daahno na asɛ o gel harɛ kpɔkpɔ ba ba serewe la. 10Ya bɛ waa nagre gɛ bane faa nagre waa asɛ nyundua torome ba kpoo ba la. 11Waa aa pu a gɛ nɛra la ɛo dɛ gel ba jemɛ wa. Mosis chwerɛ a wa, dɛ́ gel ya nɛra yaa lɔ harɛ nɔ aa ka tɔpere tamaa o chɔg nɔ ta nɔ jemɛ wa. 12Anomanta nomɛlbwa waa dɛ lii kɛŋɔ o chegɛ kiŋkiŋ Yeesu Kristo waa nɔ ta la, wɛ́ɛ nyiŋi kɛrɛdɛ dɛ bɛ naa ba lɔ. 13Nomɛlbwa dɛ na wekpega. Anomanta dɛ he dɛ na wekpega aa, he laa bɔ bere. Korowii waa dɔ yarada. Waa gel wekpega bɛlbwa gwaa he nɛɛ asɛ he horɛ. Wɛɛ bagle heyaa ŋwɛnɛ haa kpɔ dɛ won lawɛ bambile ka tel kɛŋɔ haa le a nyoa. 14Anomanta, n daamanar, hé laa he te kpɔ voga waa ta. 15He ɛ wejerema, anomanta hé nyiŋi waa nɔ maa bola nɔ bini dɛ na. 16Saŋ bɛlbwa yaa pɛ so dɛɛ di kwaa dɛɛ lii Yeesu Kristo seo la la, sen la yaa dɛ jam Korowii dɛɛ nyɔ la gelɔ ya ne Yeesu Kristo pɛ o chal la waa ta. Paanoo yaa mɔna dɛɛ di la gelɔ ya ne o pɛ o bwadabii waa ta. 17Ya warɔ, kɛ paanoo beŋkpoŋ la yaa pɛa di la nomanta ya ɛ beŋkpoŋ. 18Hé ta sie dɛ na Juda tena wa. Nɛra baa dɛ di kwaa baa kpoora dɛɛ tɛ Korowii la, ba ta gɛ we-ɛɛla la ta jae yaa? 19N dɛ bagle kɛ kwaa baa kpoora dɛɛ tɛ voga la, a ne voga gbagba ɛ kwaane kɛɛ? Akai! 20N dɛ bagle kɛŋɔ nɛra baa wola Juda tena ɛɛ dɛɛ kpoo kwaa la, ba kpoorɔ dɛɛ tɛ Bɔnsam toroma yaa wola an na la. Korowii laa ba ɛ dɛɛ tɛ. Maa nyin kɛŋɔ he ne Bɔnsam toroma pɛ komɛlbwa. 21Haa won nyɔ sen la yaa dɛ nyɔ dɛɛ lii ya Dɔɔ waa la, dɛ berɛ ka nyɔ Bɔnsam toroma la kwa. He ne ya Dɔɔ aa won pɛ nɔn di kwa, asɛ he ne Bɔnsam toroma la ge berɛ pɛ nɔn di kwa. Aa gɛɛ magre! 22Hei! He dɛ nyin he mugli ya Dɔɔ baah o mee raa? Ya kpegri gwaalo waa? 23Nomɛl te kompɛɛ: "N dɔ ŋwɛnɛ kɛ n ɛ wobɛlbwa," kɛ a bwa laa wera tɛ mɛ, a bwa ge laa dɛɛ cha mɛ. 24Aa were kɛŋɔ nɛn gel o gbo waa hiaoh. A chɛ kɛ o gel o dɔŋ ge kɛrɛdɛ doe hiaoh. 25Dɛ ba dɛ yog ola ol yogribɔr aa, yawɛ dɛ di. Bɛ dɛɛ lii kɛŋɔ ane ken aa were. Hé yawɛ di, 26dɛkalkɛŋɔ "Korowiirii dɔ harɛ ne komɛlbwa aa lɔ o ta." 27Dɛ nɛn waa wola asɔre te ɛɛ yerɛ ŋɔ hé ba di kwaa he sɛh aa, kondikwaa bɛlbwa waa tɛɛ la, bɛ dɛɛ lii ŋɔ a ken aa were kɛŋɔ he di. Lɛ dɛ di. 28Kɛ dɛ nomɛl ŋɔ he be ŋɔ vogee ba kwaa, a kondikwaa yaa, naate waa bagle gɛ waa nɔ ŋɔ he bɛ di la nyu bini liire nomanta bɛ di, asɛ o bɛ ba lii kɛŋɔ he ɛ wechɔga. 29A ta wechɔga ɛɛ tɛɛ. Naate la waa n ŋɔ he bɛ di la, asɛ o liire bɛ on aahna-aahna ɛ. Ɛrɛɛ mɛɛ ba nomɛl nyu bini liire waa koeh dɛ gel waa maa dɛ ɛɔ? 30Dɛ n jam Korowii kondikwaa maa dɛ ba dii wa aa, nomɛlbwa bɛ men pwah kɛ maa di a gɛ kwaa la. 31Anomanta wobɛlbwaa hɛɛ ɛ oo, kwaa hɛɛ di oo, komɛlbwa hɛɛ nyɔ oo, hé ɛ dɛ kpɔ jirima dɛɛ tɛ Korowii. 32He bɛ gel nomɛlbwa daŋre he ne dɛ ba nyogre. Juda tee yoo, nɛnhɔɔh waa wola Juda te ɛɛ yoo, asɔre tee yoo, he bɛ ba bini bɛlbwa gɛ ɛ. 33Gɛɛ mɛɛ ɛ, ásɛ n waa lɛ nomɛlbwa sie. N gbo waa laa hiah mɛ. Nomɛlbwa ge waa hiah mɛ, gɛ maa ɛ dɛ won dɔɔ ba tɛ Korowii ó lɛɛ ba.

will be added

X\