1 Ko ja Borreegu'unk dyajjʉnajky ja myʉjʉxtujkpʉ seyʉ ma̱ ja neky, ta dʉ'ʉñʉ 'yamoonda̱a̱y tsa̱jpótm éxtʉm kujm oorʉ. 2 Nétʉts n'ijxyʉ tadʉ jʉxtujkpʉ anklʉs di'ibʉ tʉna̱a̱ydyʉp Dios windum. Yʉ'ʉjʉty yajmooydyʉ kʉjktu'ugʉ trompetʉ. 3 Oknʉm myiiñ jatu'ugʉ anklʉs mʉt tu'ugʉ oorʉ jʉʉnxijn. Ta tyʉna̱a̱y artal winduuy. Ta yajmooy mayʉ poom es yajpoomjókʉt es ttukwindsʉ'ʉgʉt mʉt ja kya̱jxtákʉn di'ibátyʉ Diosʉ jya'ayʉty, ma̱ ja oorʉ artal di'ibʉ ijtp uñaaybyajn winduuy ma̱ Dios yajkutíky. 4 Es ja poom jok, ti'igyʉ mʉt ja kya̱jxtákʉn di'ibáty ja Diosʉ jya'ayʉty, pyatʉkʉ ma̱ Dios 'yity. 5 Ta ja anklʉs ttukko'ojʉ ja jʉʉnxijn mʉt ja jʉmba̱jk ma̱ ja artal, es tjʉbijpe'ky naxwiiñ. Net myiiñ ja anaa jʉdsuk esʉ ujx. 6 Ta ja jʉxtujkpʉ anklʉs ñayjyʉjp'ijxʉdʉ es ttukxu'uxa̱'a̱ndʉ ja trompétʉty. 7 Ta ja myʉtu'ukpʉ anklʉs ttukxuxy ja trompetʉ. Ta oj myiñ ja tʉtsn, jʉnya'ank tuktʉkʉ mʉt ja ne'pyñ, es kya'ay naxwiiñ. Ta tyooy tuk peky ja naxwíñʉdʉ di'ibʉ wa̱'x tʉgʉk peky, mʉt nandʉ'ʉn tuk peky ja a̱a̱y kepy di'ibʉ nandʉ'ʉn wa̱'x tʉgʉk peky. Es nan tyooy tʉgekyʉ tsuxk mʉʉy. 8 Ta ja myʉmajtskpʉ anklʉs ttukxuxy ja trompetʉ. Ta yajjʉbijpe'ky jikymyejyñóty éxtʉm tu'ugʉ mʉj kopk di'ibʉ winya'amp mʉt ja jʉʉn. Tuk peky ja jikymyejyñ di'ibʉ wa̱'x tʉgʉk peky jyʉmbijty ne'pyñ. 9 Es tuk peky 'yo'ktʉ di'ibʉ wa̱'x tʉgʉk peky di'ibʉ naty tsʉna̱a̱ydyʉp jikymyejyñóty, es tuk peky tyʉgooy ja di'ibʉ wa̱'x tʉgʉk peky ja barkʉ. 10 Ta ja myʉdʉgʉʉkpʉ anklʉs ttukxuxy ja trompetʉ. Ta oj kya'ay tu'ugʉ mʉj mʉdsa̱'a̱ tsa̱jpótmʉdʉ, jantsy winya'amp kya'ay ma̱ tuk peky ja mʉjnʉʉ di'ibʉ wa̱'x tʉgʉk peky, es ma̱ nʉʉ myuxy. 11 Ja mʉdsa̱'a̱ ja'a txʉ'a̱jty Ta̱'a̱m. Es tuk peky ja nʉʉ di'ibʉ wa̱'x tʉgʉk peky jyʉmbijty ta̱'a̱m. May ja ja̱'a̱y 'yo'ktʉ mʉt yʉ'ʉgyʉjxmʉ tadʉ nʉʉ. 12 Ta ja myʉma̱jtáxkpʉ anklʉs ttukxuxy ja trompetʉ. Ta oj ñaywya'xyʉty tʉgʉk peky ja xʉʉ, ja po'o es ja mʉdsa̱'a̱jʉty. Net tuk peky ja xʉʉ, ja po'o es ja mʉdsa̱'a̱ oj jyʉmbity koots. Pa̱a̱ty xʉʉñ myʉkwingoodsʉ taxk oorʉ es nandʉ'ʉn koots myʉkwingoodsʉ taxk oorʉ. 13 Nétʉts n'ijxy tu'ugʉ witsn kyaagʉdíty tsa̱jwínm. Es nmʉdooyʉts ko mʉk ya'axy, es jyʉna'añ: —¡Ay! ¡Ay! ¡Ay! Pʉroobʉ yʉ naxwíñʉdʉ ja̱'a̱yʉty ko jatʉgʉʉkpʉ anklʉs t'aktukxu'uxtʉt ja trompétʉty.
