DI'IBɄ JATANɄP 12

1Es net kyʉxe'ky tsa̱jpótm tu'ugʉ mʉj ijxwʉ'ʉmʉn: tu'ugʉ toxytyʉjk mʉt ja wyit éxtʉmʉ xʉʉ tye'xy, es tyekypyatkʉ'ʉy dʉ'ʉn kyʉxe'eky éxtʉmʉ po'o, es kyʉba̱jkkʉjxm tmʉdaty ja koronʉ mʉt ma̱jmajtskʉ mʉdsa̱'a̱. 2Tya̱dʉ toxytyʉjk u'unkmʉʉdʉ naty, es ya'axy mʉt ja pʉjkʉn, ja'a ko ayoop mʉt ko dyajja̱'ta̱'a̱ñ ja maxu'unk. 3Net kyʉxe'ky tsa̱jpótm jatu'ugʉ mʉj ijxwʉ'ʉmʉn: tu'ugʉ sarpyentʉ di'ibʉ mʉj es tsapts, es jʉxtujkʉ kyʉba̱jk es ma̱jkʉ wya̱j, es mʉt ja koronʉ ma̱ tu'uk tu'ugʉ kyʉba̱jk. 4Yʉ pyi'ixy ttukpajʉdojte'ky tuk peky ja mʉdsa̱'a̱ di'ibʉ wa̱'x tʉgʉk peky. Ta tkujʉbijpna̱jxy naxwiiñ. Tya̱dʉ sarpyentʉ wya̱'kwʉ'ʉmʉ ma̱ ja toxytyʉjk di'ibʉ naty yajja̱'taampy ja maxu'unk, es tjʉʉna̱'a̱ñ ja maxu'unk jantsy netyʉ ko jya̱'tʉt. 5Ja toxytyʉjk dyajja̱jty tu'ugʉ u'ungu'unk yedyʉjk di'ibʉ yajkutuka̱a̱mp mʉt ja pyujxnda̱jk ma̱ tʉgekyʉ naxwíñʉdʉ. Net ja 'yu'unk yajpʉjkʉ es yajmʉnejxy ma̱ Dios es ja uñaaybyajn ma̱ yajkutíky. 6Es ja toxytyʉjk oj kyaknʉ ma̱ mʉj it, ma̱ naty ja Dios tʉ tyuknibʉjta̱a̱gʉty tu'ugʉ luga̱a̱r. Es jap yajmo'oyʉt ja kya'ay 'yukʉn ma̱jmajtsk mʉgo'px jatʉgʉ'px xʉʉ. 7Net ja tsip tyuunʉ tsa̱jpótm: ja Migel es ja 'yanklʉs tsiptuundʉ mʉt ja sarpyentʉ es mʉt ja sarpyentʉ 'yanklʉs. 8Per kyajyʉm myadaktʉ ja sarpyentʉ esʉ 'yanklʉs, kyaj ñakyyajna'ijxy ja sarpyentʉ esʉ 'yánklʉsʉty 'yítʉt tsa̱jpótm. 9Dʉ'ʉn oj yajkujʉbijpnáxyʉ tadʉ sarpyentʉ, di'ibʉ 'yandijpy mʉjku'ugópk es Satanás, di'ibʉ wyin'i'impy nidʉgekyʉ ja naxwíñʉdʉ ja̱'a̱y. Ta naxwiiñ yajkujʉbijpna̱jx mʉt ja 'yánklʉsʉty. 10Nétʉts nmʉdooy kajxy mʉk tsa̱jpótm, es jyʉna'añ: —Tʉ jya'ty ja Diosʉ ñitsokʉn, myʉk'a̱jtʉn esʉ kyutujkʉn. Nan ana'amnʉbʉ net ja Diosʉ Kyristʉ, es tʉ yajkujʉbijpnáxy tsa̱jpótm ja di'ibʉ ñi'ʉ'ʉnʉp ja nmʉgu'uk'a̱jtʉm. Xʉʉñ koots tmʉ'ʉʉñʉ Nindsʉn'a̱jtʉm Dios. 11Yʉ nmʉgu'uk'a̱jtʉm tʉ tmʉmada̱'a̱ktʉ mʉt yʉ'ʉgyʉjxmʉ Borreegu'ungʉ ñe'pyñ, mʉt ja 'yayuk es mʉt ja tyʉy'a̱jtʉn di'ibʉ tʉ yajka̱jxwa'xy. Pes kyaj tjʉjptsʉ'kʉdʉ 'yo'kʉn, ni'igʉ tmʉdundʉ Dios oytyim'ooktʉt. 12Pa̱a̱ty xonda̱'a̱ktʉ miidsʉty di'ibʉ ijttʉp tsa̱jpótm. Per pʉroobʉ miidsʉty di'ibʉ jiky'a̱jttʉp naxwiiñ es jikymyejyñóty, mʉt ko ja mʉjku'ugópk tʉ mnijʉnákʉdʉ awa̱'a̱n es ñija̱'a̱p ko tyimpatypyʉ dʉ'ʉn ja tiempʉ. 13Ko ja sarpyentʉ naty tʉ yajkujʉbijpnáxy naxwiiñ, ta tjaya''ayowáñ ja toxytyʉjk di'ibʉ naty tʉ tpa̱a̱ty ja maxu'unk. 14Per ja toxytyʉjk yajmooy majtskʉ kyakn éxtʉm tu'ugʉ mʉj witsnʉ jya'a, es mba̱a̱t kyaagʉdíty ma̱ ja mʉj it. Jap wyʉ'ʉmʉt tʉgʉk jʉmʉjt jakujm, es yajmo'oyʉt ja kya'ay 'yukʉn, es kʉdiibʉ mba̱a̱t wi'ix 'yadʉ'ʉtsy ja sarpyentʉ. 15Ja sarpyentʉ t'ʉ'tsy ja nʉʉ, es oj dyajmʉjnʉʉgojy es jyʉ'ʉdʉt ja toxytyʉjk. 16Per yʉ naxwíñʉdʉ pyudʉjkʉ ja toxytyʉjk, awats ja naxwíñʉdʉ es t'ukta̱a̱y ja mʉjnʉʉ di'ibʉ naty ja sarpyentʉ tʉ t'ʉʉtsy. 17Es mʉdʉ taadʉ ja sarpyentʉ ttukjot'ambejky ja toxytyʉjk. Ta oj ñejxy tsiptuumbʉ mʉt ja toxytyʉjkʉ tyʉʉmp 'ya̱a̱ts di'ibʉ akwʉ'ʉmdʉp, ja'a njʉna̱'a̱nʉm di'ibʉ pyaduundʉp ja Diosʉ 'yana'amʉn es tpanʉjxtʉ ja Jesukristʉ 'yʉxpʉjkʉn. Es ja sarpyentʉ tyʉna̱a̱y pu'ujótm jikymyejyñbyʉ'a̱a̱y.

will be added

X\