FWANK 21

1Oknʉm kyʉxe'ky ja Jesús jatʉgok ma̱ 'yʉxpʉjkpʉty ma̱ ja Tibeeryʉs Myejyñbya̱'a̱, Galileeʉ it. Es dʉ'ʉn ya'ijxy: 2Tukmukʉ naty jam ja Simonk Peedrʉ esʉ Tomás di'ibʉ tyijtʉp Xeeñu'unk, Natanael di'ibʉ kuga̱jpn Kanaa, Galileeʉ ña̱a̱xóty, ja 'yʉna̱'kʉty ja Zebedeeʉ es janimajtskpʉ wiinkpʉ 'yʉxpʉjkpʉ Jesús. 3Simonk Peedrʉ t'anma̱a̱ydyʉ yʉ'ʉjʉty: —Nejts n'ok'a̱jkxmátsy. Ta 'yadsoodʉ: —Nʉjxándʉpts ʉʉdsʉty nandʉ'ʉn mʉt mij. Ta ñʉjxtʉ ma̱ tu'ugʉ barkʉ. Es tu'ugʉ tsu'um ñajxy, kyaj ni tu'uk tkama̱jtstʉ ja a̱jkx. 4Xʉʉñdyáknʉbʉ naty ko Jesús kyʉxe'ky mejyñbyʉ'a̱a̱y, per ja 'yʉxpʉjkpʉty kyaj tnijáwʉdʉ pʉ́n ja'a dʉn ja Jesús. 5Net ja Jesús dyajtʉʉdʉ: —Mʉgu'ugʉty, ¿tʉ xymyatstʉ oynʉ'ʉnʉn? Es ja'ajʉty 'yadsoodʉ: —Ni nʉ'ʉn. 6Net ja Jesús t'anma̱a̱ydyʉ: —Kujʉbípʉdʉ ja m'a̱jkxma̱jtsn aga̱'a̱ñdsyoo ma̱ yʉ barkʉ, es m'a̱jkxmátstʉt. Ta tkujʉbijpʉdʉ, es óknʉm kyaj mba̱a̱t t'okju'tnʉdʉ ja 'ya̱jkxma̱jtsn jap nʉjoty, mʉt ko mayʉ naty ja a̱jkx tʉ tyʉkʉ. 7Net ja ʉxpʉjkpʉ di'ibʉ Jesús jyantsytsyejpy, t'anma̱a̱y ja Peedrʉ: —¡Ja'a tya̱a̱dʉ ja Nindsʉn'a̱jtʉm! Ko tmʉdooda̱a̱y ja Simonk Peedrʉ ko jya'ajʉty ja Nindsʉn'a̱jtʉm, ta jatʉgok ttuktʉjkʉ ja ñikʉjxyʉdʉ wit di'ibʉ naty tʉ tjeñ. Ta kyupujpna̱jxy nʉjoty es ñejxy mejyñbyʉ'ám ma̱ ja Jesusʉ naty. 8Es ja myʉgu'ugʉty jya̱jttʉ mejyñbyʉ'ám mʉt ja byarkʉ es mʉdʉ 'ya̱jkxma̱jtsn tpawits tpajʉdottʉ, mʉt ko ujtsʉ naty mʉt ja a̱jkx. Wingonʉ naty ma̱ ja 'ya̱jkxmátstʉ éxtʉm mʉgo'px metrʉn. 9Ko wyindʉ'ʉtspʉdsʉʉmdʉ, net tpattʉ jʉʉnu'unk di'ibʉ ja Jesús tʉ dyajmʉ́jʉ naty es ttsa̱a̱y tu'ugʉ a̱jkx, es tamʉ naty nandʉ'ʉnʉ tsa̱jkaaky. 10Net ja Jesús t'anma̱a̱ydyʉ: —Yajmíndʉ majtsk tʉgʉʉgʉ m'a̱jkx di'ibʉ tʉ xymyatstʉ. 11Simonk Peedrʉ tyʉjkʉ barkoty es dyajnejxy extʉ pu'ujótm ja 'ya̱jkxma̱jtsn ujts mʉt ja mʉj a̱jkx mʉgo'px jajustyikxymya̱jk tʉgʉʉk. Oyʉ naty jyantsymyáyʉty, ja 'ya̱jkxma̱jtsn kyaj kyʉ'tsy. 12Net ja Jesús t'anma̱a̱ydyʉ ja 'yʉxpʉjkpʉty: —Min m'armusal'attʉ. Es ni pʉ́n tka''anma̱a̱ydyʉ: “¿Mbʉ́nʉ dʉn mij?”, mʉt ko ñija̱'a̱dʉbʉ naty ko ja'a ja Nindsʉn'a̱jtʉm. 13Netʉ Jesús myʉjwa'ky es tkone'ky ja tsa̱jkaaky es tmooydyʉ ja 'yʉxpʉjkpʉty. Es nandʉ'ʉn ttuuñ mʉt ja a̱jkx. 14Ja'a tya̱a̱dʉ ja myʉdʉgʉk ok nibʉdʉ'ʉk ma̱ tpa̱a̱ttʉ ja 'yʉxpʉjkpʉty ko naty tʉ jyikypyeky ma̱ 'ye'ky. 15Ko 'yarmusal'a̱jtta̱a̱ydyʉ, net ja Jesús dyajtʉʉy ja Simonk Peedrʉ: —Simonk, Jonasʉ mya̱a̱nk, ¿xytsyojkpʉts ni'igʉ es kʉdiinʉm yʉ mmʉ''ʉxpʉjkpʉty? Peedrʉ 'yadsooy: —Windsʉ́n, mij mnija̱'a̱p kots ʉj mij ndseky. Ta Jesús jyʉnáñ: —Extʉm ja borreegʉ kwentʉ'a̱jtpʉ dyajje'xy ja byorreegu'ungʉty, nandʉ'ʉn mij awánʉdʉ ja̱'a̱yʉty ja n'ʉxpʉjkʉnʉts. 16Dyajtʉʉjʉmbijty ja myʉmajtsk ok ja Jesús: —Simonk, Jonasʉ mya̱a̱nk, ¿xytsyojkpʉts mij? Peedrʉ 'yadsooy: —Mij mnija̱'a̱p kots ʉj mij ndseky. Ta Jesús 'yadsooy: —Extʉm ja borreegʉ kwentʉ'a̱jtpʉ dyajje'xy ja byorreegu'ungʉty, nandʉ'ʉn mij awánʉdʉ ja̱'a̱yʉty ja n'ʉxpʉjkʉnʉts. 17Myʉdʉgʉk ok jyʉnáñ ja Jesús: —Simonk, Jonasʉ mya̱a̱nk, ¿xytsyojkpʉts mij? Peedrʉ jyotmaydyuktʉjkʉ mʉt ko yajtʉʉjʉ tʉgʉk ok pʉn tsyejpy ja Jesús, es t'anma̱a̱y: —Windsʉ́n, mij mnija̱'a̱p tʉgekyʉ. Mnija̱'a̱p kots ʉj mij ndseky. Jesús 'yadsoojʉ: —Extʉm ja borreegʉ kwentʉ'a̱jtpʉ dyajje'xy ja byorreegu'ungʉty, nandʉ'ʉn mij awánʉdʉ ja̱'a̱yʉty ja n'ʉxpʉjkʉnʉts. 18Jantsy tʉy'a̱jtʉnʉts mij n'anʉʉmʉ ko ijty m'ʉna̱'k'áty, mduktʉjkʉp ijty ja mwit es mnejxy ma̱ mij xytsyeky. Es óknʉm ko mij mmʉjja̱'a̱yʉt, mxa̱jwa̱'xʉp es wiinkpʉ mwit mdukpʉjta̱'a̱gʉdʉp, es mmʉnʉjxʉdʉt ma̱ mij kyaj xytsyeky mnʉjxa̱'a̱ñ. 19Es mʉdʉ tya̱a̱dʉ Jesús ttuknijawʉ wi'ix 'yoogáñ ja Peedrʉ es ja Dios tmʉj'íxʉt. Net 'yanma̱a̱yʉ: —Pamiingʉts. 20Ko Peedrʉ 'yijxʉmbijty, net t'ijxy pyanejxyʉty ja ʉxpʉjkpʉ di'ibʉ Jesús jyantsytsyojk, di'ibʉ naty nandʉ'ʉn ma̱ 'ya'ux'aty pyʉ'am ja Jesús, di'ibʉ yajtʉʉjʉ: “Windsʉ́n, ¿pʉ́nʉ dʉnʉ tadʉ di'ibʉ mgʉyakánʉp?” 21Ko Peedrʉ t'ijxy, net dyajtʉʉy ja Jesús: —Windsʉ́n, esʉ tya̱a̱dʉ, ¿ti jatánʉp? 22Jesús 'yadsoojʉ: —Pʉn ʉjts ndsejpy es jyiky'átʉt extʉ kots ʉj njʉmbítʉt, ¿ti mij xykywéntʉty? Pamiingʉts mij. 23Net ja myʉ''ʉxpʉjkpʉty ñayjyʉnánʉdʉ ko yʉ ʉxpʉjkpʉ kyaj 'yooga̱'a̱ñ. Perʉ Jesús kyaj dʉ'ʉn jyʉnáñ, di'ibʉ sitʉy jʉnán: “Pʉn ʉjtsʉts ndsejpy esʉ tya̱a̱dʉ jyiky'átʉt extʉ kots ʉj njʉmbítʉt, ¿ti mij xykywéntʉty?” 24Ʉj tʉts nmʉdoy es tʉts n'ixy tʉgekyʉ tya̱a̱dʉ, es tʉgekyʉ di'ibʉts ʉj tʉ ngʉxja̱'a̱y, ja'a dʉ'ʉn tʉy'a̱jtʉn. 25May ja wiinkpʉ di'ibʉ Jesús tyuun. Kooxyʉp yajkʉxja̱a̱ydyaay nidu'uk nidu'uk tʉgekyʉ di'ibʉ Jesús tyuun, kyajʉ da ñiba̱a̱dʉt ja naxwíñʉdʉ mʉt ja mayñeky.

will be added

X\