FWANK 14

1Net ja Jesús t'anma̱a̱ydyʉ 'yʉxpʉjkpʉty: —Katʉ miits mjotmay'ooktʉ. Pʉjta̱'a̱ktʉ ti'igyʉ mjot mwinma̱'a̱ñ ma̱ Dios es nandʉ'ʉn ma̱ ʉj. 2Ma̱dsʉ nDeety 'yity, may jam ja tsʉna̱a̱ydyákn. Pʉn kyajxyʉbʉ dʉ'ʉn, tʉʉxyʉpts ʉj miits n'anʉʉmʉdʉ. Nnejxyʉts ʉj n'ok'ʉxkukʉ ma̱ miits m'íttʉt. 3Es nétʉts nmínʉt jatʉgok es nyajnʉjxtʉdʉts miits es mjiky'áttʉt mʉt ʉj. 4Miits mnija̱'a̱dʉp ma̱ts nnejxy es mnija̱'a̱dʉp ja tu'u. 5Tomás 'yadsoojʉ: —Windsʉ́n, kyajts ʉʉdsʉty nnijáwʉdʉ ma̱ mij mnejxy. ¿Wi'ixʉts ʉj mba̱a̱t nnijáwʉdʉ tadʉ tu'u? 6Jesús 'yadsooy: —Ʉjtsʉ dʉ'ʉn éxtʉm tu'ugʉ tu'u, ʉjtskyʉjxmʉ ja̱'a̱y jya̱'ttʉ ma̱ Dios Teety, ʉjtskyʉjxmʉ ja̱'a̱y tnijáwʉdʉ ja tʉy'a̱jtʉn, ʉjtskyʉjxmʉ ja̱'a̱y jyiky'attʉ. Ni pʉ́n kyaja̱'ty ma̱ Dios Teety pʉn kyajts ʉj xymyʉbeky. 7Kooxyʉp miits xy'ixy'áttʉts ʉj, nandʉ'ʉnxyʉp xy'ixy'attʉ ja nDeedyʉts. Es tʉ net xy'ixy'attʉ tyam, ja'a ko tʉ xy'ixtʉ. 8Net ja Felipʉ 'yanma̱a̱yʉ: —Windsʉ́n, tuk'ijxtʉgʉts ja Dios Teety, es mʉt yʉ'ʉyʉ. 9Jesús t'adsooy ja Felipʉ: —Felipʉ, jékyʉts kujk n'ittʉ mʉt miidsʉty, ¿es kyajnʉmts mij xy'ixy'aty? Di'ibʉts ʉj xy'ixy'a̱jtp, 'yixy'ajtypy nandʉ'ʉn ja Dios Teety. ¿Ti kots mij xy'anʉʉmʉ kots ʉj mij nduk'íxʉt ja Dios Teety? 10¿Ti kyajts xymyʉbékyʉts ko ʉj ijtpʉmts mʉt ja Dios Teety, esʉ Dios Teety nandʉ'ʉn ijtpʉmʉ dʉ'ʉn mʉt ʉj? Di'ibʉts miits n'anma̱a̱ydyʉp, kyaj yʉ'ʉjʉty je'eyʉ ngʉ'ʉm winma̱'a̱ñʉts. Dios Teety yʉ'ʉ ijtp mʉt ʉj, es yʉ'ʉ dʉn xymyeebyʉts di'ibʉts ndúnʉp es di'ibʉts nga̱jxʉp tʉgekyʉ. 11Mʉbʉjktʉgʉts kots ʉj n'ity mʉt ja Dios Teety, es ja Dios Teety ijtpʉmʉ'ʉ mʉt ʉj. Mʉbʉjktʉgʉts mʉt kots dʉ'ʉn njʉna̱'a̱ñ, o mʉbʉjktʉgʉts mʉt ko di'ibʉts ndiimpy ya'ijxp ko tyʉy'a̱jtʉnʉty di'ibʉts miits n'anma̱a̱ydyʉp. 12’Jantsy tʉy'a̱jtʉn n'anʉʉmʉdʉ ko di'ibʉts xymyʉbʉjktʉp, tyúndʉp nandʉ'ʉn di'ibʉts ʉj ndiimpy. Es tyúndʉp waanʉ mʉ́jʉtypyʉ mʉt ko ʉj nʉjxnʉpts ma̱ Dios Teety. 13Ʉj ndúnʉpts di'ibʉts miits xy'amdoodʉp mʉt ko xymyʉbʉ́ktʉts, es dʉ'ʉn nya'íxʉdʉpts ja myʉj'a̱jtʉnʉ Dios Teety. 14Pa̱a̱dyʉts miits n'anʉʉmʉdʉ, ndúnʉpts ʉj pʉn tits xy'amdoodʉp ʉjtskyʉjxm. 15’Pʉn xytsyojktʉpts miidsʉty, mguydyúndʉpts ja n'ana'amʉn. 16Ʉjts ja Dios Teety n'amdówʉp es mduknigáxʉdʉt jatu'uk di'ibʉ mbudʉ́kʉdʉp, yʉ Espíritʉ Santʉ di'ibʉ mduk'íxʉdʉp ja tʉy'a̱jtʉn es 'yítʉt mʉt miidsʉty winʉ xʉʉ winʉ tiempʉ. 17Es pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp, nan kyaj mba̱a̱t t'axá̱jʉdʉ ja Espíritʉ Santʉ, mʉt ko kyaj t'ixtʉ es ni tka'ixy'attʉ. Per miits m'ixy'a̱jttʉp mʉt ko taa mʉt miidsʉty es wʉ'ʉmp winʉ xʉʉ winʉ tiempʉ mʉt miidsʉty. 18Kyajts miits nnika'aga̱'a̱ndʉ. Jʉmbita̱a̱mbʉts es n'ita̱'a̱ñʉts mʉt miidsʉty. 19Ko waanʉ 'yítʉt, kyajts xyñaky'íxtʉt pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp, per miits m'íxtʉp, es mjiky'áttʉp miidsʉty mʉt ko ʉj njiky'átyʉts. 20Es ma̱ tadʉ xʉʉ xypyʉ́ktʉdʉ kwentʉ ko támʉdsʉ naty ʉj mʉdʉdsʉ nDeety, es miidsʉty mʉt ʉj, es ʉj mʉt miidsʉty. 21Pʉ́n ñija̱'a̱p es tpadúñ yʉ n'ana'amʉnʉts, ya'ijxʉp kots xytsyeky. Esʉ nDeedyʉts tsojkʉp di'ibʉts ʉj xytsyojkp, es ʉjts nandʉ'ʉn ndsókʉpts, es nduk'íxʉpts yʉ'ʉ. 22Jatu'ugʉ 'yʉxpʉjkpʉ di'ibʉ nandʉ'ʉn xyʉ'a̱jtypy Juudʉs, per kyaj jya'ajʉty di'ibʉ kʉyakánʉp, ja'a jʉnán: —Windsʉ́n, ¿ti kots mij xytyuk'ixa̱'a̱ndʉts ʉʉdsʉty es kyaj pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp? 23Jesús 'yadsooy: —Di'ibʉts xytsyojkp, pyadiimpy di'ibʉts ʉj ngajxypy; esʉ nDeedyʉts tsókʉdʉp; es ʉj esʉ nDeedyʉts, míndʉpts es njiky'átʉdʉts mʉt yʉ'ʉ. 24Per di'ibʉ kyajts xytsyeky, kyaj tkuydyúñ di'ibʉts ʉj ngajxypy. Tya̱dʉ ka̱jxwíjʉn di'ibʉ miits yam mʉdoodʉp, kyajts ʉj nja'ajʉty, yʉ'ʉyʉ jya'ajʉ nDeedyʉts di'ibʉts tʉ xykyexy. 25’Miits n'ak'anʉʉmʉdʉ tya̱a̱dʉ kots n'ak'yámnʉmʉty mʉt miidsʉty. 26Per ja Espíritʉ Santʉ di'ibʉ ja nDeedyʉts kyaxaampy ʉjtskyʉjxm, ja'a mbudʉ́kʉdʉp, mduk'ʉxpʉ́kʉdʉp tʉgekyʉ es mdukjamyátsʉdʉp tʉgekyʉ di'ibʉts ʉj miits tʉ n'anʉʉmʉdʉ. 27’Nnayjyʉga̱jxʉpts mʉt miidsʉty jotkujk. Es nmooydyʉpts miits yʉ njotkujk'a̱jtʉnʉts. Per kyajts nyaky ja jotkujk'a̱jtʉn éxtʉm dyaktʉ pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp. Katʉ mjotmay'ooktʉ es ni xykyamʉdáttʉt ja tsʉ'ʉgʉ. 28Tʉ xymyʉdowdʉ kots tʉ njʉna̱'a̱ñ: “Nʉjxnʉpts, es mínʉpts jatʉgok es n'ítʉdʉts mʉt miidsʉty.” Pʉn tʉy'a̱jtʉnʉts miits xytsyoktʉ, mxondáktʉpxyʉp ko xyñijáwʉdʉ kots ʉj nnejxy ma̱ Dios Teety, mʉt ko yʉ'ʉ dʉ'ʉn ni'igʉ mʉj kʉdiinʉm ʉj. 29’N'anma̱a̱ydyʉpts miidsʉ tya̱a̱dʉ ko kyajnʉmʉ dʉ'ʉn tyuñ jyátyʉty, mʉt ko nʉjx tyuñ jyátyʉty, net xymyʉbʉ́ktʉt. 30Kyajts nnakykya̱jxa̱'a̱ñ may mʉt miidsʉty, mʉt ko miimp ja di'ibʉ ana'amp pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp, oy ni ti madakʉn tkamʉdaty mʉt ʉj. 31Per dʉ'ʉn yajkuydyuna̱'a̱ñ éxtʉmʉ Dios Teety xytyuk'ane'emy es tnijáwʉdʉt ja naxwíñʉdʉ ja̱'a̱yʉty ko ʉj ja nDeedyʉts ndsejpyʉts es nguydyiimbyʉts di'ibʉts yʉ'ʉ xytyuk'ana'amp. Wa'tsʉ'ʉktʉ. Jo'omdʉ.

will be added

X\