1 TESALÓNIKɄ 2

1Pes miidsʉty kʉ'ʉm mnija̱'a̱dʉp mʉgu'ugítʉty, ko éxtʉmts miits oj ngu'ixtʉ, kyajts nanʉgoobʉ ngu'ixtʉ. 2Oyʉts naty wi'ix tʉ nyajtúñ es tʉ nyajwinga̱jxpétyʉty jam Filipʉs, éxtʉm xyñijáwʉdʉ, perʉ Dios tʉts xypyudʉkʉ esʉts nga̱jxwa̱'xʉt amumdu'uk jot yʉ oybyʉ ayuk ma̱ miidsʉty, oy jyakʉxe'eky ja adsijpʉ. 3Mʉt ko ni wi'ix tsoots nga''anʉguga̱'a̱jʉ ma̱ di'ibʉdsʉ naty nga̱jxwa'xypy, ni ngamadya'agyʉdsʉ natyʉ axʉk kajxy es ni ngawin'ʉʉna̱'a̱ñʉts pʉ́n. 4Ni'igʉdsʉ Dios xywyinma̱'a̱ñ'ijxy es xytyuknipejkyʉts ja oybyʉ ayuk. Ʉj kyajts ngajxy wi'ixʉ ja̱'a̱yʉts xy'oyjyáwʉt, Diosʉ dʉ'ʉn sitʉy, di'ibʉ tyuk'ijxʉdyaapy ja njot'a̱jt nwinma̱'a̱ñ'a̱jtʉm. 5Extʉm miits xyñijáwʉdʉ, ni na̱'a̱ts pʉ́n ngawinwepy ngawinja̱a̱xy mʉt ja tsujti'knʉbʉ ayuk, es ni tits ngatuk'ʉbety ngatukka̱jxpéty mʉt kots nganarata̱'a̱ñ ja meeñ. Diosʉ tya̱a̱dʉ ñija̱'a̱p. 6Kyajts ni na̱'a̱ nga'ʉxta̱'a̱ydyʉ ja̱'a̱yʉty esʉts xymyʉjjáwʉt, oy tyimmiits'a̱jtpʉ es oytyim wiingaty'a̱jtpʉ. 7Oyʉts mba̱a̱t njanaybyʉjta'agyʉdyʉts éxtʉmʉ kutujkʉn mʉʉtpʉ, mʉt kots xy'apostʉlʉ'attʉ ja Kristʉ, kyajts ʉj dʉ'ʉn nduuñ. Naybyʉjtákʉts tuda'aky éxtʉm tu'ugʉ u'unkta̱a̱k t'ijx'íty tkwentʉ'aty ja 'yu'unk jantsy tsuj. 8Byeenʉts miits ndsoktʉ, ja'agyʉjxmʉts ʉj nnayjya̱'a̱jʉ es kyaj jye'eyʉty nduknijáwʉdʉt ja oybyʉ ayuk, es extʉ nandʉ'ʉn es miits ngu'oogʉdʉt. 9Mʉgu'ugítʉty, miits mjamyajtstʉp wi'ixʉts tʉ ndundʉ xʉʉñ koots es kʉdiibʉ miits n'adsíptʉt ma̱ naty jam nduknijáwʉdʉ ja oybyʉ ayuk di'ibʉ Dios kyajx. 10Miits mnija̱'a̱dʉp, es nandʉ'ʉn ja Dios, wi'ix ʉʉdsʉty dyajnʉjxtʉ tu'ugʉ jiky'a̱jtʉnʉ wa̱'a̱tspʉ, tuda'akypyʉ es ni pʉ́n mba̱a̱t xykyapeky'íxyʉty kots n'ijttʉ ma̱ miidsʉty di'ibʉ nandʉ'ʉn myʉbʉjktʉp ja Dios. 11Nandʉ'ʉn xyñijáwʉdʉ wi'ix tʉ nya'it nyajxóndʉ es wi'ix tʉ nbumay nbutá̱jʉdʉ nidu'uk nidu'uk miidsʉty, dʉ'ʉn éxtʉm ttuñ ja u'unkteety mʉt ja 'yu'unk 'yʉna̱'k. 12Pes tʉ nyajxonda̱'a̱ktʉ es tʉ nyajjotkujk'áttʉ, es extʉ tʉ nduknipʉktʉ es mjiky'áttʉt éxtʉm pyaadyʉty pʉ́nʉty ja'a'a̱jtʉdʉp ja Dios, di'ibʉ mwoojʉdʉp es nʉjx mʉʉt m'ittʉ ma̱ yajkutíky mʉt ja mʉj'a̱jtʉn. 13Pa̱a̱ty nja̱'a̱ygyʉdaktiibyʉts ja Dios ko miits xymyʉdoodʉ ja Diosʉ 'yayuk di'ibʉts oj nga̱jxwa'xy, m'axá̱jʉdʉ éxtʉm ja Diosʉ 'yayuk, es kyaj xy'axá̱jʉdʉ éxtʉmʉ ja̱'a̱yʉ 'yayuk. Es tʉy'a̱jtʉnʉ'ʉ ko Dios t'ayúkʉty di'ibʉ mʉjwiinʉp ma̱ miidsʉty di'ibáty myʉbʉjktʉp. 14Mʉgu'ugítʉty, ko miits m'ayoodʉ ma̱ mbajʉdijtʉdʉ mmʉguga̱jpnʉty, nandʉ'ʉn mja̱jttʉ éxtʉm jya̱jttʉ jam Judeeʉ ja Diosʉ jya'ay di'ibʉ ijttʉp ti'igyʉ mʉdʉ Jesukristʉ. Pes yʉ'ʉjʉty nandʉ'ʉn pajʉdijtʉdʉ myʉguga̱jpnʉty, ja israelítʉty. 15Tya̱dʉ israelítʉty yʉ'ʉ ya'o'ktʉ nandʉ'ʉnʉ Nindsʉn'a̱jtʉm Jesús, éxtʉmʉ naty nandʉ'ʉn tʉ dya'ooktʉ ja myʉguga̱jpn di'ibʉ Dioskuga̱jxpʉ'a̱jttʉ, es nandʉ'ʉnʉts ʉʉdsʉty ojts xy'ʉxkaxtʉ. Kyaj jyiky'attʉ éxtʉm ja Dios ttseky, es aknaymyʉdsip'a̱jtʉdʉp mʉt nidʉgekyʉ ja̱'a̱yʉty, 16pes extʉ jyayajkubokándʉ kots nga̱jxwa'xy ja Diosʉ 'yayuk ma̱ di'ibʉ kyaj 'yisraelítʉty, es nandʉ'ʉn ñitso'oktʉt. Es mʉt yʉ'ʉ t'aktim'yaj'ya'k'adʉ'tsypy ni'igʉ ja pyojpʉty. Pa̱a̱ty óknʉm ja Dios myo'oya̱'a̱nʉdʉ ja mʉk tʉydyu'unʉn di'ibʉ miimp ma̱ yʉ'ʉjʉty. 17Mʉgu'ugítʉty, kots miits nmastuttʉ waanʉ, oy nganay'ijxʉm, dʉ'ʉñʉmts miits nmʉdattʉ njodoty nwinma̱'a̱ñótyʉts, es byeenʉts njajʉmbita̱'a̱ñ es nʉjx nwin'ixtʉ. 18Ʉj Pa̱a̱blʉ, tʉts njanʉjxa̱'a̱ñ kana̱k ok, per ja mʉjku'ugópk Satanás yʉ'ʉts oj xya''adiky. 19Pes ¿tits ʉj n'awijx njʉjp'ijxtʉp?, ¿tits ʉj n'ijtʉn'a̱jt nxo'onʉn'a̱jttʉp?, ¿tits ʉj ndukjotkujk'a̱jttʉp?, es ¿tits ʉj ndukwingʉdak ndukjotkʉdáktʉp ko naty n'ijtʉm ma̱ ja Nindsʉn'a̱jtʉm Jesukristʉ ko myínʉt? Pes miidsʉdyʉ dʉ'ʉn. 20Miitskyʉjxmʉty nwingʉda'aky njotkʉda'aky es nxonda'agyʉts.

will be added

X\